「喂，你轉咗工未？有份HR淨係負責做recruitment，其他C&B、Payroll，同埋Training都唔關你事，有冇興趣？」
「未轉呀，今年都應該唔轉喇，雖然辛苦，但做得幾開心。」
我呢個朋友一年前搵到佢而家份工，未過試用期已經話好辛苦，因為除咗香港呢邊之外，連公司深圳office請人都關佢事，當日佢連五險一金係乜都未知，而除咗請人，仲要兼顧埋員工Training，公司年中訂制月曆送畀客，佢都要負責搵生產商、格價、對稿，所有大大細細同濕濕碎碎嘅工作都關佢事，成個HR department得兩丁友。
佢試過辭職兩次，都被老細用加薪成功挽留，加嘅幅度好大，以我所知其中一次加3,000，另一次我就冇問，就當佢係1,000，新入職一年內加4,000都正啦！
即使最後做唔長，拎住mark up咗4,000嘅last salary去見一份新工，叫價都可以叫高啲。不過我呢位朋友近幾個月又真係冇再提轉工，仲走去報名讀一啲HR課程，當中包括內地勞動法同稅制。
佢補充：「我老細話，一個員工走，又要出ad又要interview又要再教，個成本好大，加我兩次人工，仲平過畀headhunt份佣金好多，而作為員工嘅我又會開心。佢話喎，人工畀得起，唔刻薄同事，唔係人才都可以變人才，相反地，作為老細如果唔肯畀錢，又要求多多，幾好嘅人才都會變庸才！」
其實我都係庸才，好想搵個肯用錢激發我成為人才嘅老細，如果個個老細都識咁諗就好喇！