我個friend知道咗呢份筍工可以攞正牌hea做之後，興趣立即大增，咁即管扮到咩都唔知走去問下Manager啦，我都費事講佢上次甩底，Manager話：「你叫佢send份CV嚟囉，無所謂呀，反正仲有一個位要霸住。」
不過Manager睇完又好似冇咩反應，我個friend亦都冇收到電話，唔知係發現咗定係唔啱使呢？冇理由吖，如果唔適合，之前就唔會約我個friend上嚟interview啦！再隔多一日，咩都唔重要喇，因為有個女仔返工，仲要幾靚女添！
呢條女都知道份工得3個月可以hea做，原來佢見工嘅日子仲早過我，咁明白晒啦，即係當時見完覺得麻麻，然後請咗我同另一個，咁另一個因為甩底，呢條女嘅輪候位置就排第一，而家以後補身份頂上，咁都好合理嘅，唔通再出job ad搵人咩，Manager都係想嗱嗱聲塞返啲位，唔畀公司cut budget啫！
做落之後我發現呢度啲同事都唔錯，而且喺公司hea足全日都咪話唔辛苦，時間會過得好慢㗎！所以我會自動自覺問下大家有冇咩要幫手，雖然好多時只係幫佢哋入資料或者執頭執尾，但係眨下眼就夠鐘放工，我寧願咁樣過喇！
做咗一個月之後，Manager接咗個project返嚟，想同事食完lunch喺灣仔派下啲免費飲品畀路人，一來幫個客宣傳，二來要做個research，我呢啲表面上係長工，實際上係contract嘅小角色就冇份做research㗎喇，幫佢哋派下飲品啦！
Manager：「你可以唔去㗎喎，我哋派都得，你留喺office啦！」
我：「無所謂啦！出去派下嘢時間過得仲快。」
嗰位同我一樣都係新人嘅女同事本來唔想去，但見我自告奮勇所以就跟埋嚟。
女同事：「呢隻嘢個名聽都未聽過，派都未必有人飲啦，求其喺office派晒畀同事咪得囉！呢啲時間灣仔又多人又熱！」
我：「咁又唔得，佢哋好似要做research吖嘛，覺得熱你不如返office先啦，Manager話我哋唔一定要幫手㗎！」
女同事：「我冇諗住幫手㗎，求其派兩罐就會去食個下午茶，好過留喺office咁悶吖嘛！」
最後個女同事真係派派下蛇咗去，雖然Manager話唔一定要幫啫，但你答應咗出嚟派嘢，咁又好似過份咗啲喎！
女同事：「你頭先真係派足全程呀？使唔使咁搏呀？我問過Manager喇，真係冇得轉長工㗎，佢留咗位畀兩個舊下屬，我同你都係過客嚟咋，唔使咁認真喎，你搞到我好似好懶咁。」
我：「咁我真係有收佢人工嘅，而且之前日日上網hea做，Manager又從來唔畀壓力，幫下手冇乜所謂啦，預咗冇得轉長工㗎喇！你唔覺得有啲嘢做，時間會冇咁難捱咩？」
女同事：「唔會喎，有嘢做先至最難捱，你咪咁港豬啦！」
呢條女靚係幾靚呀，不過工作態度真係差到一個點，除咗派嘢嗰陣走咗去之外，有時同事忙得滯想佢幫手整少少嘢，條女除咗推三推四仲會發出啲唔耐煩嘅「褶褶聲」……唔係港唔港豬嘅問題，係待人接物都好似有啲問題。Anyway，做下做下就做咗兩個幾月，無所謂啦，短期同事嚟啫！
後來有一日Manager叫咗我入房，佢問：「如果有得做落去，你留唔留低呀？」
我：「唔係得3個月，做埋今個月尾冇得做咩？」
Manager：「我嗰兩個舊下屬最後都唔嚟，一個同老婆商量咗會去英國住，另一個就畀舊公司加薪挽留，不過我點都唔可以畀個department縮咗啲位，我見你做嘢都幾勤力，又會主動幫其他同事，點吖，想唔想留低吖？」
我：「梗係想啦，咁人工……」
Manager：「啱啱好3個月吖嘛，當你過咗試用期，象徵式加返$1500，你o唔ok？」
