「有冇聽過時間旅人？」男同事Derek話多謝我喺公事上嘅幫忙，一星期前約實我去廟街食煲仔飯，期間佢解釋乜嘢係時間旅人：「即係好似尋秦記裡面個古天樂咁樣，返咗去以前嘅世界，其實我哋耐唔耐都會見到有人預言未來嘅事，日本嗰單有冇聽過？」因為個煲仔飯未到，我繼續聽佢講。
「有人預言2024年日本發生大事，呢件事會令到全世界嘅人都唔想移居日本，嗰個人之前已經預言到311，其實佢並唔係咩先知，只不過係未來人，時光倒流嚟咗呢度，如果話你知我都係，你一定會覺得匪夷所思係咪？」
我：「日本呢單真係未聽過，會發生咩大事呢？」
Derek：「唔講得㗎，嗰個未來人只可以畀暗示，因為明示就會令到人類大規模流動，會擾亂秩序。」
我：「咁你唔係未來人咩？而家咪2024囉！你淨係話畀我一個知咩事咪得囉！」
Derek：「只可以講係地震或者金仔射核彈呢啲天災人禍，問你一個問題，有冇試過睇到一個眼前嘅景像，突然覺得曾經發生過、見過、出現過，你又好肯定自己係第一次身歷其境，好奇怪，好似有個動作已經喺之前做過，又重溫返，而你係冇記憶。」
我：「你講嘢好玄！」
Derek：「咁就係因為有時間旅人，有啲人從未來返咗嚟，時間又再重複一次，所以你會有啲感覺好似係試過，有啲地方好似係去過，但偏偏講唔出，呢啲就係時光倒流殘餘落嚟嘅記憶碎片，一般人唔知咩事，唔識得解釋，淨係覺得怪怪地。」
我：「咁你由未來返嚟，仲知道啲咩？」
Derek：「講出嚟唔好嚇親，我同你本來係一對，去到談婚論嫁嘅地步，但因為我做錯事，所以同你結唔成婚，而家時光倒流返嚟，我就係想阻止呢個遺憾……我明白好難相信，你消化下先啦！如果你覺得係吹水，我唔會怪你，太過天馬行空喇！」
我：「咁你咪知道下期六合彩開咩number囉？你哋呢啲時間旅人咪個個都發達？」
Derek：「唔會㗎！因為時光倒流都係伴隨返自己嘅記憶，我之前都冇背到六合彩開咩number，所以係唔會記得，再開十期都唔會買中，除非個時間旅人刻意背咗，但我深信每一個時間旅人，喺回到過去之前都唔會知道自己可以穿越。」
佢講完之後，煲仔飯就到喇，本身已經轉咗去其他話題，點知臨走時Derek好直接咁同我講：「你可唔可以做返我女朋友？Sorry，咁講係有啲奇怪，做返我女朋友……因為你嘅記憶係冇發生過，得我一個人記得，我轉個方法問，你可唔可以做我女朋友？」
我：「唔可以，因為我有男朋友㗎喇！」
Derek：「我知，不過你之後都會同佢分手，呢個男仔唔會係你真命天子。」
我：「總之今晚多謝你餐飯，聽日公司見。」
不如問下意見先，有冇人相信呢個世界有時間旅人？Derek講嗰幾句係好中～～有啲感覺好似係試過，有啲地方好似係去過，但偏偏講唔出～～
我個人係相信有時間旅人，冇咩係冇可能，正如我都相信有外星人，宇宙咁大，又點會淨係得地球有人居住呢？如果係一個天真爛漫嘅女仔，呢晚可能已經畀Derek追到手，好可惜，一個星期前發生咗件事。
Derek係一個星期前約我，後來有個女同事又約我放工行街食飯，咁我就直接話一早約咗Derek，點知附近啲女同事聽到即刻停晒手唔做嘢，個個圍埋嚟討論：「原來Derek最新目標係你！」
「咁佢一定會同你講自己係從未來穿越過嚟。」
「唔止，仲肯定會話以前爭啲同你結婚，咩原本係一對之類嘅說話。」
幾個女同事七嘴八舌，我好辛苦先有機會插入嚟問一句：「咩穿越？佢唔係想追我啦，Derek話上次張單好在我幫手搵到個船期，最後先至唔使個客寄飛機，我有男朋友㗎！咪搞呢啲嘢啦！」
原來Derek以前都先後追過5至6位女同事，對住每個都講自己係時間旅人，而且個個都係佢前女友、未婚妻，甚至係已經結埋婚，最終佢唔識得珍惜同埋做錯事，結果導致分手……照咁講，Derek未來世界嘅舊愛都齊集晒喺呢個office喎！
由於吹得太大，之前幾位畀佢追過嘅女同事都當笑話咁私下分享，仲互相叮囑要小心Derek嘅甜言蜜語，所以喺Derek同我講佢係時間旅人之前，我已經知道佢係時間旅人，我亦喺Derek未講之前，一早知自己係佢嘅未婚妻…
我：「不過Derek今次多咗啲創意，佢話2024日本會發生大事，搞到所有人唔想再移居過去。」
有個女同事答：「挑！佢肯定係睇咗《老高與小茉 》啦，有YouTuber講過呢單嘢！」
咁Derek啲套路會update下，都係一件好事嚟嘅。
其實我真係信有時間旅人㗎，只係更加相信，呢個人唔會係Derek之嘛！追女仔正正經經咪得囉，咁樣咪更加嚇走人，何況一間公司有幾大啫，可唔可以轉下故事內容呀？