作為老闆私人秘書，其實我知道好多同事唔知嘅嘢，例如老闆有二奶同三奶，因為每次book枱book酒店都係我幫佢，又例如老闆出幾多人工畀自己，交幾錢稅，因為好多資料都係我幫佢填幫佢交，仲有就係～～～老闆真實中點睇某啲員工。
公司有個莫生做咗10年，主管級，佢每兩三日梗會借頭借路走嚟搵老闆傾計，次次都喺房傾到嘻嘻哈哈，所以其他同事唔敢得罪莫生，大家都覺得佢同老闆感情好好，係心腹同愛將。莫生每個月亦會搵到藉口送嘢畀老闆，印象中送過茶葉、領帶、口罩（最難撲口罩嗰期）、維他命丸、鈣片、月餅、糉、汽車香精座……多不勝數。
基本上你想像到一個擦鞋仔會做嘅行為，莫生都係有多冇少。
不過莫生好少做實事，通常喺office游嚟游去，工作交畀下屬處理，佢有幾廢已經人所共知，但莫生有一項技能的確超班，就係篤背脊，佢會走嚟向我同老闆稟報邊位同事請咗病假，澄清兩件事先，老闆同我都冇要求，亦唔需要知，而且請病假嘅同事仲要係其他人條team，絕對係好管閒事。邊位同事遲到、邊位同事早退、邊位同事拍拖、邊啲同事之間有爭執，仲有office裡面嘅八卦嘢，莫生都會走嚟向老闆打小報告。
可能你會問點解唔炒莫生呢個廢人？其實老闆嘅取向好簡單，公司咁多人，每個人嘅性格同「用途」都唔一樣，冇可能個個係精英，有啲人做嘢好叻但有少少反叛，有啲人做嘢唔叻但好守規矩，有啲人冇專長好似莫生咁，但就好似一個「人肉天文台」，除咗匯報消息，某程度上仲幫老闆監察同事，更何況莫生做咗10年，當初係老闆嘅朋友介紹入嚟做。
老闆都試過唔耐煩然後向我呻：「有啲嘢我唔想知，莫生走嚟同我講Calvin去完廁所唔洗手，你覺得我有興趣知？」
我：「佢又真係太over，早兩日話我知Cindy同Donald拍拖，我都覺得唔需要咁樣。」
老闆：「我知佢咁做只係想刷存在感，佢以為篤爆咗人哋一啲嘢出嚟，就等於同我講佢自己唔會咁做，要畀我知道佢對公司好忠誠。」
上星期莫生終闖禍，Sales team嘅Timothy去見客，莫生走去嘈Timothy claim的士錢，質問人哋點解唔坐其他交通工具，話咁樣係浪費資源，下下搭的士會加重公司負擔。哈！好惹唔惹，走去惹Sales team，Timothy個上司燥咗，直接走去同老闆投訴，結果要勞煩我call埋莫生過嚟開會。
老闆、我、Timothy上司，仲有莫生4個人喺房，老闆同莫生講嘢不留情面：「係我叫Timothy去見嗰個客，你捉佢claim的士錢做乜？」
莫生：「哦，我唔知係你叫佢去，驚個個Sales去見客都搭的士，公司年中會claim好多車費，我覺得Timothy可以早啲搭其他交通工具出去，只要佢時間管理好啲……」
好心咪駁咀啦，未等莫生講完，老闆就好似機關槍咁扑咪：「呢個客之前同我哋唔啱，3年冇做過生意，最近佢哋換咗人，所以我叫Timothy嗱嗱聲去派catalogue派片（卡片），無論點都好，Sales係出去見客傾生意，幫公司爭取更多收入，你自己喺office嘆冷氣，好多嘢梗係講得輕鬆。」
Timothy上司同埋我冇出聲齋睇戲。
老闆意猶未盡繼續鬧：「希望你唔好影響Sales出去幫公司做嘢嘅心情，佢哋係代表公司形象，你最好搞清楚自己個定位，唔好喺同事出去搏緊命嘅時候周圍篤背脊，你畀佢哋心無旁騖咁幫公司做嘢啦，得唔得呀？我已經夠晒煩，唔好再要我嘥精神處理呢啲內部問題啦！」
估唔到老闆咁大火氣，爭在未直接叫莫生做忠誠廢物。其實都明白嘅，同事請病假或者去廁所唔洗手只係無傷大雅嘅小事，而家講緊幫公司傾單同埋brand building，莫生係要伸個頭出嚟畀人鬧，只可以講句咎由自取，你覺得份「小報告」重要啲，定係公司生意同形象重要啲。
又唔好以為莫生會係咁say sorry息事寧人喎，一個做咗咁多年嘅忠誠廢物都有脾氣，都一樣要面子，佢最近成個人靜晒，冇走嚟搵老闆同埋搵我，可能知道靠打小報告呃飯食完全唔work，仲畀老闆認為係公司嘅絆腳石，心灰意冷咪深潛囉！
好多同事都知道呢單嘢，因為Timothy上司揚晒出去，大家都希望見到莫生辭職，太天真喇，冇技能嘅忠誠廢物去得邊吖，潛水都係想大家淡忘件事，之後風聲冇咁緊，莫生又會繼續做公司嘅寄生蟲㗎喇。