下屬越洋同我交代公事：「呀邊個又打嚟呀？問我點解你唔做佢生意，我話唔知呀，老細唔喺香港，如果佢唔想接，咁不如下次先啦！」
其實下屬係知道我點解唔接，佢只係溫和地回應個客。
畀返啲背景大家先，呢個客搵我哋獵頭公司請人，一嚟就要減價，其實佢哋係慣犯，次次都講價，之前就減幾百，今次要減4分1咁多，忍咗佢哋好耐，可以想像到如果求職者去見工，佢哋一定壓價。
首先，你明知我哋咩價，你比唔到唔緊要，去搵一間你比得起嘅幫襯，呢個客係迫我減價，迫我做佢哋張單，正宗無賴。
仲有嗰啲叫求職者上去見工然後壓價嘅人，都寫晒expected salary啦！你仲叫人減？比唔起就唔好叫人上嚟，不知所謂！你落街食飯，碟飯嚟到先叫老細平啲得唔得？呢度香港嚟架！唔係羅湖商業城呀！
離開香港之前已經搞到好唔愉快，我直接講咗句：「你叫減價，我真係好嬲，你搵另一間獵頭啦！」點知佢一路咬住唔放，呢段期間打畀我下屬，又話正價ok，希望重新再傾。唔好意思，原則佬係好麻煩，而家我唔ok，做得唔開心，10倍價錢都冇得傾，我就係嫌錢腥，吹呀！
老實講，我有5秒鐘嬲咗個下屬，答得太溫和喇，我理想中嘅答案應該係咁：
「點解唔做我哋生意呀！」－－－因為你叫減價吖嘛，心知肚明啦咪扮傻！
「不如下次先接啦！」－－－正價都唔會有下次，過主啦！
喺今次同下屬嘅對話當中，我仲講過一句：「唔使同佢講咁多，直接D7佢啦！」然後佢話：「咁又唔好，人哋衰人哋嘅事，我哋做返本份。」
啱！我一直都有個概念，如果劇透咁小事都要死全家，咁「壓價死全家」應該唔過份吖，所以每次有客向我啲求職者壓價，我心入面都會默默詛咒，呢個方向唔會改變，不過好人就交畀我下屬做啦！
我請呢個下屬返嚟，因為佢具備咗一啲我欠缺嘅元素，如果大家一模一樣就好弊，我知自己躁底，一定要有個人balance返，否則個場面會演變成一齊正面抽擊屌客。
做咗咁多年嘢，好上司我遇過，衰上司更加遇唔少，有啲真係要你跟足佢每一步去做，要控制你一舉一動，如果有嘢做得唔好，大家只會重覆犯錯，各人都唔再有自己性格同風格，缺點同埋不足只會一直延續，咁你請個複製人返嚟做咩？對成件事冇幫助。
一team人做嘢，處理方式唔一樣好正常，因為世界上有幾多種人，就會有幾多種唔同性格，最重要係理念同目標一致。
同上，世界上有幾多種人，就會有幾多種唔同性格，鍾意壓價嘅人一定唔係我朋友，因為呢種人連基本尊重都唔識，唔尊重求職者、唔尊重工作夥伴，亦唔尊重佢哋自己！