話說我上司搵到份筍工所以辭職，公司按道理要請返個人代佢，但係呢個時候撞正HR放產假，由於人事部得一個人負責做招聘，咁就唔爭在等多陣啦，結果我上司個位懸空咗一段時間之後，HR生完BB又話唔做喇，所以老細就同我講：「唔好等喇，你自己請返個大佬先！」
老細意思係叫我請返個上司畀自己，由於HR都冇人，所以我自己負責出招聘廣告，自己睇CV，自己見埋，個感覺真係好特別，冇諗過我會有機會in未來上司，而請唔請嘅決定權仲要喺我手上，唔知點解覺得成件事相當刺激！
冇HR都可以搵headhunt公司幫手㗎啫！鬼唔知咩！但我老細唔願意畀嗰啲佣金吖嘛，佢覺得貴喎！
如是者我就做埋HR嗰份，但只係限於請我未來大佬呢個position，為咗嗱嗱聲搞掂，我先後約咗5個人上嚟見工，第一個非常猛料，就咁睇CV真係學歷同經驗都超晒班，可能有料嘅人氣場特別唔同，interview傾咗幾句，呢個人就問：「請問我個department有幾多人？我應該under邊個？有冇機會見埋呢個人？」
我：「Department有5個人，包括我，你係部門最大㗎喇！」
「我最大？即係你都係under我？」
我答完「係」，呢個人隨即變臉，問點解會係我in佢，咁我就將大佬走咗之後，HR都走埋嘅情況同佢講，點知佢聽完勁嬲。
「點可以畀未來下屬in我㗎？咁你咪知道晒我啲嘢？連我之前同之後幾錢人工都知？咁不如唔好嘥時間，我直接見你老細。」
話分兩頭，佢覺得件事唔make sense係正常嘅，咁但係我都講得好清楚，人事變動上處於非常時期，加上老細叫得我in人，就係佢唔想負責，亦唔想搵headhunt，你可以冷靜啲同埋有禮貌少少向我表達，再者，咩叫「點可能要個未來下屬in你」？一定請你㗎？我一定係你下屬？
當時老細真係唔喺office，咁我冇理由叫其他唔關事嘅部門經理in佢吖，所以就話會轉達畀老細聽，有需要再約時間second in，其實我對呢個人印象已經好差（當然佢對我同對我公司嘅印象都唔慌好），完全想像到將來如果共事，佢一定有好大官威，所以真係唔希望老細請佢。
幸運地，後來老細聽完我講，佢亦都冇心去in呢個人，我冇加鹽加醋㗎！如實陳述咋！老細話呢個人講嘢咁串，驚同我哋唔夾喎，老細英明！
然後我見咗第二位求職者，呢次我學精咗，interview劈頭第一句就同佢講公司目前狀況，所以由我去in返自己部門嘅大佬，你估下第二個求職者咩反應？
「咁就好囉！易辦啦！打工之嘛，大家圍威喂咪得囉，最緊要好做，我唔使實權㗎，你鍾意話事都得，我淨係睇人工㗎啫！返工等放工，放工打衝鋒！既然咁熟，介唔介意話我知呢個position最高可以畀幾多呀？我填5萬會唔會太少？如果5萬5呢？你之前個大佬有冇6萬？」
喂，真嘢唔好拎出嚟講吖，人人都想圍威喂，人人都係返工等放工，你唔使講得咁白喎！同埋老細係畀咗個salary range我請人，但我都唔知走咗個大佬幾錢人工㗎！
又想像到請咗呢個人返嚟會點，到時佢一定係是但求其，然後將所有嘢推晒畀我做。
然後第三個仲激動過第一個，我懷疑呢條友有反社會人格。
我：「唔好意思，我要對一對身份證。」
「你又未請我，點解要畀身份證你影印呀？」
我：「唔係影印，一日未請都唔會copy你張身份證，你見我連你啲工作證明同埋學歷都冇copy，不過我要對返張form，起碼要知道係同一個人……」
「你都多餘嘅，你覺得我會搵個人代我interview呀？唔通我而家見完工，返工又係第二個人呀？你一陣抄低我身份證咁點呀？」
我：「對名啫，好多公司都係咁，頭先都講咗未請唔會copy……okok，可唔可以對下你啲學歷證明文件，對㗎啫，唔係影印，喺你面前對一對。」驚L咗佢呀！
「點解要畀你對呀？知唔知咩係私隱？」
其實老細賦予咗權力畀我請呢個人，如果覺得合適，基本上可以一take過即請，而家只係想循例同簡單對一對個人資料同學歷啫，無事無幹你就話我侵犯私隱，到時請咗先知你原來冇香港身份證，拎住雙程證，甚至冇畢業證書，咁我咪孭晒飛！全副武裝咁嘅態度，點樣一齊工作呀？
好在見第四同第五個就正常返好多喇，佢哋知道我係以下屬身份去做呢個interview之後，反應都相當平靜，其中一個仲話：「我反而覺得好喎，始終HR唔係每個position都好熟，直接同返相關部門in，其實大家講幾句已經知道龍與鳳，慳返啲時間都係一件好事。」
最後我揀咗其中一個，真係親手請咗個上司畀自己，暫時合作得好愉快，睇嚟我都有做HR嘅潛質……講笑啫！反而想認真講句，自己in完人之後，我識得企喺HR或者公司層面去看待求職者，識得換位思考乜嘢人會適合公司，呢個小經歷應該幫到我將來見工，都係一個得著嚟嘅！（完）