收到份cv，有位求職者相隔7年再搵工，其實佢唔係冇做嘢，只係呢段期間開公司，可惜畀partner呃錢，加上後期生意亦唔好，所以痛定思痛結束業務，重新投入職場搵工作。
佢話錢雖然蝕咗，但學到好多嘢，假如將來再有機會做生意，仍然會抱住開放態度，不過一定會相當謹慎，而呢幾年始終係做緊自己喜歡嘅事，做緊一啲唔試唔心息嘅嘢，所以無怨無悔，認為有手有腳重新出發冇咩咁大不了。
每個人都有自己想做嘅事，未必係搞生意，呢件事可以係愛一個人、搵一份工，或者係考一個試，敗興而回嘅例子有好多，但日子並冇白過，因為每一個出現嘅人，無論係好人定壞人，都會教識你一啲嘢；每一次經歷，無論係成功定失敗，都會令你長智識，所以最緊要係有一份從頭再嚟嘅勇氣。