我：「唔係咁嘅意思，我係話之前你on top喺我寫嘅expected salary加多$4000，使唔使轉返？」
Manager：「傻㗎你？份糧又唔係喺我戶口拎，使咩幫老細慳呀，我唔理咩on top唔on top啦，總之你而家份糧過咗試用期就加多$1500，有冇問題？」
我：「梗係冇問題啦，多謝晒！我會畀心機做㗎喇！咁即係Angel都會一齊留低啦！」Angel即係另一位女同事。
Manager：「Angel？唔會啦，雖然我當初叫你哋可以hea做，但而家真係要長工，其他同事話佢嘅工作態度麻麻，長工就唔係咁好喇。」
如果講「觀賞價值」，Angel留低係有啲睇頭嘅，但若然要長期做同事的確又窄窄地，既然係咁我就試下再推薦個friend啦，夠晒義氣喇啩！
我：「咁另外一個位你要再請人定係點呀？記唔記得我上次有個friend介紹？你想唔想見下佢？」
Manager：「你個friend兩個幾月仲未搵到嘢做咩？」
我：「未呀！」
其實我個friend點止兩個幾月未搵到嘢做吖，佢由3月失業到而家就嚟10月喇，間唔中仲會問下我呢間公司要唔要人，當初佢嗰種「得3個月貨仔唔吼」嘅氣燄全部消失，但又冇真係走去做七仔麥記，佢話怕瘀喎！搵啲距離屋企遠嘅分店就驚蝕車錢，搵啲近屋企嘅就驚撞到熟人，佢搵工都幾多條件同埋顧忌，難怪搵足大半年。
Manager：「老實講，我寧願出過隻job ad，都唔會請你個friend，你個friend咁耐未搵到工唔係冇原因㗎！！」
我：「點解？」Manager應該知道佢曾經甩底。
Manager：「一見到佢份CV我就有印象啦，約過佢見工但係no show，我最憎人冇交帶，唔見咪唔見囉，打個電話嚟講聲有幾難呀？一個人做嘢唔ok可以慢慢教，但係冇責任感就同本身性格有關，如果佢做咗咁多年人都係呢種style，我自問冇能力改變到佢。」
果然係記得，好在Manager冇問我知唔知個friend曾經答應嚟interview然後甩底。
我：「明白。」
Manager：「我寧願辛苦啲再出招聘廣告見人，都唔會考慮一個甩底冇交帶嘅人。」
講返成個經過出嚟唔係想寫咩「雞湯文」，或者懶係勵志叫人努力工作就一定有回報，我只係想講其實每做任何一件事都會有連鎖效應，如果我個friend當日唔係no show甩底，就算即時冇請佢，我第一次開聲介紹畀Manager嘅時候肯定可以成為replacement，輪候位置點都排得先過Angel，因為嗰陣只不過想有人霸住個位，基本上係冇要求咁滯。
出招聘廣告、見工、請人、Train人，其實好鬼煩㗎！不過Manager寧願再經歷一次都唔肯畀機會我個friend，相信印象分真係好差。同樣地，Angel都有機會轉正，但佢用十幾分鐘幫手入少少data都「褶褶聲」，呢啲都係印象分嚟嘅。
早兩日我同個friend講咗呢件事，唔係要炫耀有得轉長工或者潤佢，只係好意提醒佢去見工唔好再成日no show甩底，人哋會記得㗎！
Friend：「妖！嘥氣啦，第一次過嚟見又點吖，佢咪又係會請嗰個靚女，有得揀你都揀女啦！」
我：「條女做嘢唔掂㗎！我係講緊而家有得轉長工，如果你之前冇甩底，我話有friend介紹應該會優先考慮你啫！」
Friend：「講經咩！而家佢唔係要人hea做，請人嘅要求都唔同啦，根本就唔關甩底事！」
Manager又講得冇錯，性格嘅嘢真係好難改，不過佢由年初搵到年中，再由年中搵到而家近年尾，我希望呢個friend快啲搵到工啦，佢把口係唔認衰啫，但我知道佢都好大壓力。