有晚臨收工，見到一個黑影一直喺診所門外…
個黑影喺門口足足十幾分鐘。
七點五十六分，黑影移動了，佢推門入嚟診所。
佢行埋嚟登記處問：「你哋埋咗數未呀？」
做咩關心埋數未呀？你想點呀？
我：「你係咪要睇醫生呀？係就而家登記埋啦，我哋就截症收工啦。」
佢：「即係未埋數呀？」
我：「我哋埋唔埋數唔關你事㗎喎？你唔係要睇醫生咩？」
佢靜咗，我保持高度戒備心！
我：「先生你係咪要睇醫生呀？你唔登記嘅醫生八點準時走㗎啦。」
佢：「我想等你埋咗數先睇。」
我：「點解呢？我哋收工㗎啦！」
佢：「我就係想你哋埋咗數先睇。」
呢個時候已經八點，我：「咁你聽日再嚟啦，已經八點，截咗症啦！」
佢：「聽日？我要今晚睇喎。」
咁你掛住執著個唔關你事嘅埋數做咩啫？
我：「我頭先已經同你講得好清楚，你唔登記嘅話，醫生就八點鐘準時走，醫生搭正八點已經走咗啦！」
佢指住醫生房門：「我見唔到醫生有出過嚟喎。」
我：「醫生喺後門走㗎！」
佢：「吓？咁我呢？」
我指住診所門：「你可以喺正門走。」
佢：「我八點前入咗嚟㗎啦，點解醫生可以明知我喺度都走㗎？」
我：「你八點前登記先有醫生睇㗎…」
佢：「醫生唔知我喺度咩？我都係想等你哋埋咗數先睇咋喎。」
我純粹想佢走：「我哋埋數唔係夜晚埋…」
佢：「吓？」
佢再講：「你頭先唔講？」
我：「我頭先應該有講埋數嘅嘢唔關你事？」
佢：「我諗住等你哋埋數先睇會覺得煩啲吖嘛。」
存在感唔係咁樣刷嘅。不過你而家都已經夠煩，阻住我收工呀～
👉🏻即睇其他診所低能奇觀嘅文章
我叫珍寶豬，係一個診所助護，只係一個無能無專業資格無牌照的大嬸。做過晒港九新界中西醫診所，見盡低能白痴暴力感動可悲可笑之人生百態。亦歡迎各在職離職姑娘護士醫生分享診所醫院內的奇趣事窩心事爆笑事，但請勿公開任何病人個人資料或病人相片。看此PAGE時請勿對號入座，信則有，不信則無。