有日一位男士睇完醫生。
拎藥時，我同佢講：「呢隻痱滋膏嚟嘅…」
我都未講完，佢插咀：「要搽呀？」
唔係呀，俾你望咋，望吓就OK啦，盛惠三百呀。
我：「係呀，醫生開俾你嘅，每…」
佢又插咀：「吓？點搽呀」
用心搽呀。
我：「你唔好咁心急住，我而家就係講緊點用俾你知」
佢：「你有講咩？我聽唔到嘅？」
我：「我未講到…你俾我講埋先」
佢：「唔係喎，頭先醫生叫我戒口喎，係咪呀？」
我：「係呀，煎炸熱氣嘢唔好食住啦，好返先食啦」
佢：「照食會點呀？」
冇嘢嘅，你痛你事你死你事咁咋嘛…
我：「等好返先再食啦，而家食煎炸嘢個口都唔舒服啦」
佢：「我冇嘢喎」
咁你嚟睇醫生做咩呀？冇嘢嘅點解唔返屋企嘆冷氣呀？
我已經唔想應佢。
佢：「我照食要幾耐先好返呀？」
我：「呢個我真係答你唔到，你頭先唔問吓醫生嘅？」
佢：「問咗啦，佢唔應我咋嘛」
又難怪嘅，咁戇居嘅問題真係點答呀，唔通答『你痛咋嘛，又唔係我痛』咩。
我：「呢排戒吓口先啦，好返先再食啦」
佢：「我連打茄輪都冇事喎」
哦。
佢：「係揩過粒痱滋就醒一醒冇晒mood咁囉」
幾好呀，咁唔好醫啦，唔好戒口啦。
我：「你想啲痱滋好返嘅話就戒吓口搽痱滋膏啦，如果唔係你嚟睇醫生做咩呢係咪？」
佢諗咗陣。
佢再問：「我唔係唔想好，係想知搽咗痱滋膏會令我有幾快好啫」
佢用真誠嘅眼神望住我，我想伸出兩隻手指…
我：「不如咁啦，既然你好似有咁多嘢唔明唔清楚又想知嘅，不如轉頭再入醫生房問清楚醫生呀」
佢耍手：「唔駛啦咁，你講點搽得啦」
做咩呀？醫生喺房入面對你做過啲咩呀？你咁抗拒入返去嘅？
我：「係啦嘛？我真係可以講啦嘛？」
佢低頭望實啲藥好似好期待我講俾佢知咁…咁咪乖囉～
👉🏻即睇其他診所低能奇觀嘅文章
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。