噚日出咗兩個廣告，又係時候賽後檢討，諗諗下覺得兩件事原來係呼應，萬寧卡講正職公司填問卷，我當時嘅身份係員工，而當經理人姐姐出賣自己對眼幫樂敦廣告影相嘅時候，我嘅位置就係老闆。
收到眼藥水廣告再知道要影眼仔之後，經理人姐姐二話不說已經行出嚟頂咗佢，連背景張綠色卡紙都係佢自己買（話時話唔知佢claim咗錢未）。其實點樣令一個員工或者下屬心甘情願幫你做嘢，當中並冇任何艱深哲學，識得最基本嘅將心比己就得喇。
我起碼4個朋友不約而同做過一間好大名氣嘅美容公司，佢哋4個係互不相識，但都同我講一樣嘅嘢，就係老闆會當眾用粗口鬧佢哋，因為我自己未遇過，唔敢想像呢個年代仲有老闆用粗口鬧員工。
員工或者下屬做錯嘢當然要更正佢哋啦，但係冇必要不分場合大聲或者公開批評。令到佢哋自尊受損，唔止欠缺尊重，其實對你嘅生意都冇任何好處，個個排住隊resign係遲早嘅事。營造一個快樂同埋互相尊重嘅環境好重要，人哋做得開心，難捱都幫你啃，如果谷氣又冇尊嚴，餵到埋嘴邊都唔會食，因為吞唔落。
好嘅員工就應該俾個好嘅價錢佢，佢入職嘅起薪點好影響日後發展，因為香港公司最鍾意跟上一份工嘅薪金去做標準俾offer，你壓低咗佢，佢之後去邊度做都好，個價都會長期偏低，所以盡可能幫佢爭取多啲。（嗱我有加過畀經理人姐姐架。）
隨住員工幫到你手，佢能力提升，你生意穩定，可以主動加人工，有啲嘢下下要開口就冇癮，正如你叫下屬做嘢都唔想下下提住晒佢先識做，呢個世界或者有人唔鍾意錢，但絕對冇人唔需要錢。
當你對員工或者下屬好，佢哋一定肯幫你衝鋒陷陣，如果做齊都發現唔work，咁就係你揀人嘅眼光有問題，正常有良心嘅人都會識感恩。
所以出咁多份問卷畀員工，不如出一份問卷畀老闆自己填，肯將心比心，一定會知道全部答案，總好過員工填model answer hea你，嗰堆問卷咪又係冇參考價值。
PS：之前我唔喺香港，receptionist話有個女仔寄咗postcard定唔知聖誕卡畀我，搞到我鬼死咁開心，返嚟一睇真係屌咗出聲，原來係經理人姐姐喺芬蘭旅行時寄返嚟，等我仲以為係邊位傾慕我嘅女仔，不過當你嘅員工飛到地球另一邊都諗起你，仲要唔係因為工作，其實係幾滿足嘅。
＃唔知辦公室日報幾時先做到可以請好多員工