有日一位先生嚟到診所。
佢行埋嚟登記處同我講：「早排拎咗啲藥發覺唔係咁啱食喎」
你點發覺呀？
我：「你俾你嘅覆診卡號碼我呀，我同你睇睇先」
佢：「睇咩呀睇」
賤人！賤人！賤人！唔睇得呀？碌返出去啦
我：「我唔睇又點知你之前係拎咗咩藥呢？我要俾排版醫生睇㗎嘛」
佢：「又攞醫生嚟撻我」
診所唔係攞醫生嚟講，唔通拎個驗屍官出嚟講呀？
我：「我係想幫你解決問題嘅，都要先生你配合先得，你話啲藥唔啱食嘅話，我都要睇睇係幾時嘅藥同係啲咩藥」
佢：「要知幾時㗎咩？」
我：「當然啦，太耐嘅藥我哋都會建議病人重新睇過一次醫生嘅，唔會有人拎咗啲藥返去隔好耐先食咁得意㗎嘛」
佢一隻食指篤住自己面珠：「我會咁得意囉」
我可唔可以車巴你呀？
我：「…嗯，咁先生你可能要睇次醫生啦，太耐嘅藥醫生係唔會幫你換藥，或者你話我知係大概幾耐嘅藥嚟？我睇吓可唔可以幫你問問醫生呀」
佢：「實際時間邊記得呀，我又唔係要特別記住你」
你可以直接講『唔記得』就可以啦，其他說話都係多餘嘅。
我：「一係我同你CHECK CHECK先啦，你嘅電話號碼係？」
佢：「你頭先唔係問覆診卡號碼咩？要我電話做咩呀？」
我：「咁覆診卡號碼係？」
佢：「邊記得呀，同我完全冇關係嘅嘢嚟嘅，記嚟做咩」
介唔介意我去個廁所嘔嘔血先？
我：「咁身分證號碼？」
關你事啦卦！
佢：「你越問越私隱㗎喎，得㗎咩？」
我：「我都係想check返你個紀錄啫…一係電話號碼一係身分證號碼…」
佢：「呀！我記得啦」
記得咩呀柒頭，係咪記得返屋企條路呀？走啦去啦。
佢再講：「有幾包係上次踢世界盃嗰陣㗎」
你等下次世界盃再嚟啦。
我：「咁耐嘅冇得換㗎啦，你而家唔舒服嘅話，我同你登記睇醫生啦，你嗰啲藥可以掉㗎啦，過晒期㗎啦」
佢：「我都係嚟搏吓得唔得啫」
佢轉身離開診所。我都係去廁所嘔嘔血先。
👉🏻即睇其他診所低能奇觀嘅文章
👉🏻《診所低能奇觀》 小姐請病假「我要同你影張相呀」
https://hkofficedaily.com/?p=17610
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。