無啦啦講起幫Rocky做兄弟嘅往事，係因為我三年前都踏入人生另一個階段，就係結婚。
本身我係唔需要煩兄弟姊妹呢啲嘢，因為同老婆喺拍拖階段已經有共識，就係結婚唔會擺酒，大家都覺得諗起就攰，要做show畀咁多親戚朋友睇相當無謂。
「搞個輕婚禮算喇。」
我：「贊成呀！係咪嗰啲日光日白晏晝搞，喺啲草地上面做證婚，旁邊有啲濕鳩三文治呀，有啲可樂香檳橙汁畀人飲嗰種？」
「係呀，都幾靚吖，簡簡單單咪好囉！其實我屋企親戚唔多㗎，擺酒咪盞搞。」
我：「我同你相反，朋友少，親戚多，但我最驚就係對住親戚。」
結果我同老婆（其實嗰陣時仲係叫女朋友）上網搵咗好多輕婚禮嘅場地資料，又打去enquiry，跟住先發現一件事，原來搞呢啲所謂輕婚禮，費用仲昂貴過正正式式擺酒。
其中一個心儀嘅輕婚禮場地係尖沙咀1881，好多人影婚紗相同埋拎畢業相嗰度呢，上去餐廳側邊位置有塊草地，租畀你3個鐘做wedding event盛惠HK$46,000再加10% service charge，限人數60位，呢嚿錢係唔包任何食物飲品，咁唔通叫賓客自己拎支屈臣氏蒸餾水嚟睇行禮咩，所以加餐飲在所難免，咁就要另外再加幾萬蚊，有數得計，呢度起碼8至10萬。
再搵就係Sky100，HK$49,888畀個維港view你，有嘢飲，不過冇嘢食，而且得90分鐘可以用，老老實實絕對唔夠，你佈置下，吹下水，又唔係個個準時到，至少要兩至三粒鐘先搞得掂，換言之加鐘就變double，咪又要成10萬。
最後搵埋Murray，HK$68,000，又係限60位賓客，唉，冇心機！其實可以有平啲同埋靚景，不過就要入到大澳，後生就話啫，咁多老人家好難安排。
以上價錢好多都係限人數，如果咁計法，酒店酒樓仲抵，拉平均擺酒一圍HK$10,000，有晚飯食，下午已經用得新娘房化妝同埋叫人嚟搞場地佈置，部分酒店甚至有戶外場地或者海景畀你證婚，配套同視覺唔會輸畀上述輕婚禮地點。
傾下傾下老婆就話：「反正都係要掟嚿錢出嚟，銀碼一樣甚至平啲，點解唔正正經經搵酒店呢？」
我：「唔係一開始有默契唔擺酒咩？」
「係啫，不過輕婚禮要10萬，冇嘢食，頭先睇嗰間酒店如果當擺6至8圍，其實都係7萬幾，仲有個草地同Harbour view……」
我：「咁又係……」
「同埋諗諗下，老人家唔會識分咩係輕婚禮，佢哋淨係覺得嚟到冇飯食。」
我：「以你阿爸嘅性格一定黑面啦！到時搞輕婚禮仲衰過唔搞。」
「就當我哋酒又唔擺，輕婚禮又唔搞，始終都要同親戚食餐飯。」
最怕面對啲親戚，過年已經唔會出席拜年，而家仲要group埋佢哋食餐飯，諗起都頭痕，原來得親戚喺度氣氛仲怪，有啲朋友在場反而冇咁尷尬，說著說著，再考慮埋輕婚禮唔抵玩嘅問題，大家就決定去酒店擺6圍，total都係7萬蚊，仲有人情收返，妖！到頭來咪又係擺酒！
其實我朋友真係唔多，6圍當中有3圍半係我親戚，朋友請得幾個，老婆嗰邊就親戚少，少到加埋唔夠一圍，佢另外請一圍半嘅朋友。
然後，我跌入咗當年Rocky嘅循環－－－冇兄弟人選。
記得嗰陣時我係咁諗Rocky：「人生在世幾十年，搵5個兄弟都搵唔到？做人有冇咁失敗呀？」後來呢件事竟然發生喺我身上。
如果本身份人唔鍾意應酬，性格唔鍾意熱鬧都叫失敗，咁我唯有認自己係失敗。讀書時期朋友無疑比較多，只係相隔咗咁長時間，基本上已經冇keep住同班舊同學contact，至於朋友，我成世人都係貴精不貴多，傾到計得一兩個，其中一個仲因為工作關係派駐海外，即係唔喺香港。
同事方面，我做過三份工，一份同啲人唔夾，未夠試用期就quit咗，第二份就係有Rocky嗰份，班同事係點唔使再重複啦，終於明白Rocky點解搵順豐哥哥都唔敢搵佢哋，真係好唔放心㗎！至於而家份工，我部門有5個人，我係唯一一條仔，平時同另外4條女純粹Hi Bye同事關係，咁你叫我點算？
撇除婚禮搵兄弟嘅問題，我覺得自己係有社交障礙症，曾經跟朋友或者同事出去飲嘢，但真係唔鍾意呢種生活，其實我都唔想咁宅，可惜有啲嘢係天生。
有幾次我望住老婆欲言又止，好想話不如唔好擺酒，唔好搞咩輕婚禮，直接註冊就算，但係見到佢當時已經雀躍地睇緊婚紗同埋籌備，我真係講唔出口，相信好多女仔就算講到幾冇所謂，心底裡始終渴望有一個婚禮，大定細並唔重要，只係想有一幕著住婚紗接受朋友嘅祝福。
講多件事，我老婆當時啱啱幫一個中學同學阿Ling做姊妹，而其實做姊妹之前，佢同嗰位中學同學已經幾年冇聯絡，所以佢曾經呻過：「唔明點解阿Ling會搵我，不過唔通人哋開到聲唔幫咩，我諗阿Ling搵咗好多人都被拒絕，所以最後先會call我。」
而我呢，完全冇諗過搵Rocky，一來係轉工後零contact，二來又係性格缺陷，真係唔friend吖嘛，好難講出口叫佢幫忙，我份人就係咁失敗，唔識得好似老婆個中學同學咁樣周圍搵人幫。
我：「係呢，你會搵幾多個姊妹？」
「我其實有6個朋友係最friend，不過我可以搵其中4個就得，你……搵唔搵到4個兄弟？」
拍咗拖咁耐，老婆好清楚我有社交障礙症，佢知我不嬲都好宅好孤僻，佢亦都知我有個best friend唔喺香港，所以要搵4個兄弟嘅難度，同悟空要搵齊7粒龍珠係差唔多。（未完待續）