「好搞笑呀你，坐到咁嘅，做咩望住我呀？好悶呀你？返工係咁㗎，慢慢你就慣㗎喇，陪下我啦！」新返嘅同事坐我隔籬，當時我埋頭苦幹準備緊開會嘅文件，突然有人用把嬌滴滴嘅聲線同我講嘢，當場打咗個突，心諗幾時望住你呀？
我擰過去望住呢位新同事，佢連隨笑住同我講唔好意思：「Sorry，我唔係話你呀，我同熊bear bear講嘢咋，你睇下佢幾得意，望住你笑呀，我諗佢一定好鍾意你。」我沿住佢指嘅方向望埋去，原來係一隻熊公仔……
就係咁，我經新同事「介紹」認識咗熊bear bear，其他同事亦知道熊bear bear嘅存在，因為新同事唔止會同隻公仔講嘢，仲會一日到黑幫隻公仔影相，有時喺張枱擺出唔同pose，有時就拎咗去pantry拍寫真，有時拎去會議室個窗邊。
「熊bear bear有IG㗎，你快啲follow吖，你睇下佢幾得意。」
我：「佢都有IG？」
「有400幾人follow㗎！好多fans㗎佢！」
Omg！400幾人follow，仲多過我，每個post都有一百幾十like，我平時啲post頂盡得10個like……
同事之間當然有私底下討論，大部分係話佢變態同幼稚。
「你部門個新同事係咪傻傻地？成日自言自語同隻公仔講嘢！」
「勁癲囉！頭先去pantry斟水，佢喺度幫隻公仔影寫真。」
「講真我有少少驚，你見唔見佢幫隻熊換衫？有主題㗎喎，Halloween嗰排又有件袍又有南瓜車。」
我梗係知啦！早排中秋仲有個迷你月餅擺喺熊bear bear前面，好似供奉緊佢咁樣添！
由於我有時分唔清新同事係同我講嘢定係同熊bear bear講嘢，所以基本上係選擇唔應。
「凍唔凍呀？公司冷氣開到好大喎！」
我：「唔凍呀，我有衫！」
「哈哈！我唔係問你呀，我問緊熊bear bear呀！」
$@! % $@! %
「唔知今日使唔使OT呢？」
我冇出聲，然後佢拍一拍我，話原來係問緊我使唔使OT，妖！鬼知你同緊我講咩！
不過咁，如果單計做嘢，佢嘅工作表現係完全冇問題，反而有一次佢話自己出門口太趕，忘記咗帶埋熊bear bear返工，嗰日佢就好多甩漏喇，所以作為同事，佢自言自語又影響唔到我，咁就無謂管人哋啲嘢啦，有同事個位都有高達，只係冇同高達傾計啫，講到尾都係同出一轍嘅精神寄託。
隻熊bear bear係唔會留喺公司過夜㗎，返工放工都跟住佢，我心諗，呢隻熊bear bear都算命苦，今世已經投胎成為一隻公仔，點估到仲要經歷凡間上班族嘅痛苦。
有次唔知點解熊bear bear跌咗落地，原來我一直踩住熊bear bear個頭，到發現嗰陣，隻公仔半邊面已經扁咗，好似中咗風咁，好在新同事行開咗做嘢，我即刻執起拍返走啲鞋印，再放返上去佢張枱，過咗一個鐘左右新同事返嚟。
「點解佢今日個樣咁嘅……」
我：「係咪公司太嘈呀？佢好似唔開心咁喎！」
「你都覺呀？塊面好似唔對稱。」
我：「可能你今朝擺佢落袋夾到佢變形……」🤣🤣🤣
其實我對於同事玩公仔玩到返公司冇乜異議，都係嗰句，唔影響工作真係無所謂，合約亦冇講明唔可以帶公仔返工，不過有一次我真係忍唔住出聲，因為佢拎埋熊bear bear出去食lunch，當日我哋只不過去茶餐廳啫……
我：「不如你收埋佢先啦！」
「唔係呀，呢度個乾炒牛河好食，我想帶佢嚟影張相擺上IG呀！」
旁邊個侍應聽到眼都突埋，當我哋係異類咁樣，結果呢張熊bear bear乾炒牛河相成功吸到200幾likes，佩服佩服！
你哋接唔接受到同事帶公仔返工仲要同隻公仔傾計？差啲唔記得講，呢個新同事係男仔……