平均一個月一次，每年就12次左右啦，咁上下時候我老豆老母就會講呢句：「你搵過第二份工啦！做咗咁多年都係得15000蚊，點儲錢呀？你睇下黃太個仔，遲過你出身，人工都高你咁多，我都唔明你諗咩！」有時佢哋會用黃太個仔做例子，有時就表哥表弟，有時係唔知咩親戚，香港父母通病，係要用啲仔女同人比較。
老豆老母又唔係完全冇道理，而家份工我做咗8年零4個月，最初人工係一萬頭，而家都係得15000，得12個人嘅細公司，你可以話老細出手低，但喺度做咗咁多年，佢賺幾多其實心中有數，老細唔係唔想加，只係可以加嘅空間太有限，特別係疫情期間流失好多客，未執已經當贏喇！
前途呢……就真係冇㗎喇，但我喺呢間公司搵到自由，仲有可以自己操控嘅腳步同節奏。
上個月有個friend搞event，臨急臨忙要人幫手，office hour，一連三日，我照直同老細講，佢答我：「你咪去囉！搞掂啲嘢就得㗎啦！有急事聽唔聽到電話㗎？」
我答佢得，但其實嗰三日裡面佢係冇搵過我，而呢三日公司仲要冇扣我任何假，人工照畀。
前年我要進修，搭正6點放工會趕唔切，同公司申請每星期有兩至三日會早走，老細完全冇問題，4點幾已經叫我快啲走，仲叮囑我要食啲嘢先好上堂。
有個女同事，前幾個月屋企個菲律賓姐姐不辭而別，佢手忙腳亂每日都要請半日假去湊仔，老細直頭叫佢唔好咁麻煩，order佢work from home直至搵到新嘅姐姐為止。
仲有另一個女同事就因為奶奶入醫院，冇人照顧個女，結果老細叫佢接個女嚟公司溫書做功課，然後又畀佢兩母女早走，等佢哋可以每日去醫院探下老人家，咁都未算，老細個老婆更加煲埋湯，拎畀呢個女同事攞去畀個奶奶飲。
另外有個男同事一直有兼職做online business，用咗公司做收件地址，搭正晏晝3點就會出去附近郵局寄貨，老細係默許。
好多嘢都好自由，咁係咪完全冇人辭職呢？梗係有啦！不過唔算多，2024年而家去到8月，公司暫時冇人走，仲係原班人馬，上年就走咗兩個，疫情期間又係冇人走，所以身邊呢班同事都對咗好多年喇！大家互相都知道人工唔多，大家亦知道個待遇係邊個水平，你可以話留得低嘅都係貪圖安逸同埋冇乜大志嘅人，呢一點我自己都承認。
有個同事曾經走過㗎！佢嗰次就有啲癲，原因都係嫌人工低啦！所以就暗地裡去見工，始終公司請假可以話係唔需要理由，出去interview的確好方便，嗰次個同事見成咗，直頭返埋新工，但最終唔慣，所以又疊埋心水留低做。
老細好到畀個同事食回頭草？唔係呀！個同事返另一份工嘅時候係冇同老細講，亦都冇辭職，佢同公司請咗3日假，變相呢3日係食緊兩家茶禮。
呢位同事坦承自己知自己事，喺呢間公司太自由喇，出到去好難再適應，但又好想試一試，更加諗定如果handle得到，就算賠一個月人工畀我哋老細都心甘命抵，好在佢識咁諗咋，結果出去「偷跳」兩日已經頂唔順，第3日直頭銷假，即係另一邊提早辭職，當乜事都冇發生過繼續返而家呢份工。
唔知點解我硬係覺得老細根本就知，只係佢唔出聲踢爆個同事。
曾經諗過一個問題，究竟老細係自知出手太低，所以畀咁大自由度我哋，抑或佢本身性格就係咁，同人工高低冇關係呢？
不過有一樣嘢真係要讚自己同埋成班同事，有時一間公司太寬鬆，就梗有啲人會做壞規矩，例如係唔係都請假，係唔係都早走，而呢度班同事就會有種無形嘅共識，真係唔需要講明，總之大家識做，所以我做咗咁多年都未見過有「不愉快事件」發生，個個都係見好就收，唔會玩爛，同埋絕對唔會方便自己而留低蘇州屎畀同事follow，太有默契喇！如果要數最過份嘅一個case，相信已經係頭先「食兩家茶禮」嗰位同事，但我明白佢心路歷程，如果你叫我再出去返第二份工，我都一定會唔習慣。
我都有考慮過轉工嘅，始終自己都三十幾歲，15000蚊真係好勉強，老細行過我都照開住求職網，有次佢見到仲問返我：「點呀？出面個市點呀？難唔難搵工？」
我仲要答佢：「麻麻地啦！Send咗幾份都冇回音，繼續幫你做囉！」
老細又回應：「好！你咪做到搵到第二份囉！我梗歡迎㗎！」
嘩！個老細心胸咁廣闊，我都唔知講咩好喇，其實我望公司搵多啲錢同生意，賺多啲然後加人工，好過我哋再出去搵工，雖然呢個可能性真係唔大，唔知我會唔會喺度做一世呢？