有件電器要拎去維修中心整，counter除咗有CS負責處理walk-in客之外，仲有一位職員坐喺度做緊文件嘢，此時有個人從房仔行出嚟，遞咗個file畀做緊paperwork嗰位職員，以下係佢哋嘅對話內容：
想pass個file畀人嗰個係A
坐喺度處理緊Paperwork嗰個係B
A：「喂，呢隻投訴你跟吖！」
B：「吓，我唔知頭唔知路，未必跟到喎。」
A：「好易㗎咋，都係照平時咁做。」
B：「你唔識做呀？定係驚咗個客？」
A：「梗係唔係啦！點會唔識做呀？客都好驚？」
B：「係囉！咁你自己唔做？」
A：「冇時間呀，我好多嘢做。」
B：「我都好多嘢做喎，嗱，一係咁，我手頭上都有單麻煩嘢，你跟我嗰隻，我跟你呢隻。」
A：「但我唔知你呢隻case嘅進度吖嘛！」
B：「咪係囉！我一樣唔知你嗰隻嘅進度。」
A：「你睇下入面啲料就知㗎喇。」
B：「咁呀，我怕跟錯，不如你逐part逐part講一次，逐個step教我吖。」
A：「咁麻煩，教得你不如我自己做啦！」
B：「如果你等得，我完咗手上呢單先幫你囉，不過我呢隻應該有排跟，後日我仲放例假。」
A：「吓，唔得喎，呢隻今日內要覆客，如果唔係佢又打嚟嘈，最遲星期一要搞掂。」
B：「咁應該做唔切，幫唔到你喇，呢個case邊個畀你跟㗎？」
A：「阿頭囉！所以唔推得㗎！」
B：「即係你好多嘢做，做唔掂，又唔好意思同阿頭講？唉，咁小事，我一陣幫你同阿頭反映啦！」
A：「咁又唔好，佢畀得我跟，我都唔想令佢失望，好似你咁之嘛，你都唔會推job啦！」
B：「我唔會呀，因為我知自己搞得掂，唔使人幫。你唔使驚啦，我識得幫你同阿頭講㗎喇，叫佢分少啲嘢畀你做啦！分下畀其他同事。」
A：「唔使啦，最怕麻煩人哋，又煩親阿頭。」
B：「你啱啱唔係麻煩緊我咩？」
A：「我隨便問下之嘛，以為你手上啲嘢唔急。」
B：「唔緊要，嗱！總之一場同事，我唔會見死不救嘅，你搞唔掂，做唔切，同我講，我幫你向上頭反映，你唔好自己啃晒呀！」
A：「唔使唔使，我自己搞得掂，唔使幫我同阿頭講。」
然後職員A就拎返個file行開，職員B繼續工作。
要對付無賴，你一定要比佢更無賴。
日常生活同埋工作中，職員A呢種人俯拾皆是，你唔會係第一個，亦唔會係唯一一個畀佢搵笨嘅人，我哋都知道職員B嘅做法正確，甚至可以再精簡啲答一句：「唔做！要做你自己做！」奈何說易行難，更多時候會唔識得拒絕，或者係唔好意思拒絕。
漂亮地say no係一種藝術，如果冇呢方面嘅天份，就試下直截了當咁say no，有勇氣就夠㗎喇！因為大家都係怕麻煩所以先say yes，幻想下答應咗之後會招惹更多麻煩，咁你就會知道一開始即刻拒絕其實係最好。
更多人擔心一旦say no會損害彼此嘅關係，咁你就需要換另一個角度去思考－－－－－無須同嗰啲成日攞著數嘅人保持關係，你同佢嘅關係愈好，佢就會經常打你主意，因為職員A呢種人嘅天性係欺善怕惡。
Say yes，你會谷氣到瞓唔著；Say no，佢會谷氣到瞓唔著；咁你想自己瞓唔著，定係一個搵你笨嘅人瞓唔著？