「Gary，可唔可以同你傾兩句？」返咗工一個月多啲嘅新同事煞有介事咁搵我，直覺已經話畀我知佢想resign，咁我作為team head都要處理嘅，趁會議室冇人用，隨即就帶佢入房坐低傾，其實呢位新人工作表現係唔錯㗎，如果能力範圍內可以救得返，確實唔想佢走，你估train人好好玩咩！
問咗句咩事之後，新人就單刀直入：「冇呀……因為我想唔做，但係睇過勞工法例，試用期內嘅第一個月後resign，通知期係不少於7日，想問下係計7個工作天定係點㗎？如果我即刻唔做呢？係咪要賠7日人工？你估我有冇可能即走？早啲講無謂拖住公司吖嘛！」
我：「做得好地地做咩resign呀？唔開心咩？因為我見你學嘢都好快，自私啲諗梗係想你留低啦！出面有其他工作機會？」
「其實唔係幾好意思講，我喺呢度返工之後開始便秘呀！」
雖然冇鏡，但我知道自己當時一定係瞳孔放大，畢竟係女下屬，而我又係男上司，問得太深入又唔係咁好，不過我真係唔明白，便秘同辭職係有咩直接關係？抑或係坊間所講嘅「落台階」，resign唔使同公司講真話，求其作個藉口等大家好做？問題係人事部同老細點都會問我咩事，唔通我同佢哋講新同事便秘？咁L爆？
我：「便秘……係因為工作壓力太大，係咪我畀太多嘢你做，返得個零月工適應唔到？如果係咁，有冇可能傾一傾分工問題？」
「唔係唔係，唔關工作壓力事，呢啲我handle到，但係公司個廁所我handle唔到。」
我：「女廁好污糟？」
「個廁所水力好細呀！我第一日返工開大，沖極都沖唔走，好在有個細水筒可以畀我裝水沖廁，來來回回沖咗幾次，但唔知點解後來個細水筒都冇埋，應該係大廈清潔工拎走咗，所以我唔敢喺公司開大喇，忍住忍住好辛苦，真係便秘呀！」
我：「便秘唔係解屙唔到咩？你有得去都叫便秘？放工返屋企都屙唔到咩？」
「係咁嘅，我習慣咗12點至2點呢段時間開大，一去唔到就冇㗎喇，夜晚返到屋企無論喺廁所坐幾耐都係屙唔到，由細到大習慣咗，結果我而家每逢lunch time前後要落公司樓下個公廁，但真係太污糟太臭喇，頂唔順呀！我都知因為咁嘅原因同你講辭職有啲怪，不過對我嚟講好困擾。」
好耐之前睇過一套電影，裡面有個角色話自己係「住家屎」，即係喺屋企先識得大便，出到去就完全唔得，不過呢位新同事就唔關住唔住家事，佢大便嘅習慣係有時效性，總之12點至2點必定要「解放」，場地反而係其次，無奈公廁太恐怖，長遠接受唔到咁嘅環境。
估唔到我會同下屬喺會議室傾屙屎問題……
我：「其實公司廁所個沖水以前係正常嘅，不過你入嚟做之前一個星期左右，馬桶底條管就漏水，聽講係咩水揼問題，呢啲我唔識啦，淨係知道要擰細個水制，因為扭大就會爆漏啲沖廁水，已經通知咗管理處㗎喇，唔止我哋呢層，樓下兩層都有問題，據我理解下個禮拜有師傅整，唔會永遠都咁樣。」
「真係？」新同事仲要反問我真定假，加人工升職呢啲就話氹住你先啫，整個廁所唔會作個大話呃你嘅。
我：「真，所以呢個問題應該好快解決，定係你辭職有其他原因？」
「冇，冇其他原因，我淨係覺得12點至2點錯過咗唔去，返到屋企又去唔到，一個星期五日咁樣我好辛苦，咁我唔辭職喇，你當我冇問過吖！」
梗係冇問題啦！請人好煩㗎！我完全唔介意佢彈弓手，講完又收返決定唔走，只係冇諗過公司廁所係導火線，講真管理處嘅反應又的確太慢，話晒都係商業大樓，點可能搵個師傅嚟整都要等成個月，據講係因為低層先有呢啲水壓同漏水問題，所以唔係成棟集體投訴，但你都冇理由咁怠慢吖！
我個人就係上面提及嘅「住家屎」，總之唔喺屋企唔會開大（旅行住酒店就另計），所以公司廁所問題並未為我帶嚟困擾，其實有冇人會咁癲為咗公司個廁所而決定唔做一份工？如果唔關水力事，係公司廁所污糟，會唔會影響一個打工仔唔撈呢？