要學識獨立 要自救

Venus係我個客,佢打嚟叫我幫手請人,不過新年後先返工,因為佢即將要炒其中一個女下屬。

遇到呢啲情況一定要問原因,事關你決定炒人,就梗係有啲嘢唔鍾意,我搵求職者嗰陣就盡量避免。Venus話呢位女下屬入咗嚟半年,表現時好時壞,好係因為同佢男朋友甜甜蜜蜜,而壞嘅時候就係同男朋友鬧交,不幸地,壞嘅比例係多好多。

有次去客人公司開會,期間女下屬keep住同男朋友whatsapp鬧交,一路開會一路激動撳電話,咁都算喇,開開下仲自己爆喊衝咗出會議室,連個客人都O晒嘴,不過Venus冇嬲,當晚仲同呢位下屬食飯,再去公園傾心事,一傾就傾到凌晨3點。情況好咗兩日,女下屬又嚟料,喺pantry講電話然後大叫一聲:「我要殺咗你!」雖然Venus唔知佢要殺邊個,但推斷應該係男朋友,而每次情海翻波就會請兩三日假。

Venus話唔想而家炒人,係知道一月好難搵工,希望佢新年拎埋按比例發放嘅雙糧同花紅先走,佢話女下屬其實好有潛質,但公司唔係愛情補習社,自己除咗要應付一班西客,仲有個好現實嘅老闆,冇可能每日做社工,唯有忍痛行呢一步,希望佢之後會成熟。

我唔知呢位女同事係咪辦公室日報嘅讀者,不過我想講少少感受, 唔好咁輕易去依賴一個人,當佢成為咗自己嘅習慣之後,將來如果分開,失去嘅唔單止係一個軀殼咁簡單,而係一個心靈支柱,而其實每個人都應該要學識獨立,否則唔會成長。

有好多人展露笑容,冇表面傷痕,可能只係背人垂淚,佢哋遭受嘅壓力同埋辛苦,隨時大過一班終日傷春悲秋嘅人。世界上冇人有義務要不停安慰你,因為大家嘅生活同工作已經夠晒攰,所以關鍵係要識得自救。

距離新年仲有一段時間,我未開始搵人,如果嗰位女同事喺呢段時間有所改變,以Venus嘅性格一定會心軟。

唔好太倚賴人,要學識獨立,要自救。

error: