隔離team個阿姐走嚟問：「有冇人介紹呀？」
我：「你搵咩position？」
「唔係客呀，我條team有同事走，你識唔識人介紹入嚟做？」
話晒都係隔離team阿姐，唔通唔畀面咩？係咁易都要彈幾份CV過去，而其中有一兩個仲係做過headhunt呢行，啱晒啦！點知話咁快佢就打內線畀我：「麻麻地咋喎，有冇其他？」
我：「點樣麻麻地呀？有個HR底，有個Sales底，有個仲係competitor公司，乜嘢元素都齊喎，你見咗先啦！」
「直情見到啦，個個都有相，全部30幾歲，又唔靚仔，另外唔要女人呀，多是非，我要小鮮肉。」
你冇L嘢呀？女人多是非？你自己咪女人囉！仲有你都三張幾接近四張，又要咩小鮮肉呀？雖然我知你未婚，但唔會天真到認為請個小鮮肉返嚟可以發展啩？
當然……我唔方便咁樣同佢講嘢，只係反問咗一句：「你認真？」
「梗係認真啦！請個靚仔返嚟唔做得都睇得吖嘛！」
我：「咁真係冇，你都係自己出稿啦。」
「自己出稿收返嚟啲CV未必有相，一陣上嚟先見到唔靚仔就嘥時間。」
你而家就嘥緊我時間喇！諗諗下佢條team經常走馬燈咁轉人，而每次都隔好耐先再搵到人返工，其實就係咁嘅原因。
喺工作嘅地方唔好「外貌協會會長」上身，大家都係為柴米油鹽終日奔波嘅一群，嗰啲經常提住要請靚仔靚女小鮮肉後生女嘅人唔該記住，你間公司唔係電影公司，亦唔係模特兒公司。
請人唔應該取決於佢嘅樣貌同年紀，而係要諗適唔適合，好睇冇用，返工嘅日子可以好過先有用。