噚日喺IG分享咗3個單元故事，全部圍繞老闆或上司講過最過份嘅說話，包括迫下屬飲酒，下屬已表明唔飲得，加上個胃有事，點知老闆同佢講：「哦，健康仲緊要過同我飲？飲啦！」另外仲有一單係舊公司冇糧出，老闆叫員工唔好將情緒帶入工作，唔夠錢用就問老豆老母拎住先……
我以為呢啲已經好癲，點知睇完大家嘅留言之後先知「沒有最癲，只有更癲」，所以決定一次過輯錄成為綜合，除咗分唔同場景等你哋睇得更舒服之外，亦會喺每個分享下面列出自己嘅憤怒指數，最高5個🔥，大家睇完不妨留言話我知，邊一個先係你心目中最過份最癲嘅分享。
＊幼教篇
讀者：kayeetse1
我之前做幼教，有個同事未婚懷孕諗住辭職結婚，同校長講辭職唔做，校長同佢講，你咁後生唔好生住，我同你去醫院搵醫生墮胎，仲要扯住佢出門口,嚇到我同事係校長室大哭叫求命。
🔥🔥🔥🔥🔥
讀者：fcrachel.dh
做幼教，老細命令我收工後出席培訓而且無補鐘。「你做老師就有責任出席公司安排嘅培訓」，我嬲到「咁你做校長都有責任安排老師係辦公時間內接受培訓。」老實講，我去聽講座唔緊要，但唔該好聲好氣問我，唔係老馮㗎嘛，又唔係有得補鐘。
🔥🔥
＊白事篇
讀者：bonboncola
件事唔係我，係我阿叔嘅，佢做地盤嘅
當年我阿嫲(佢媽)喺醫院啱啱走，阿叔想請假嚟見阿媽最後一面，佢老細話：人都死咗，又唔會返生，你老母緊要定份工緊要呀？
我叔：dllm，梗係我老母緊要啦！
🔥🔥🔥🔥🔥
讀者：chelzliu
早幾個月有位同事車禍入左ICU，幾日之走左，當時老細話住院嗰幾日唔洗計糧俾佢，因為冇醫生紙，然後AL錢都可以唔洗計俾佢，因為佢short notice，公司唔叫佢賠算係咁..
🔥🔥🔥🔥🔥
＊圍封篇
讀者：cdouble_okie0203
我記得個次疫情，朋友屋企圍封，照樣打返比老闆請假同講比佢知，老闆同佢講：（你自己行落黎唔得，咪跳落黎囉！你唔係又詐病呀？）個朋友喊住同我講完，當佢第二日返到去公司，就即刻辭職，錢都唔要。
🔥🔥🔥
＊Email篇
讀者：reagan918
之前打過份西工，都成9年前，但我到今時今日仲記得個西腦細講過一句顛到無倫嘅說話，就係“我覆咗個email唔代表我睇咗！” 講完佢自己唔笑嗰度好嘢！見佢咁西我做左兩個月即走lol
🔥🔥
＊人工篇
讀者：chow_aoy
發覺自己人工偏低，做Appraisal 嘅時候同個女上司講，希望佢向上頭反映，但係佢竟然同我講「呀xx，做人夠洗咪算囉，食得幾多啫，我就唔會幫你同上面講㗎啦，要講你自己入房講」。
🔥🔥🔥
讀者：intowater_
我而家呢間公司個大佬衰到，成日同我地班細嘅洗腦，話20年前請個xx位返黎都只係20k咋，而家請返同1個位嘅人，個個都寫cv話要28k，我心諗你都幾搞笑 ‘’大佬 你本事而家逗返20年前嘅人工呀笨！‘’
🔥🔥🔥
＊時間篇
讀者：pamchan67
舊老闆：我一日做36個鐘
＃呢個我畀🤣🤣🤣
＊結婚篇
讀者：kammy0909
當年新婚，舊鬼佬老細問我去左邊度蜜月好無玩，我答完佢之後，佢就話再結咪可以再去囉🤬🤬🤬
🔥🔥
＊出口傷人篇
讀者：yingor2211
