我唔識寫作，可以簡單描述成件事嗎？因為有個朋友生BB放產假，佢公司本來請咗個temp，點知好似話no show冇返，搞完一大輪之後，呢位朋友知我冇返工就打嚟問：「可唔可以幫我頂兩個月呀？公司急要人，我知你做慣少奶奶，咪當賺錢買花戴囉，又唔係長工。」
一時心軟，又啱啱買咗個袋，賺返幾個月錢都好。其實一早知道朋友呢間係國企，但佢話唔算，講真我都唔識點分，個名雖然未聽過，不過幾廿人公司，有超過一半以上嘅人淨係識講普通話，所以都係嗰啲嘢啦！唔理喇，求其做兩個月賺返個袋錢就算。
第一日返工嘅朝早我已經畀人鬧，話說佢哋要我開個WeChat，都算喇，加我入群組，跟住有個經理打咗句message tag埋我講：「你冇中文名㗎？我哋呢度唔用英文名，你即刻改返個名做中文！」
其實我好嬲㗎，如果呢份工係我自己搵，當時一定反駁同埋唔做，不過我係暫代個friend，孭住朋友個名，如果我一嚟就搞到咁不愉快，真心驚佢會難做，結果我死死地氣改返個中文名。
然後好多時我係睇唔明佢哋啲用字，你哋知唔知咩係「杠都」？「intj」呢？
唔記得講，呢班淨係識講普通話嘅同事，講咩都好鍾意加個「賊」字，例如「賊開心」、「賊忙」、「賊好吃」、「賊睏」、「賊甜」、「賊無語」，唔係咩都要反大陸，但乜嘢都賊賊賊，真係好難聽呀！
同埋佢哋有時講啲英文又係好奇怪，例如手機應用程式我哋叫App，係成個字讀出嚟，佢哋唔係㗎，會三個英文字分開讀A-P-P，有一次個經理叫我做個A-P-P，問題係……我做會計喎，你叫我做App？先生，就算大家唔同鄉下啫，但你係咪有咩誤會呀？寫App你搵IT啦！幫你洗埋廁所好唔好？
我：「做A-P-P？」
經理：「係呀，下班之前給我。」佢用普通話，我都係照打返出嚟。
我思考咗一陣，又諗返前文後理同手上嘅工作……
我：「你是不是要我交Ppt？」我都唔想將PowerPoint講成Ppt，但我驚講PowerPoint佢會唔明。
經理：「對對對，Ppt才對！」
妖！你打開個窗跳落去啦！獻世咩，已經A-P-P，仲要連Ppt同A-P-P都撈亂！唔識就google啦……呀，佢哋真係唔用google，我聽過有同事講「百度一下」，唉，真係搞唔掂！
文化完全融入唔到，同埋我啲普通話都係馬馬虎虎，而呢班同事所講嘅普通話係捲晒脷嗰種，我冇問佢哋鄉下喺邊，不過相信都好「北」，基本上我好多時係聽唔明佢哋講乜，要好留心好留心先叫做勉強聽到。
其實我返咗幾日工已經同個朋友講頂唔住，你當我冇義氣又好，咩都好啦！同呢班人夾唔到呀！個friend係咁叫我試多陣，結果我留下一日，留下又一日，咁就3個星期，然後有一次開會，個經理用捲脷北佬音向我講一大輪嘢，喂！我聽唔掂㗎！一陣做錯咗又要畀你鬧，所以就客客氣氣回應佢：「對不起，再說一次。」
經理都係用捲脷北佬音覆述，頂佢個肺語速仲快咗，當時我旁邊咁啱有一位真．香港同事，情急之下我望住真．香港同事講：「翻譯翻譯！」
估唔到呢句「翻譯翻譯！」竟然觸動咗經理唔知邊條神經，佢抽起成份工作唔使我做，同日放工嗌我唔使再返……
嘩！我多謝你都嚟唔切，而家你炒我，唔係我唔撈呀，當晚返到屋企都要同個friend交代一聲，原來佢已經第一時間知道咗，經理話我唔尊重佢，明明講緊中文都要叫人「翻譯」！話我冇禮貌。
喂，點唔尊重你，點樣冇禮貌呀，聽唔明咪搵人「翻譯」囉！咁都嬲？是但啦！反正呢個結局求不之不得，雖然朋友口口聲聲話呢間唔算國企，anyway，總之唔啱我做。(完)
呢幾日咁多篇文，你哋有冇睇漏㗎！🤣
同事有社交恐懼癌辭職100%斷捨離
https://hkofficedaily.com/?p=25147
上司離職 HR走埋自己大佬要自己請
https://hkofficedaily.com/?p=25143
被解僱性格大變時光倒流都會炒佢
https://hkofficedaily.com/?p=25139
三個月叫我見一次工拒絕藉口次次唔同
https://hkofficedaily.com/?p=25151
同事老婆做保險疲勞轟炸人都癲
https://hkofficedaily.com/?p=25802