上星期in咗個求職者覺得唔錯，除咗傳統嘅見工問題同埋過程之外，我同呢個女仔都好好傾，佢仲分享自己喺上嚟我哋嗰度之前，已經in咗另一份工兩round，不過就冇乜興趣，原因竟然係工作環境同配備太好，我最初唔明，乜有人會嫌公司硬件太好㗎咩？
呢位求職者話，上到嗰間公司嘅時候，有部電視播緊Spider Man，但唔係真人電影，而係一啲game嘅畫面，然後個HR介紹有PS5供同事玩樂，全天候開住機，鍾意幾時打都得，側邊有個雪櫃，裡面啲嘢係任飲，HR講完之後就隨手拎咗罐紅牛同埋檸檬茶畀佢揀。
我聽完之後忍唔住講：「嘩，正喎，我哋公司都有茶包嘅，香片壽眉齊晒。」
求職者：「嗰間公司都有呀，個HR唔知係show off定係點呢？強調佢哋啲茶全部係TWG同埋FORTNUM & MASON，嗰陣行緊去meeting room，都未正式interview，佢已經帶我參觀pantry，上面一排廚櫃擺滿晒零食，我眼見有薯片、紫菜、百力滋、果乾，連微熱山丘同埋海邊走走蛋捲都有。」
我：「微熱山丘同埋海邊走走會過期㗎喎！」
求職者：「係囉，唔知佢哋係咪online訂返嚟呢！」
我：「咁呢間公司都唔錯吖，玩嘅又有，食嘅又有。」我係咪唔應該讚人哋呢，好似間接貶低自己公司咁。
求職者：「跟住有張桌球枱，好大張，我哋行入meeting room之前要兜過去，另外仲有兩部跑步機。」
我：「羨慕，好似隔籬飯香咁，人哋公司永遠係好啲，咁你見完兩round進展如何？肯定好鍾意啦！我呢邊in完最快要下星期先知決定。」
求職者：「佢哋都唔一定請我，不過認真講句，我麻麻地嗰間公司，有啲細節位睇得出其實唔係太理想。」
我：「又PS5又TWG又有得篤波都麻麻？」
求職者：「都冇人玩嘅，其實有呢啲設施，某程度上反映咗佢哋有返工冇收工，可能正常社交都係喺公司裡面，普通公司係做完嘢嗱嗱聲走，出去見自己啲朋友，同自己啲朋友玩，仲得閒留低同你隔籬位甚至係你上司打機篤波咩！仲有，嗰啲零食多到……好似係為咗OT而準備，我唔需要呢啲門面嘢，總之9點返工，做完嘢就走，然後準時出糧，要娛樂我會喺放工之後去街，唔會留喺office玩囉！」
又好似係喎，其實我親大佬之前任職某傳媒機構，啲設施仲勁，而佢做咗4年，一次都冇使用過。
我大佬做嗰間公司位於工業村，地方大，成棟都係佢哋，裡面有泳池同籃球場，聽講連桑拿都有，呢啲全部冇花冇假，不過有次我問大佬係咪好正，佢答我：「我未用過，邊有時間吖，有時放工已經好攰，仲留喺公司游水打籃球咩，出返市區同friend打邊爐好過啦！」
大佬都有補充，話公司有呢啲資源好正，但真係用嘅同事唔多，至少佢部門啲人都係咁上下。
至於我而家呢間公司，同事之間其實比較疏離，唔係關係差，但絕對唔會約埋一齊行街食飯，基本上個個夠6點即走，如果你畀我揀可以準時收工，抑或office有PS5同桌球枱提供……咁我揀前者。
今朝我打咗畀呢位求職者喇，佢最終揀咗我哋，可能係另一間根本冇出offer畀佢啦🤣，但如果呢位求職者係追求準時放工唔使OT，唔需要咁多娛樂嘢，咁我哋公司一定啱佢。
其實有得打機打波同埋無限零食供應並唔係壞事，香港仲有好多公司係冇以上娛樂設施，但就日日要你OT，呢種咪仲慘。(完）