「你瞓低，我服侍你，鍾唔鍾意我咁樣著呀？以後唔准你喺公司同其他女仔傾計，望佢哋都唔得，我妒忌，最多我日日著黑絲畀你睇，聽晒你話。」全公司最索嘅秘書Evelyn同我喺床上纏綿，佢一路除外套，一路以女上男下嘅姿勢騎喺我身上，仲要烏低身準備同我kiss，就喺呢個緊張關頭，忽然聽到我老母咆哮。
「起身喇！幾多點呀？講極都係咁，噚晚見到你間房成兩點幾仲著燈，朝朝叫你幾次，我都好忙㗎！你個死人電話掟落街啦！整十幾個鬧鐘都叫唔醒你，但係全屋人就醒晒，你究竟想點啫？咁大個人生性啲啦！」原來Evelyn騎上我個身只係春夢，老母咆哮先係真實。
雖然老母鬧得我好啱，手提電話嘅鬧鐘我會set 6至7個，由7:00響到7:30，但係冇一次可以成功叫醒我，相反屋企人就全部叫醒晒，不過我都嬲咗老母成日，如果唔係佢咁樣咆哮，肯定Evelyn已經錫咗落嚟，甚至會有進一步嘅「深入發展」，我老母監生鬧走Evelyn，你話抵唔抵嬲？
發春夢見到女同事唔係第一次，最近一次真係搞埋，夢裡面我同公司個會計上床，成個過程同埋夢境都好細緻，有前戲，有最緊要嘅部分，連事後煙嘅情節都有，點解呢次老母唔及時叫醒我呢？公司個會計已經50幾歲，我得廿幾歲，雖然只係發夢，但我記到而家，每次喺公司搵佢claim錢都周身唔自在。
入咗嚟呢間公司半年，不斷keep住夢見同事，初時比較疏落，可能一個月先至一次，但早排就變得好頻密，幾乎隔晚就會夢到，而其實春夢total得兩次，相反惡夢就無數次，最驚嚇嗰次係我殺咗直屬上司，冇過程，個夢一開始嘅背景就係我知自己殺咗人，你都明啦，發夢有時係可以好無厘頭。
得悉自己殺咗上司，我喺夢裡面唯有著草，瘋狂躲避警察嘅追截，街頭暴走完，跑跑下又穿過啲蘆葦草，最終都係被人繩之於法，忘記咗判幾多年監喇，淨係記得佢哋困咗我喺間好細好細嘅房裡面，一直戴住手扣，個空間只夠我坐，起身行一步都冇位，我好驚，唔知點算，好在係發夢，起身後滿頭大汗。
夢境全部都係虛幻同超現實，講得太多怕天馬行空，簡單綜合一下其他涉及同事嘅夢，試過夢見同事一個人OT，我走先然後佢鬧我冇義氣，又試過夢見自己同一大棚人OT，但係夢境裡面啲同事得幾個係真實，另外嗰啲見都未見過，更加試過夢見全部人升職，唯獨我繼續做散仔……總之呢半年起碼有20至30個夢係夢見同事，好誇張。
同啲朋友講，佢哋話我可能工作壓力太大，that’s why我晚晚煲劇打機減壓，然後畀老母剷到我上天花板，鬧我夜瞓，結果有個friend提議我搵夢境分析師。坦白講，動物傳心師我就知，夢境分析師真係未聽過，無論如何，為咗解開不斷夢見公司同事呢個謎，我最後真係去咗，用咗成千蚊！
貴係貴啲，但係嗰位夢境分析師都幾pro，陰影最大嘅夢係殺上司然後坐監，佢話被鎖上手扣代表份工限制咗我發揮，而且做嘢方面有好多制肘……中喎！的而且確，呢個解說同我現實境況好吻合，最安心係聽到夢境分析師講，原來發夢坐監唔一定係負面。
夢見殺咗上司或者係長輩級人馬，某程度上係表示我嘅工作能力會得到賞識，有重新出發嘅契機，假設見埋血，仲有機會加薪，雖然我唔明白係咩關聯先會得出咁嘅結論，不過都承佢貴言啦！因為聽返朋友講，解夢除咗有心理學嘅元素，其實都包含埋中國古代一啲解夢理論。
至於夢見同同事搞嘢，原來唔代表我係對呢個異性有好感，夢境分析師話我可能潛意識羨慕嗰位同事有某種專長同技能，嗱！呢樣講得通呀！50幾歲嗰位會計阿姐，小弟對佢完全冇非份之想，不過就好欣賞佢claim錢爽手，而且心算好準，試過隊十幾張單埋去，呢位會計阿姐一路同人講嘢一路準確咁計到條數，我自己數學最差，羨慕佢有呢種技能並唔出奇！
其實瞓覺發夢根本係一件好平常嘅事，奇就奇在點解短期內接二連三不斷夢到同事啫！將我睇夢境分析師單嘢同老母講，佢又喺度咆哮，話我使埋啲無謂錢聽人亂作一通，我又唔係咁睇喎！
據我所知，有專業資格嘅夢境分析師喺香港絕對唔多，人哋真係讀好多書考個註冊返嚟，而且全部嘢都可以引經據典，你估係動物傳心師靠感應，話自己係就係咩！何況好多嘢都係求個安心，大佬！冧友喎！驚㗎嘛！
我以為自己睇一次夢境分析師就夠，始終費用唔算平，點知上星期我又發咗個夢，冇前文後理，個夢一開始已經係老細從後攬住我（老細係男人，我都係男人），再推我落張床度，我問佢做咩？老細又反問我想唔想加人工？我叫佢死L開，點知佢更加大力唔畀我反抗，好在又係老母喺危急關頭叫醒我，不過最邪係發完呢個夢之後返工，老細無啦啦行埋嚟我個位講：「嘩，早排夢見你喎！」
以為大家發埋同一個BL夢，好在唔係邪到咁個地步，因為我未及反應開口問個夢境，老細已經自己講埋出嚟：「喺個夢裡面我炒咗你，然後你好嬲話要去機電署，發夢真係九唔搭八，炒人唔係應該去勞工處咩？無啦啦去咩機電署？」然後老細笑咗兩聲就行開。
唉！我而家又想再搵個夢境分析師make appointment喇，唔係驚老細炒，而係兩個人短時間內分別夢見對方，呢啲case又可以點讀解？非常不安呀！有冇朋友都試過畀錢睇夢境分析師？可唔可以畀少少意見呀？（完）