舊老闆話我遲收工，講邊啲嘢係棘手，佢就話：「你唔講，我以為你係弱智添」。之後個年，我立志要去佢死對頭公司打工，人工再低都要
🔥🔥🔥🔥
＊示愛篇
讀者：dullchai
朋友既故事（要強調真係朋友的，不是我的）
朋友同上司（兩個男人）應酬一枱台灣客，上司俾班客隊貓左，散席後該上司對我朋友講：睇你就好似見返當年我自己，你要俾心機！
朋友正想講多謝，佢上司忽然爆一句：我愛你！
朋友嚇到呆左兼淆哂底，求其講左句：阿頭你飲醉喇，我閃先！
當晚朋友好驚，第一次遇到同性表白，仲諗第二日好唔好辭職唔返工，不過最後佢第二日都係照返工，返到去就好似無事發生過，一切正常，佢就諗可能上司真係醉左亂噏野，唔使太敏感。
如是者正正常常返工個幾月，又要招呼同一班客，上司又俾人隊到醉左，呢次上司又同佢講話鍾意佢，而佢亦認定上司係飲醉酒，所以無理佢，推左佢上司上的士就自己返屋企。同樣情況之後再發生多一次，朋友已經完全免疫，不過亦無回應佢上司。
喺第三次發生完嘅個零星期後，朋友上司捉佢入房傾公事，講完之後朋友正想起身走人，但佢上司忽然爆一句：點解你唔覆我？
朋友問唔覆乜嘢？上司就講：我話鍾意你，點解你無任何反應？
朋友嚇到腦海一片空白，完全O咀俾唔到任何反應。
過左唔知幾耐，佢上司叫佢出返去，佢就即閃，仲要擸嘢即刻返屋企。當晚朋友同佢女友傾點處理，女友叫佢不如唔好做，佢自己思前想後，覺得間公司規模其實都大，應會有唔少機會，所以諗住同佢上司講清楚自己取向唔同，希望大家都係普通上司下屬就算，但佢最估唔到嘅係，第二日返工先知，原來佢上司之前嗰晚收工放低左支票辭職，仲要係完全失蹤嗰隻。
由於好幾個大客都係我朋友直接同佢上司跟，所以嗰班大客就變哂我朋友啲客，無幾耐我朋更升埋上佢上司個位。到今日，朋友都覺得係佢上司俾個位佢上，佢係心存感激既，但絕對唔會以身相許，不過亦無機會講多謝，更重要既係，朋友見呢啲飲酒客前一定會食定解酒丸。
呢個我畀❤️❤️❤️
＊禽獸上司篇
讀者：irismuscle
- 新同事黎公司之前同對上一份工有一年gap year，禽獸上司問佢點解有一年冇做野，個同事話佢老豆身體不適所以佢要返大陸幫手搞老豆盤家族生意。點知禽獸上司問個同事：咁你老豆會唔會遲D又有咩事你又要返去幫手?!🤯
- 禽獸上司極高壓管治手段導致同事塊面生蛇，同事病假期間仍然被禽獸上司chur佢在家中工作，仲要開會時當眾講「點解突然會生蛇呀？係咪食錯野呀？太大壓力？哼(冷笑)」😤
- 再次係同一個禽獸上司極高壓管治手段導致另一個同事心口痛要即時入院做手術，禽獸上司同個中層同事講「都無得唔放(病假)俾佢啦!佢呢啲年紀係多病痛架喇」🤬該同事手術後返公司，個禽獸上司話「係咪食錯野呀？」(又關食錯野事🤷🏻♀️)仲話「你返嚟快啲pick up返啲工作，你病假期間搞到其他同事好大workload」🙄
不能盡錄⋯⋯
🔥🔥🔥🔥
＊大細超篇
讀者：tong2win
在公司，老闆叫我落街買食物，是限時供應的，我去等lift ，老闆加多句：「就夠鐘，你跑過去。」
我：「我跑得唔快…..」
老闆旁的愛將說：「我去啦，我跑得快。」
老闆對愛將說：「我唔想你去跑，我唔想你仆街。」
🔥🔥🔥🔥