兩個女同事有啲拗撬，因為後生啲嗰位今日生日，男朋友送咗紮花嚟公司，咁佢當然好開心啦！除咗影下相之外，仲不斷讚男朋友細心，點知另一位女同事全程黑面，後來爆咗句：「送花真係好嘥錢！其實啲男仔送花嚟office係咩心態？」
然後兩位就開始有火藥味喇！
「吓，有咩問題？佢心意嚟啫！」
「咁佢可以夜晚食飯先送啫，唔使搞到咁大龍鳳。」
「男仔唔想拎住紮花周街行好正常吖。」
「咁女仔又想拎住行喇喎？你一陣咪又係會攞走。」
下刪幾十板來回底線抽擊，文字都形容唔到當時嘅氣氛。
其實黑面嗰位女同事上年失戀，聽講過程都好慘，平時佢會避談感情事，今次收花個女同事坐正前面，避無可避。
同一樣嘢，可以有兩種心情、睇法，同埋立場，好視乎自身經歷，凡事都有兩面。
呢個地方一池死水
後來遇到你
有漣漪有生氣
呢度就係我個心
以上四句，其實都可以由尾讀返上去。