喺台灣旅行嘅時候，我收到一個既陌生，又有啲熟悉嘅號碼來電，因為我真係見過，但又講唔出係邊個，初初一兩次選擇唔聽，畢竟係放緊假，加上會收漫遊費用，但係一次、兩次、三次、四次，打嚟嘅密度已經令我好不安。
當時諗會唔會係屋企有咩急事呢？然後我用小熊來電之類嘅App查下，又冇人提供詐騙同埋騷擾電話舉報喎，唔知大家明唔明呢種心情，你真係好驚係有緊要事㗎，連去玩都會唔安樂，結果我就忍唔住聽咗，耳邊傳嚟一個客戶把聲。
「喂，Marcus呀！終於搵到你喇，唔好意思呀，知你放緊假，不過份約有啲細節真係好急，你記唔記得我哋上次傾咗個terms……」
個客一輪咀係咁講，其實我都冇心機聽，第一個反應係唔明點解佢會有我私人手提電話number，因為公司另外有部電話畀我哋，亦係用另一個公司手提電話號碼，我又冇飛直線，你點會識得打畀我？
然後我第二個反應梗係嬲啦，公事留返返工講，我用緊自己大假去旅行㗎！仲未計漫遊收費！
我：「請問你……點解會有我呢個number嘅？」
「你同事畀我㗎，今日朝早打去你公司，佢話你放緊大假喎，咁我啲嘢急吖嘛，咁佢咪畀咗你私人number我囉，哇！你公司又幾好喎，原來另外出多部電話同埋number畀你哋，我平時都係用私人手提電話覆咋！」
我：「請問係邊個同事畀我number你㗎？佢有冇話自己叫咩名？男定女？」
「咁佢又真係冇講自己叫咩名喎，男仔嚟嘅，做咩呀？你想鬧佢呀？唔好啦！我都係打嚟問幾句啫，可能佢又知我急，大家想解決件事啫，我問完就唔會煩你㗎喇！」
坦白講，我係嬲嗰位出賣我電話嘅同事，反而冇乜嬲個客，始終立場唔同，如果我係客都希望搵到人幫手，只係我同事冇理由喺未經我同意之下爆我私人number出去，呢啲嘢唔使教呀？唔關公司policy嘅事，呢個係正常人要識嘅基本尊重囉！
我去台灣只係玩4日3夜，非常不幸地，呢個客亦都係call足我4日3夜，真係想收返頭先嗰句「反而冇乜嬲個客」……
其實中間有啲call我已經特登唔聽，特別係旅程最後一日，個客打嚟10次我只會聽一次，不過計計埋埋都聽咗佢幾廿個電話，真係咩旅行mood都冇晒！
返到香港第二日返工，第一件事就係搵邊個同事將我個私人number畀咗個客，結果有個男同事認咗，佢仲要咁講：「乜唔得㗎？我見佢搵得你咁急，咪畀你number佢囉！」
我淨係用咗4個字回應啫！就係DLLM！
個男同事仲好意思問我做咩用粗口鬧佢，好在其他人都有幫口，話如果可以隨便畀私人number個客，咁公司點解要出多部電話畀我哋用？
我將呢件事同老細講，唔係要好似小學生咁告狀，而係要claim返啲漫遊畀我呀！幾廿個電話，嗰度冇4位數字乜都得，唔通我打工仲要幫公司出埋漫遊呀？我個旅程咁困擾都未問老細claim返機票錢，我一定唔會自己出呢筆電話費囉！
老細肯claim，不過佢之後嘅說話仲難聽過我用粗口鬧嗰位同事。
老細：「我明你心情，但係同事都唔算做錯嘅，始終公司嘢緊要，都係要解決。」
我：「其實呢啲嘢求其搵個同事已經解決到，唔係一定下下要搵我㗎，仲要畀我私人number個客，你知唔知我直到噚日返到香港仲收到個客call？佢之後肯定唔會再打公司電話。」
老細：「明嘅明嘅，不過都要湊好個客，我平時都會用自己時間處理公事㗎，出嚟做嘢好平常啫，後生仔唔使咁計較，我反而覺得個同事冇做錯喎！」
佢都痴線！間公司係你嘅，你梗係願意用自己時間處理公事啦，我打份工㗎咋！而家去個4日3夜台灣旅行都要幫你處理公事，講唔講得通呀？
我出返房再鬧多個同事一次，而家打緊呢篇嘢嘅時候仲好笑，公司電話同私人電話都擺枱面，我亦已經喺香港，但個客仲係選擇打我私人number，冇呀，總之佢打私人號碼就唔聽，訓練返佢打公司號碼囉，不過成件事就好煩，無論點都好，同事都冇理由將我私人號碼畀客，呢樣點講都唔通！