早排有位女士上嚟，39歲，其實歲數唔係重點，絕對冇年齡歧視，問題只係佢嘅擇偶條件全部同錢有關，包括要對方有車有樓，年薪過百萬，除返開即係月入最低要求係$83,333。
咁佢呢？呢位女士表示自己月入剛好23,000，唔知佢有冇13個月糧，當有啦，年薪即係299,000。
我問：「冇其他要求？高度、樣貌、人品呢？」
對方答：「冇特別。」
我問：「年薪過百萬同埋有車有樓真係咁重要咩？」
對方答：「就係因為我冇，我先希望另一半有。」
你又唔可以話佢錯，呢一句「就係因為我冇，我先希望另一半有。」字面邏輯上係合理。
後來同其他同事傾，睇下大家手上有冇符合條件嘅男士彈過嚟，有位女同事話：「年薪過百萬？我有幾個呀。」
我：「真？」
女同事：「真，不過咁，我用返女人嘅身份同角度去睇，如果我係一個有車有樓，年薪過百萬嘅男人，走嚟speed dating搵個39歲嘅女人做咩？搵個20幾歲嘅女仔都得啦！我30幾歲，有車有樓年薪過百萬，一定搵20幾歲嘅女仔，我40幾歲，有車有樓年薪過百萬，都一定會搵個20幾歲嘅女仔，如果我已經五六十歲，有車有樓年薪過百萬，人一世物一世，更加要搵個20幾歲嘅女仔啦！話說回頭，就算我係一個有車有樓年薪過百萬嘅女人，咁不如搵個小鮮肉，養仔都係散紙之嘛，點解我又要搵個幾廿歲嘅阿叔呀？」
好似幾Mean，但又相當到肉。
正如我都識得年薪過百萬嘅女士，佢哋如果要搵年薪過百萬嘅男士其實唔難，唔係錢同埋樣貌嘅問題，係佢嘅世界同埋圈子已經有same level嘅人，你去到嗰個層次，自自然然就會識到，如果識唔到，會唔會係自己年薪未過百萬？自己未有車未有樓？假設係咁，點解又要求另一半有咁優越嘅條件，然後眾裡尋他淨係揀你呢？
以上說話冇任何歧視成份，年紀大並唔代表冇資格搵真愛，「就係因為我冇，我先希望另一半有。」呢種概念亦係人之常情，問題係你可以有自己嘅標準，但唔可以淨係考慮自己嘅標準。
又或者咁講，呢位女士可以堅持自己嘅標準，但係市場嘅真實情況會決定呢個標準是否可行。