住荃灣寶石樓嘅我，無論去西鐵站定係港鐵站都係位處中間，行去邊都差唔多，加上公司喺觀塘，冇理由唔行幾步去德華公園搭van仔啫！何況我返工時間本身真係唔鍾意搭鐵，有得揀嘅情況之下一定揀巴士同小巴。
由荃灣搭車入觀塘嘅交通，相信唔使多介紹啦，好似點樣預時間都係會塞，天馬苑樓下係第一關，特別多「交外」，當你順利過到，跟住黃大仙就係第二關，未計櫻花髮廊對出個位，全部入九龍灣同觀塘嘅司機鬥攝上橋，唔係個個司機都咁進取㗎，有啲就咁喺後面排，聽完首歌都未上到橋。
我同一個女同事Yumi好friend，一來算啱傾，二來佢都係住荃灣，近街市街𠴱度啲唐樓，其實大家距離好近，每星期最少3日會排緊小巴撞到佢，所以關係亦隨住份工做得愈耐而愈close，有次又喺天馬苑塞緊嘅時候，大家就喺小巴不約而同埋怨交通。
我：「Karen佢哋就好啦，公司喺觀塘，佢哋就住新蒲崗，Jacky都好似住鑽石山。」
Yumi：「Ivan仲近，直頭住觀塘，可以行路返公司，起碼可以瞓晏啲。」
我：「咁近真係好羨慕，放工又唔使迫車。」
Yumi：「你有冇諗過搬出嚟住？」
我：「有，不過份糧租到幾大吖，劏房我又唔想住，怕雜，正常單位就肯定萬萬聲，我份糧兩萬都冇，所以冇得諗。」
Yumi：「我同你一樣諗法喎！之前睇過幾間劏房，勁污糟，有間仲好笑，樓下係141，睇樓嗰日已經有啲阿叔眼望望，想租私樓又太貴，有冇興趣一齊租間兩房？」
我：「有喎，之前我都睇過，有啲兩房講緊一萬鬆啲，如果一人一半，其實同各自租劏房差唔多，大家仲有自己房，夠晒私人空間。」
Yumi：「咁不如一齊睇下啦！」
其實嗰次講完都係冇下文，起碼擱置咗兩個月，直至有一次Yumi話搭小巴畀條西裝友係咁埃埋嚟，跟住呢個搵屋嘅話題先至再度燃起，我哋兩個女仔主力喺網上搵盤，跟住再contact地產代理，期間睇咗超過十個盤，有啲就太貴，有啲就太殘舊，有啲近垃圾房，有啲係二樓又唔想咁低層，兜兜轉轉終於睇中一間喺黃大仙翠竹花園。
Yumi：「最似樣係呢間啦！兩房，都幾四正！望到獅子山添喎！」
我：「今次真係獅子山下，$13,000有成500幾呎，你估有冇得講價吖嗱？」
Yumi：「實用得400幾尺咋，我試下同個經紀講價先！」
憑住Yumi嘅三寸不爛之舌，我哋竟然成功講到$12,000包埋管理費，唔計水電煤（平均一人幾百），其實每人都係$6,000，比起我同Yumi之前各自睇嘅劏房都係貴多幾百至一千蚊左右，反正劏房又係間房，呢度名正言順有兩房，係共用客廳、廚房同廁所啫，點計都冇理由唔租吖！拍板！
不過……我可能將同同事合租呢件事睇得太簡單喇。
最初兩個女仔一齊生活的確係幾爽，特別係嗰排臨近聖誕，我哋買咗好多擺設返嚟，成個氣氛都好好，但久而久之就發生其他問題。
Yumi本身有個男朋友，不過租屋之前話性格不合分咗手，一個人住之後佢就起勢係咁玩交友App，玩唔緊要，佢真係怒約啲仔出嚟，嗱！我冇誇張，佢每個月都會換仔，有時一個月仲要換兩三次，最癲係會帶返屋企搞嘢，夜晚Yumi好似變咗另一個人咁，好狂野。
我都唔敢問佢不嬲係咁，定係同男朋友分咗手先至性情大變，但係屋企每晚有其他異性出入，仲要過一排就唔同人，呢樣就嚴重影響我生活，因為兩個女仔一齊住嘅初期，我喺屋企連胸圍都唔戴，後來就要一級戒備狀態，老實講，佢帶返嚟啲男仔都係交友App啱啱識，咩人都有，斯文又有，MK又有，紋身佬又有，我真係驚㗎！
但原來呢，MK同紋身佬未係最驚，最驚係……
有一晚我入咗房但未瞓，大約12點幾就聽到Yumi返嚟，隔住度門仲聽到一把男人聲，心諗點解佢可以講完都冇改善，半夜直頭畀佢哋嘅呻吟聲嘈醒，忍耐下再瞓過，第二朝起身竟然同個男人撞個正著，而呢個男人仲要係公司其中一個男同事……
我：「嘩！你搞咩喺度呀？」
男同事：「Sorry，我而家走喇，公司見。」
我問你搞咩喺度呀？唔係想同你講see you later呀！
即刻入Yumi房問個明白，呢條女仲可以理直氣壯咁答我：「咩呀？之前交友App嗰啲你又話三唔識七好危險，Johnny你咪識囉，又有咩問題呀？」
我：「Johnny有女朋友㗎，Account個Teresa條仔嚟㗎！」
Yumi：「分咗手好耐啦佢哋，換衫先啦，趕住返工呀！」
有啲嘢真係你唔尷尬，尷尬嘅就係人哋，條氣雖然好唔順，但我都等到夜晚返屋企先捉住Yumi坐低傾。
Yumi：「你仲煩過我阿媽，咁呢度自己屋企嚟㗎嘛，同條仔返嚟搞嘢有幾咁平常啫？唔通下下出去時鐘酒店咩，好污糟㗎！」
我：「你有冇諗過我成日見到咁多唔同嘅男人喺屋企出現，我會覺得好唔方便同埋好唔舒服㗎？」
Yumi：「咁你想點啫，出面啲人你又話唔識，同事你又話唔舒服唔方便，我都係想搞嘢啫，點呀？」
其實嗰次大家已經反反地面，但我都仲天真地覺得Yumi見到我咁大反應會收斂，點估到冇改善不特止，隔咗一個星期我又見到屋企有「新男人」喇，個「新男人」仲要係我個manager……（未完待續）