「我想問下幾時有拖拍？」

朋友之前話介紹單生意畀我，唔係headhunt生意，係辦公室日報廣告，我問係咩product同埋咩brand，佢話兩樣都唔係，係家姐開咗檔塔羅，不過生意淡薄，接觸唔到新客，舊客又冇乜回頭，所以想宣傳下。

我對此表示無能為力，雖然小弟有個名叫「宣傳聶」，但平台唔適合真係冇辦法，不如我用行動支持下佢家姐啦，真金白銀幫襯一次咪仲好。

適逢上次叫我去speed dating嗰條恐怖份子冇嘢做，又話要落bar，又話要download交友app，咁我有決定喇，就同佢去睇朋友家姐檔塔羅啦！一個睇愛情運，一個有錢搵，雙贏。

恐怖份子：「我想問下幾時有拖拍？」

朋友家姐：「唔……呢張牌……今年應該難啲呀。」

恐怖份子：「吓，咁其實塔羅係咪只可以占卜，唔可以做啲嘢催旺桃花？好似好絕望咁喎。」

朋友家姐：「又唔係嘅，下年啦。」

恐怖份子：「下年……都好啦。」

朋友家姐：「下年你就慣㗎喇。」

😂😂😂

我終於明白點解朋友家姐冇生意，其實佢幾準㗎，係表達得太直啫！