有一年同老闆去咗北美出trip，先去加拿大再去美國，行程上已安排聖誕前返到香港，不過喺當地時間12月18日，我收到家人長途電話告知爸爸突然喺屋企暈倒，送咗去醫院後證實不治嘅消息。
當時同老闆身處喺一個Exhibition嘅場地，佢見我面色變晒就問發生咩事，由於我自己都未消化到，所以六神無主，老闆叫我咩都唔好諗，第一時間返酒店拎行李去機場，即刻搭飛機返香港照顧屋企人。
迅速返酒店再去機場，成個人依然好迷惘，未嚟得切回魂又收到家人嘅長途電話，聽住媽媽喊得好淒涼，嗰一刻我已經陷入咗谷底，好似無意識一樣，呢個時候老闆又打畀我，佢話已經叫秘書用我嘅資料買咗機票，叮囑我嗱嗱臨去櫃位check in，因為嗰班機距離起飛嘅時間唔多。
接受唔到爸爸嘅離開，我竟然隔住個電話向住老闆喊，其實當時邊個打電話嚟，又或者邊個企喺面前，我都一樣會向對方號啕大哭，我甚至講咗句：「冇用喇，佢已經走咗，返到去都見唔到最後一面。」
印象最深刻係老闆同我講：「振作啲啦！用呢十幾個鐘頭飛機冷靜下，因為屋企人都好需要你喺身邊，你而家咁樣只會令佢哋更擔心更無助，做男人就係有責任要頂住，你check in上完飛機先慢慢喊，用張氈笠住個頭喊，返到香港就要堅強啲，快啲啦！飛機唔等人㗎！」
去到櫃位，原來老闆幫我book嘅係頭等艙，咁大個仔第一次坐頭等艙，亦都係目前唯一一次。
人在外地，知道屋企發生咗事，但最快都要十幾個鐘先可以見到佢哋，嗰種感覺真係好痛苦，每分鐘都過得好慢，我好想求佢哋開快啲，不過呢架係飛機唔係的士，抵達後仲有連串動作例如過關同埋等行李先出到市區，好煎熬，又乜都做唔到。
嗰一年嘅聖誕同冬至對我嚟講係愁雲慘霧，自己嘅情緒都未管理得好，仲要故作堅強去睇住媽媽，後來總算捱過。
搞掂完屋企嘅事，放咗個假再返工，我首先去同秘書小姐講唔該，佢喺我最不知所措嘅時候幫我訂晒機票，安排好一切，否則當時我未必有足夠嘅冷靜去處理，另外都想打探下機票問題，雖然出trip來回機票係公司包，但頭等艙我check過，對我嚟講超貴，老闆負責係一個問題，禮貌上我都唔應該大安旨意。
秘書小姐同我講，機票公司出，唔使擔心，而且頭等艙係老闆千叮萬囑，本身有另一班機再早少少，但老闆擔心我趕唔到，加上希望我坐得舒服啲。
嗰一刻我好感動，連隨入房多謝老闆，除咗一直以嚟嘅體諒，頭等艙嘅天價亦令我耿耿於懷，點知老闆咁講：「我唔想人哋見到你喊，有個獨立空間好啲，唔使坐經濟位同人迫，釋放唔到自己嘅情感。」
老闆話自己都試過身處外國時收到佢嫲嫲過身嘅消息，當年佢坐經濟位，諗起由細湊大佢嘅嫲嫲，男人老狗喺飛機上面流馬尿，當時又係臨急臨忙book機位，坐中間行嘅中間位置，左右都有人，嚇到隔籬兩個位嘅乘客不知所措，老闆仲強調自己最叻都係坐過商務，仲未體驗過頭等。
好老闆難求，唔係因為頭等艙，係因為佢體諒員工，所以我到而家都係幫佢打緊工，每逢冬至我公司都係返半日，老闆請完食飯就可以直接喺酒樓離開，佢話冇嘢緊要過屋企人，我哋員工搵錢為屋企，佢做生意都係為屋企，其實冇分別。
隨住年紀愈大，長輩可能愈嚟愈少，呢個係殘酷嘅定律，而家嘅我會更珍惜同家人相處嘅時間，希望各位喺冬至嘅時候都可以早啲收工，一家人齊齊整整，平平安安咁樣食餐飯。