我有個朋友成日話佢家姐好樣衰，仲話就算而家咁大個都好，間唔中都會同佢家姐打架，嘈交就更加多啦，直情嘈到冇晒感覺，所以佢家姐喺我心目中絕對係三尖八角嘅大山婆，如無意外會係孔武有力，面目猙獰，總之冇忽好肉啦！
不過早排佢家姐失戀，呢個衰仔竟然叫我介紹男仔畀家姐，果然係血濃於水，我個friend解釋：「唔係呀，我想有條仔埋單，武肺之後唔想成日見佢喺屋企，最好快啲嫁咗佢。」
點都好啦，我叫個friend係咁易send張相嚟，自己人點都要謹慎啲，盡量搵個match到嘅男仔啦，點知收到張相之後！！！！！！喂，好靚女呀！有啲似邊個呢？似姚嘉妮呀！完全唔係原本心目中嘅面目猙獰feel喎！係仙氣喎！！！
將呢件事同我阿姐分享，佢話好明白，因為我阿姐屋企都有個大佬，關係又差唔多：「康仔，可能你冇細妹或者家姐，你真係唔明，嗰啲喺出面連水樽蓋都擰唔開嘅女仔，喺屋企嘅時候，絕對夠力擰甩阿哥或者細佬個頭。」
😂真唔真呀？
我同返個friend講：「你家姐真心靚女，而家我先知你係仆街，成日蝦家姐。」
我個friend話：「是但你啦，想唔想知上星期我哋為咩嘈交？」
「想。」
Friend：「佢用我個鬚刨剃格勒底毛，唔係第一次喇。」
😂😂😂😂😂
其實天下間唔夠力開樽蓋嘅女仔，係咪真係可以擰甩阿哥細佬個頭呢？點都好，剃格勒底毛單嘢我當冇聽過，唔會㗎！家姐咁靚唔會咁做㗎！你唔好屈佢！啲阿哥同細佬聽住呀，你哋唔好再蝦屋企個家姐同阿妹呀！
《圖片取自好靚嘅姚嘉妮IG： yiugaga》❤️❤️