其實我兩星期前已經請定假，因為book咗10月13號去睇牙，前兩日聽到又有颱風嗰陣心大心細，噚日一度想銷假，不過天文台最初話13號清晨前會改發3號風球，咁我咪算囉！
點知今朝起身仲係掛緊8號，天文台又改咗話下晝先改掛更低嘅風球，當時喺度諗：「咁我請咗假咪好唔抵囉？勞工法例有冇話請假當日撞正8號風球或者黑雨，可以唔計放假呢？因為咁嘅天氣情況之下，本身係唔需要返工㗎嘛。」
諗多兩諗，公司個WhatsApp group已經好熱鬧咁講緊公事，有啲senior同事主動call大家meeting，呢個時候我上司喺WhatsApp group講咗句：「Freeman今日請咗假，唔好拉埋佢入嚟開會啦！」
當時我都十五十六，既然上司已經咁講，我就唔搭嘴啦，因為公開喺個group度講8號風球想銷假又好似唔係幾恰當。
過多一陣，手提電話又不斷彈出email，原來就算8號風球都好，我有好多客依然喺屋企做緊公事，而家唔係講緊一個半個客，係幾個客同埋我班同事都係咁。
由於我噚日已經喺公司set咗email auto reply，有啲客見到我放假嘅message，又自己走去contact幫我follow嘅同事，我同事又真係走去覆佢，睇住佢哋來回好多次不斷send email溝通，仲忙過平時，WhatsApp group內部又有自己友不斷傾嘢，傾傾下更加提議開視像，好癲呀！
雖然大家知我今日拎咗假，所有公事、email、仲有meeting都冇畀我參與，但係感覺依然好唏噓，唔知係個社會變咗吖，定係work from home呢樣嘢已經成為潮流呢？我記得以前香港打風就真係放假，當年舊公司有班好貪玩嘅同事，打風唔使返工咪約出嚟打麻雀唱K食嘢囉，當年真係有風假，而家就冇咗呢種氣氛喇，8號波又好，黑雨又好，龍捲風都好啦，總之你屋企有電腦都要繼續做。
平時正常返工喺office，食lunch就係食lunch，成班同事會放低工作行出去食飯，有時等位又或者行一陣街先返公司，其實都唔止食一個鐘，反而今日打風變相work from home，我見大家連lunch time都冇埋，好似全天候都透過電話電腦做嘢。
我班客又係一樣，不斷有email send嚟，幾間公司都係咁，個個打風依然喺屋企未停過手。
好多人都會鬧「港豬、港豬」，又或者揶揄幾句香港人真係好鍾意返工，其實唔使下下都Blame the Victim，有時不在其位，批評人哋係好容易，身在其中，你又會發現有時真係身不由己。
後來我都冇諗銷假喇，因為同事們講工作直至呢一刻都未停過，我因為一早拎咗假而全程唔使參與，當係休息一天囉，仲未計聽日紅日，應該係休息兩天，偷得浮生「兩」日閒，當畀自己唞唞啦！
投稿讀者：Freeman