有幾個朋友都知我呢份工嘅經歷，佢哋仲問我呃到$70,000蚊人工有冇少少內疚？黐線！大家underpaid嘅時候，你公司同你老細會唔會內疚吖？唔會吖嘛！何況Shane有咁多層樓同鋪位，淨係每個月收租都用唔晒啦，根本就無限金錢。
我其他幾個同事仲出色，Maggie Q真係hea足全日傾電話煲劇，Designer就好勤力－－－做自己freelance，IT嗰個都一樣，Shane請佢返嚟寫公司網站，但佢其實係用罐頭website，即係Wix嗰類，你同我都整到㗎！Marketing個同事最忙，每日要喺fb出一個post，出完仲要冇人like，連佢自己都唔like返個post。
未知道Shane有咁多物業之前，其實我覺得呢個老細極度揮霍，無啦啦話要減肥，上網買好多嗰啲即沖即飲嘅代餐返嚟，不過飲咗一次話唔好味，幾千蚊嘅營養代餐就咁派畀我哋。另外佢又走去join健身請私人教練，做咗兩三次又話好辛苦唔想做，然後就冇再去喇。
有次佢話課完金畀一個app之後覺得冇用，問我識唔識點樣喺個online store停止每個月autopay，咁咪幫下佢囉，跟住先發現佢有勁多畀錢app，個訂閱項目水蛇春咁長，最搞笑係幾乎全部交友app佢都裝晒仲畀緊月費。
我：「嘩，Tinder又課金，Skout又課金，Heymandi又課金、Omi又課金，你有冇咁想識朋友呀？」
Shane：「玩下之嘛，邊個男人唔鍾意溝女吖！」
我：「其實老細你咁有錢，唔使溝啦，直接包啲女星都得。」
Shane：「好耐之前試過一次啦，唔好玩嘅，勁貪錢，都係溝素人開心啲。」
我：「包過？邊個女星呀，可唔可以話畀我知？」
Shane講完之後令我好震驚，呢個女星算好乖好純冇乜緋聞，真係估唔到，但係人哋已經結咗婚，老公仲係圈內人，而家已經有埋小朋友，咁就無謂亂講出去影響人啦！如果唔係Shane喺電話度show咗幾張合照我睇，其實都幾難相信係事實。
我一直都有個疑問，Shane究竟點解會咁有錢呢？睇佢個勢唔似做生意白手興家，如果係一個精明嘅生意人……都唔會畀$70,000請我啦！換言之即係本身屋企有錢，後來認識佢耐咗，更確定我呢個判斷係冇錯，原來佢老豆係高官，出面仲要有幾間公司，非常多生意。
究竟佢老豆係未做官之前已經有好多生意，還是有咁多生意係因為做咗官呢？呢方面我就冇問喇，因為Shane講起佢老豆都會避忌少少，同佢平時講女人係兩個樣，明白嘅，特別係呢幾年政治氣氛咁敏感，總之Shane嘅財力就超乎我想像，家底豐厚，典型嘅打跛腳唔使憂。
Shane喺金錢方面係無敵，但都有死穴，就係沉迷女色，佢真係乜嘢女都啱，公司樓下有間德國餐廳，Shane成日同我落去食嘢，原來因為睇中咗一個女侍應。
Shane每次落去都會捉住個女侍應傾偈同埋撩對方，係幾靚嘅，不過望落都係得20幾歲，會唔會鍾意你呢個40幾歲嘅阿叔呀？
Shane：「你估佢幾錢人工吖嗱？」
我：「你唔係想包人呀？」
Shane：「我想請佢去我哋公司做嘢。」
我：「玩到咁大？但係請佢嚟做乜？我哋又唔係開餐廳。」
Shane：「求其畀個position佢做咪得囉！正常都唔想全日都企啦，朝九晚五返Office吹冷氣唔係開心啲咩？」
個個都好似你咁咩，鍾意就打完golf晏晝先返office涼冷氣，有啲人真係唔鍾意做寫字樓工㗎！
以為Shane講笑啦，點知佢又叫咗個女侍應過嚟，傾咗幾句無謂嘢就問人幾錢月薪，媽！好尷尬呀！我坐隔籬都只能夠以笑遮醜，邊有人咁樣問嘢㗎！
睇得出個女侍應都嚇親，概括咁答咗萬零蚊。
Shane：「萬零蚊？呢間餐廳啲嘢食唔平㗎喎，不如去我公司做吖，我請你。」
女侍應答非所問就敷衍過去，人哋又唔知你底細，真係會當你變態佬㗎，唔好咁痴線啦！女侍應之後行埋咗一邊，同佢另一個同事交頭接耳咗幾句，一路講一路望過嚟我哋張枱，唉，我決定以後唔再落嚟呢度食嘢喇。
隔咗一個星期，某日我返工見到Maggie Q喺reception同個女仔傾偈，個女仔好生面口，因為唔係公司職員，但又好熟面口，因為唔知邊度見過……我記得喇！！！
我：「咦！」
女仔：「Hello！」
Maggie Q：「你哋識㗎？咁得啦，你帶Lydia入去等吖，老細仲未返呀，有冇講過新同事坐邊個位呀？」
我都係而家先知佢叫Lydia咋，更加係呢一刻先知佢做埋我新同事，Shane你係咪癲㗎！
求其叫Lydia坐住我前面個位等，因為Shane就算唔打golf都要11點先返，當時10點半都未到。
我：「係呢，你入嚟做咩position呀？」
Lydia：「Shane話請我做clerk喎，我都唔知做咩㗎！你知唔知呢度幾多日大假？有冇雙糧同花紅？放銀行假㗎呵？」
我：「大假呢啲每個同事應該唔一樣，Shane冇同你講？咁你都幾大膽喎，咩都唔知就答應返工。」
Lydia：「佢冇講到咁詳細呀，淨係知月薪$40,000，福利嗰啲全部冇提。」
$40,000請個clerk？先唔計我哋公司根本唔需要clerk，使唔使一出手就$40,000咁豪呀？
喺度做咗一年幾，冇任何同事離職，Maggie Q仲做緊，Lydia仲做緊，IT、Marketing、Designer都仲做緊，fb啲post仲係一個like都冇，我唔敢話自己對得住$70,000人工，但好肯定對得住阿Shane呢個老細，起碼我真係出去跑客見客，亦都開過幾張單，儘管銀碼唔大，根本唔夠cover佢出糧畀我哋成班人。
公司入不敷支唔係重點，因為就算每個月蝕錢，喺Shane嘅角度亦只不過係面嗰浸，對住呢啲以興趣行先嘅老細最緊要保持佢團火，早排先開咗張好細銀碼嘅單，Shane知道之後又心雄，話想請多兩個Sales返嚟。
我好勤力㗎，唔係咁老土要報咩知遇之恩，而係好清楚我絕對搵唔返一份$70,000嘅筍工，暫時未聽到公司有咩唔妥，亦冇聽過Shane有咩唔滿意，keep住呀！呢份工做過世我都願㗎！（完）