「Eric勁廢喎！上星期問佢拎舊客個報價，到今日都未畀我，再問多次啦，原來佢冇咗回事，其實忍咗好耐冇出聲㗎喇，我入咗嚟都四個半月，發現阿頭佢哋根本冇嘢交畀Eric跟，計時間我仲係新人嚟㗎，點會忙過Eric呢啲舊人㗎！有啲嘢問我仲清楚過問Eric，呢間公司唔炒人㗎咩？」
我：「嘩！你呢啲嘢同我講好喇，唔好畀阿頭聽到呀！真係炒你都未輪到炒Eric，你睇唔到佢嘅貢獻咋，呢度幾乎所有男同事都當Eric神咁拜，你有機會做埋佢嗰份咪執到囉！幾多友仔想同佢搏friend都埋唔到身呀！」好在新同事係向我呻，佢完全唔知Eric咩料。
「皇親國戚呀？」
我：「皇親國戚有貢獻㗎咩？如果有個同事幾乎每個月都送錢畀你使，正確嚟講係每星期一至兩次，咁你覺得佢有冇貢獻吖？」
「做咩咁問？Eric係有錢仔，畀錢同事幫佢做嘢呀？」
我：「你賭唔賭馬先？」
「最憎！」
我：「咁唔怪得啦！如果你有賭開馬仔，你都會當Eric係神咁拜，佢畀料你好過買10份馬經，你知唔知我哋阿頭，仲有隔籬部門啲阿頭，呢度幾個高層老屎忽，就連老細都要問Eric攞料，出糧一個月一次，Eric啲料隨時幫你一個星期出兩次糧。」
其實新同事冇講錯，Eric喺公司廢到離晒譜，除非你想啲工作「炒粉」，否則正常人都唔會畀嘢佢做，更加唔想拍住佢做嘢，不過你又唔好理，聽講Eric屋企唔止一個人係活躍於馬圈，識人幫馬房做嘢之餘，佢阿哥啲老友仲係馬主（邊幾隻就唔方便講，驚影響到人哋），所以幾乎每個賽馬日都有貼士。
公司有兩個WhatsApp大group，一個係official全部同事男男女女有份，基本上冇人講嘢，得啲HR會paste下通告上去，另一個group就叫「馬上瘋」（勁老土個名），係老細特登開嚟拉晒啲賭馬嘅同事入去，清一色全男班，主角就梗係Eric啦！個個等佢畀貼士，又研究點買，呢個group每日嘅訊息量係非常活躍。
Eric每個賽馬日都會畀一至兩隻馬出嚟，非官方統計真係好少唔中，Eric唔係用咩往績或者狀態去分析，佢完全係收風，例如會講明7場2號個馬主今晚準備拉頭馬，已經喺馬會訂晒枱，佢放工之後都要趕入去一齊食飯之類，坦白講我最初聽完都會笑，心諗會唔會吹大咗呀？個個馬主都想入場拉頭馬㗎啦！但Eric畀親呢啲資訊出嚟就好少甩拖，真係唔到你唔服。
咁當然，唔係個個同事收到料都一定贏錢，因為Eric每次賽馬日淨係畀一兩隻馬，點樣買法同埋拖啲咩腳就係閣下嘅事，有唔少人係自己啲腳唔中，最後浪費咗Eric嘅重心貼士而見財化水。
Eric嘅貼士有冷有熱，唔會淨係識得畀啲大熱門名牌，冷嘢佢都中唔少，老細就試過用Eric嘅貼士中過一筆大錢，第二日返到office請晒成班同事lunch time去飲茶，我哋阿頭就試過中幾萬蚊，跟住拎咗啲錢請老婆去旅行。我自己相對上賭得比較細，但都托Eric嘅福，梗會贏到啲飯錢幫補下，數目唔算好多，但點都好過出去搵份part time咁囉！
所以新同事話Eric冇貢獻，咁就睇下佢從咩角度出發喇，公事佢真係冇貢獻㗎，但偏財方面佢好幫到同事，阿頭同班老屎忽錫到佢燶呀！
「妖！你講到佢咁勁就唔使做啦！全職賭馬咪得囉！」新同事條氣仲係唔順。
我：「其實你一開始已經講咗個答案啦！Eric乜都唔識，啲人又唔畀嘢佢做，你唔覺得佢好hea咩？份工又hea又準時出糧，仲要個個都對住佢笑晒咁，點會唔做呀？佢淨係呢度逗份糧賺個賭本，每個月再走去用屋企人啲貼士買馬不知幾爽，暑假冇馬跑又當幫補下，換轉你係佢會唔會辭職唔做？」
新同事跌入沉思模式，隔咗一陣再問我：「通常買馬要幾多成本？可唔可以拉埋我入個group？跟你哋買得唔得？」
屌！🤣🤣
其實office裡面每個人都有自己嘅生存之道，有人嘅賣點係勤力如牛，有人嘅賣點係做嘢醒目圓滑，有人嘅賣點係擦鞋扮矮仔，不過最緊要自己生存到嘅同時，唔好打爛其他人嘅飯碗就得喇！
Eric對其他部門同事嚟講當然受歡迎啦，反而對於我就有啲影響，始終佢唔做嘢，同一個department嘅人係分擔多咗，但我都慣晒，相比之下我更加重視佢啲貼士，因為做多做少人工都係咁，有Eric啲料係幫到手賺外快。
唔知新同事會唔會好快被同化，定係繼續嬲Eric冇貢獻呢？