我真係好憎食苦瓜。
星期日去一個朋友屋企，因為佢抖咗足足一年終於搵到新工，所以我哋決定食餐飯，由佢親自下廚。
幾年前我都上過嚟，當時係佢老婆負責煮，碟碟餸都好食，我係唔食嗰碟苦瓜炒牛肉啫，我呢位朋友嗰陣咁講：「食啦！有益架！我成日叫老婆煮，仲入埋廚房偷師，好易煮架咋！你平時自己整都得。」
今日呢碟係我朋友親手煮，佢話每次都會企喺隔離睇，做法係先切好苦瓜，再將牛肉切片，跟手切薑絲，乾鑊將切好嘅苦瓜倒落去，細火畀鹽炒下，炒到轉色，撈返起苦瓜，落油炒牛肉直至轉色，再將苦瓜放落去一齊兜，咁上下再落鹽同少少生抽，炒一炒搞掂。
呢碟苦瓜炒牛肉，我最初都係堅持唔食，然後我朋友食咗一啖，連自己都話唔掂，一直以為好容易，照足步驟去煮，點知都係唔得，不過我冇得比較，因為佢老婆一年前已經因病離世。
佢老婆臨走前幾日，喺醫院同佢傾計嗰陣問過一句：「我走咗你想食苦瓜炒牛肉點算？」我朋友答：「成日偷師，我自己而家都識煮，唔使擔心，你好返我可以煮畀你食。」其實我朋友真係想等老婆好返之後親手煮一餐，奈何已經冇呢個機會。
同一樣嘅材料，同一樣嘅先後次序，佢慨嘆咁話：「原來老婆煮同我煮可以差咁遠。」
我話：「分別唔係味道，係人啫！證明你仲好掛住佢。」
鑑於當時嘅氣氛，我頂硬上食咗一嚿牛肉，已經避開苦瓜，不過啲味道仲係好甘好濃，搞到我連筷子都換埋，我直接講：「嘩！唔好食呀喂！」唔怕得罪呢位朋友，係因為我講過更大膽嘅說話，當時佢冇嬲，呢句應該都唔會嬲。
老婆過咗身之後，我呢位朋友一直意志消沉，辭咗份工，晚晚飲酒，又唔搵嘢做，完全冇晒方向，我明白需要時間走出陰霾同復元，但唔係無了期，佢已經開始要借錢度日，然後我whatsapp寫咗段字：「借畀你唔係問題，唔還都唔係問題，問題係你浪費嘅今日，係你老婆好努力都經歷唔到嘅明日，而你浪費緊嘅今日，亦將會係你永遠都返唔到去嘅昨日，你老婆喺天上面都唔想見到你咁樣。」
通常好hea嘅時候，我都會用呢番說話去鞭策自己，冇諗過要用嚟話朋友。還好佢冇嬲我，又真係走咗去搵工，最近終於有新工作，開始新嘅一頁。
希望我哋都對得住自己嘅今日，昨日，同埋明日，不過，我都係唔會食苦瓜。