12月初嘅時候，有人喺LinkedIn嗰度send msg畀我，內容大致係睇過我嘅profile，問我有冇興趣過檔佢公司做Vice President……Vice President？副總裁喎！
當日係星期五，由於唔係成日開住LinkedIn，所以見到呢個訊息嘅時候已經係下晝6點幾，我都準備緊放工，不過見到有人欣賞自己，再加上個職位係副總裁，咁梗係開心㗎啦！介紹返，我目前做緊Business Development Manager，雖然係部門裡面最大，但某程度上又冇得再上，有咁好嘅title自然興奮。
隨即覆返個msg畀對方話有興趣了解，睇一睇個時間，原來我隔咗幾個鐘頭先回覆，唔期望佢秒回，咁就照常放工啦，一落到公司樓下冇幾耐，LinkedIn條友真係reply，不過佢話已經離開咗office，客套咁問介唔介意星期一聯絡，點會介意呀？最鍾意呢啲公司，六點幾已經唔傾公事，有咩留返星期一先講，換言之佢哋嘅作風係夠鐘收工，我就係要呢啲！
相信大家會明白我嘅心情，雖然當晚十劃都未有一撇，title又大咗好多，但知道眼前有個機會多少有啲憧憬，就等於平時搵工有人約見，即使未去interview，內心點都會幻想下。
通常有嘢擔心先至食唔安瞓唔落，原來開心都會㗎！嗰個weekend我非常忐忑，食飯又諗下，瞓覺又諗下，仲上網check過對方間公司嘅background，縱使資料唔多，但起碼知道做乜嘢行業，知道office喺邊度，至少正正路路唔係呃人先吖！話晒都副總裁喎，濕晒啦～我手心，諗起都手心出汗呀！
次次weekend都想過得慢啲，唯獨呢次想快啲到星期一，因為好想進一步了解了解，終於等到Monday，扮下矜持等對方再contact我，結果等到朝頭早11點幾，挖角嗰條友又喺LinkedIn send msg過嚟，仲問可唔可以直接通個電話，梗係得啦，等你好耐喇衰鬼！
「你好，我喺LinkedIn睇過你嘅工作經驗，覺得好適合我哋間公司，因為我哋真係好需要一個識BD嘅人，有冇興趣過嚟做Vice President？」
我：「過獎喇，聽到你咁講有啲受寵若驚，因為我而家部門有8個下屬，想請問我嚟到做Vice President之後，大約要管理幾多人？」
「我哋係startup公司，得我同你兩個。」
……想講粗口，不過我忍。
我：「得我同你兩個？但你頭先話我哋我哋，我哋嘅意思係多過一個人，咁何來稱得上我哋呢？」
「哦，係咁既，其實目前係有個Vice President，但佢做埋今個月尾，所以之後都會維持返兩個人先。」
我：「了解，唔係太適合，唔好意思。」
「或者你介唔介意見個面？等我講下公司嘅願景畀你聽，聽埋再決定吖。」
我：「Sorry，我唔會特登請假嚟見喇。」
「唔緊要，你唔使特登請假㗎，我平時大約9點幾先離開公司，所以你放工先過嚟都唔遲。」
我：「唔好喇，特登要你就我，上星期五見你6點幾已經收工。」
「上星期係因為大廈提早講定冇中央冷氣，好似係例行檢查之類，所以我先會咁早走。」
我唔兜圈，同佢講重點：「或者而家傾少少先吖，如果我過檔做Vice President，大約需要做啲乜，待遇方面呢？」
「可以呀，咁我係President，你係Vice President，所以乜嘢都會涉獵，但你可以放心，例如請你幫我去稅局交文件咁樣吖，公司一定會claim返車錢，我哋好均真嘅，唔會因為startup就唔清唔楚，我自己會兼顧Account嘅工作。」
副總裁都要送文件，真係好貼地。
我：「人工方面呢？」
「現階段我可以出到3萬，每年再睇下個生意額決定分紅，我好有信心……」
未等佢講完我已經話：「我而家人工有$55,000，未計佣，公司保險係包埋我先生。」
「$55,000？保險包埋你先生？你公司benefit唔錯喎，咁樣吖，我……」
我：「Bye bye！」
唔知佢又想講乜，但我淨係想講Bye bye收線，唔係話睇唔起startup呀，不過都唔好咁過分吖，我而家每個月連埋佣金超過六皮，你用三皮嘢挖角？唔計福利，難道個個月佣金畀三萬蚊我？
同埋唔好成日我哋我哋啦，我咩哋啫？間公司得你一個之嘛，難怪我個title可以叫做副總裁，其實你叫我做副總統、副參謀長、副國務卿，甚至叫「花果山水簾洞美猴王齊天大聖孫悟空」都得㗎啦！成日話candidate搵工前要做research，公平啲，挖角撬人之前都要做資料搜集㗎！