男友迫我入影迷會 要入電視城舉牌

「我想搵一個成熟啲嘅男朋友。」女會員Amanda言談間不斷強調要成熟男，但係「成熟」呢個行為，並唔係用年齡去界定，廿歲出頭嘅男仔可以有大將之風，四五十歲仲係極其幼稚嘅亦為數不少，所以我就同佢講：「請說明。」

Amanda前男友三十歲，拍拖嗰陣已經知道呢個EX相當迷戀一位女演員，咁每個人都有偶像同埋欣賞嘅藝人，好平常啫，不過佢後來先知前男友入埋影迷會，其實咁樣都冇所謂，最有所謂係迫埋Amanda入會，原因係出席活動時可以有個伴。

由於我嘅人生暫時未入過任何影迷會歌迷會（講得好保守，暫時未，將來嘅事冇人知），成日覺得係普通會藉一個，年費只係一百幾十，照道理不痛不癢，但原來fans club係好多活動，而且有個fans互動嘅群組，據聞該女演員仲會睇fans嘅msg。

我：「咁又唔錯喎，即係可以直接同偶像講嘢。」

Amanda：「個藝人十年都唔會答一句㗎，邊有咁得閒吖，新年講句Happy New Year，平時唔會參與討論，其實咪又係單向，得fans自己圍內傾計，啲msg仲要好似入咗邪教咁，例如XXX係世上最靚，不食人間煙火，其他人又會附和，可以遇到XXX呢位藝人，係我此生最大福氣，成班傻晒咁㗎，個藝人出個post咩都冇講，班人仲會無限解讀。」

我：「Fans係咁㗎喇，精神寄託嚟啫，我都迷好多女明星，係冇入fans club啫。」

Amanda：「但係你知唔知我男朋友迫我去電視城舉牌，特別係啲頒獎典禮，仲要喺出面等個藝人出嚟送花講打氣說話，咁都未算，fans club仲有義工活動，我跟過佢去執幾次垃圾，我自己返工都做到隻嘢咁，點解放假唔可以拍拖休息下，而要去執垃圾呀？」

我：「咁你可以唔去㗎嘛！定係佢迫你去？」

Amanda：「唔去咪會黑面囉！仲要個女藝人唔係次次出席，同埋呢，個fans club啲女fans尚算正常，但啲男fans就真係勁騎哩。」

我：「又唔好咁講，可能佢哋都覺得你前男朋友騎哩呢……」

Amanda：「咪係囉，我個EX仲話喎，同一班騎哩人拍埋，自己正常好多，話嗰個女藝人一定會覺得佢好突出，希望有一日可以由fans晉升成為朋友，佢都痴痴地，本身想同你做朋友，你入咗fans club都唔同你做啦！」

佢仲話以前上EX屋企，男朋友間房係貼滿晒嗰位女藝人嘅簽名相、剪報同埋海報，反而作為女朋友嘅佢就一幅合照都唔見。從激動嘅語氣可以聽得出Amanda意難平，算啦算啦，過咗去就唔好再諗，成熟係咪？Ok，幫你搵搵！

Amanda：「你可唔可以幫我落返個remarks呀？配對嗰陣麻煩問問個男會員有冇追星或者加入fans club，有嘅話就自動幫我篩走佢吖，唔該！」

咁好難做喎，其實鍾意藝人都係一種心靈寄託，施主又唔使太執著嘅，舉牌尖叫呢啲係入門嘢，冇叫你一路失禁一路追車就算數啦，Amanda個EX最衰係迫佢入會同埋做義工執垃圾啫，興趣冇得夾硬嚟，只要識得尊重另一半嘅意願就得㗎喇，好似我咁吖，唔通鍾意三上悠亞又迫女朋友陪我睇咩，如果三上悠亞有fans club又出嚟做義工，我都會打條呔一齊去執垃圾嘅，但唔會叫埋女朋友一齊執囉！