有日有幾個家庭喺度等緊睇醫生。
佢哋嘅小朋友喺度玩診所啲玩具…見佢哋都玩得好開心，負責抹玩具嘅我都感到安慰。
突然有A小朋友喊聲：「嗚…我唔制呀，我要玩嗰個呀」
A嘅爸爸即刻去佢小朋友身邊拎起佢面前嘅玩具：「玩呢個啦，一樣好玩咋嘛」
A繼續：「我要玩嗰個呀！」
爸爸：「你試吓玩呢個呀」
A一手拎走爸爸手上嘅玩具，一手揈去角落，我感到心碎。
A繼續：「嗚，唔制呀，我要嗰個我要嗰個呀，唔俾我嘅我會死呀！」
爸爸望住A冇出聲，淨係皺眉頭。
A繼續：「我要死呀我要死呀，我要玩嗰個」
爸爸：「嗯，咁你去死啦」
A繼續：「我要死呀！我要死呀！我要死呀！」
爸爸點頭：「好呀，你男仔嚟嘛，講得出就要做得到，我唔會反對呀，你鍾意呀」
A望住爸爸大喊起上嚟：「嗚，媽咪唔會咁同我講嘢㗎，我要媽咪呀！」
爸爸語氣強硬問：「你而家要玩具定要媽咪呀？」
A：「我要媽咪呀，嗚，媽咪呀媽咪呀」
爸爸：「你同我睇完醫生就返去搵媽咪，同我靜靜哋坐喺度等睇醫生」
A繼續喊：「媽咪呀，我要死呀我要死呀，我唔想再喺度啦，我喺度好辛苦呀」
阿仔，我都聽到好辛苦呀，講咗咁多次死都仲喺度講緊，好醜怪啊。
爸爸：「你唔睇醫生呀嘛？係咪呀？」
A繼續喊：「我要媽咪呀」
爸爸行埋嚟登記處：「姑娘，幫我取消咗登記先呀唔該你，我晏啲再嚟登記呀」
我：「好呀冇問題」
爸爸行到A前面：「唔睇呀！走！你呢啲唔駛嘥錢睇醫生㗎啦，反正你轉頭都死㗎啦」
爸爸行到診所門口回頭望住喊緊嘅A問：「係咪唔行呀？你死咗喺度姑娘唔會幫你執屍㗎」
A望望我，望住我都冇用啦，愛莫能助呀仔，你老豆教仔唔關我事呀～行啦仔。
A死死氣跟爸爸出門口…
多數咁樣嗌死法嘅最後都唔會死嘅，身痕啫。
《診所低能奇觀》「入去前我要唔要有咩準備呀？」
https://hkofficedaily.com/?p=18294
👉🏻即睇其他診所低能奇觀嘅文章
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。