「可以過來六本木嗎，我喝了酒，幫我把車開回寓所吧，我買了保濕乳液，還有藥水膠布給你。」喺office開完會之後，我喺公司附近嘅Roppongi Hills訂咗間餐廳，因為想答謝二宮先生嘅生意，喺日本傾公事食飯，基本上好難避免飲酒。
我：「抱歉，忘記咗二宮先生你係揸車過嚟，我仲叫咗成支酒。」我自己搭開JR，一時間都唔記得尊貴嘅客戶點會同我一樣迫電車吖，日本搭的士又咁貴，完全冇諗過會搞到對方酒後駕駛嘅問題，今次真係輸經驗。
二宮先生：「唔緊要，我叫咗女朋友幫我揸車返去先，之後佢會喺屋企等我，講起上嚟，你哋結咗婚未？」
未嚟得切回答，我同事反而搶先同二宮先生講：「未，我發覺喺東京識女朋友好難，我自己又係外國人，日文唔夠流利，日本女仔似乎唔鍾意，後來我識到一個台灣女仔，對方知道我喺日本未有永住權，果斷咁同我講唔想發展落去，原來佢都未有永住，所以想搵個日本男人或者已經有永住嘅外國人結婚，咁就唔需要每年都去續工作簽證先可以繼續留喺日本。」
同事呢啲溝女血淚史，從來冇同過我呢個老闆講，可能當晚佢兩杯到肚，竟然喺個客面前訴心聲，吹漲！
二宮先生：「唔緊要，一小步一小步，總會搵到女朋友，我呢個女朋友都係喺網上面認識。」
喺度要講聲抱歉先，因為所有對話原本都係日文，所以轉返做廣東話係有少少怪，例如佢講「一小步一小步」，我係應該轉返做「慢慢嚟」，但最終都係依從佢用詞嘅原意，至於其他太深或者好陌生而唔識得翻譯嘅句子，喺下面我會直接出日文，再配自己嘅理解去補充。
聽完二宮先生講，我都好心急想聽故事，所以快同事一步問佢：「交友網？邊個好用？有咩介紹？」
二宮先生：「交友網我參加過，不過我冇呢個時間，老實講，我係直接去爸爸活嘅網站，你哋有冇聽過『パパ活』？」
同事：「冇。」
我同一時間答：「有。」屌，同事扮純情個樣都真係呃得下人，聽日返去扣佢人工。
二宮先生試圖解釋畀我同事聽，係咪煩呢？又要聽一大輪嘢先入正題：「爸爸活係指成熟同有錢嘅男性同年輕女士食飯，從而提供金錢資助。」
同事：「即係援交？」
二宮先生：「唔一樣。」
屌你收聲啦同事！
二宮先生繼續：「喺爸爸活嘅圈子裡面，其實有好多惡魔，你哋知唔知較早前發生過一件事，喺池袋，有個80幾歲嘅老人家，畀一個十幾廿歲嘅女仔兜搭，佢哋去咗附近嘅酒店開房，最後個老人家死咗。」
我好想問係咪「馬上風」，可惜我學藝未精，唔知道「馬上風」嘅日文係咩。
好在二宮先生只係講講下想回氣，佢接住再解釋：「個女仔趁個老人家沖涼嘅時候偷佢銀包啲錢，不過被發現，女仔為自保拎出佢袋住防身嘅刀，雙方糾纏之下，把刀原來割到老人家嘅大動脈，之後就死咗，好大件事。」
我：「所以好多做爸爸活嘅女仔係惡魔？」
二宮先生：「唔係，佢哋背後嘅人先係惡魔，呢個女仔係同兩個男仔合力做爸爸活生意，兩個男仔平時會扮女性喺網站同男人傾計，釣到客先至會派個女仔去，其中一個男仔仲要係呢個女仔嘅前男友，事發後佢哋3個一齊逃走返鄉下，結果都係被警察拘捕，我唔明點解個女仔平時要同咁多陌生男人上床，中間仲要畀兩個男仔抽取利益，係佢哋控制個女仔賣淫。」
哦，惡魔即係扯皮條。
同事：「好危險，但係二宮先生你……」
二宮先生：「我唔同，我唔會喺街接受兜搭，我係網上認識，食過飯，互相了解過，我要確認對方係自己出嚟做呢件事，而唔係有人或者集團喺幕後操縱，同埋我會幫一啲喺經濟上真係陷入谷底嘅女仔。」
話口未完，二宮先生嘅女朋友到達，將車匙、一支細嘅保濕乳液，仲有一盒印有公仔嘅藥水膠布遞畀對方之後，二宮先生仲向我哋作出介紹：「呢位係伊藤。」
伊藤向我哋打咗個招呼，就依照二宮先生嘅吩咐有禮貌地道別離去。
據我所知，二宮先生係超過50歲，雖然真人比起實際年齡後生，不過點睇都有40幾歲，而嗰位伊藤小姐，睇上去有冇16歲都成問題。
同事：「伊藤小姐好年輕。」
二宮先生：「佢個樣年輕，其實已經20歲，讀緊大學，本身佢做兩份兼職，有冇聽過BIG ECHO？卡啦OK！佢之前喺BIG ECHO做兼職侍應，時給都係得一千円多少少，我叫佢唔好做，我養佢，專心讀埋個大學。」
我：「養佢？咁樣要幾多錢？」
二宮先生：「最初識佢，同佢飲咖啡，佢話一個月要7萬円就夠。」講嘅時候，二宮先生同時發出笑聲，7萬円對佢嚟講根本唔係咩錢。
同事：「飲杯咖啡就要7萬円？真係好貴。」
二宮先生：「唔係，7萬円係佢向我提議嘅包養費用，我同佢飲杯咖啡係1萬円，爸爸活係有一個公價。」
講完呢句之後，二宮先生拎咗佢部手提電話出嚟，展示爸爸活網站裡面同其中一個女仔嘅對話，內容係咁：ご一緒にお食事やお買い物をまずは楽しめたらなと思っております。そちらは1万円からでお願いしたいと思います。
お茶を飲んで、そのあとにクロックホテルに行きたいという感じですか？🤔🤔
怒ることはないので話し合いましょう
再聽二宮先生講，原來齋飲嘢就1萬円，食飯就2萬円，更進一步嘅接觸就係4萬円，包養嗰啲就另外再傾。
二宮先生：「其實喺日本，有好多人真係好貧窮，好似伊藤，佢出身自單親家庭，而家同媽媽住喺神奈川，間屋係三坪大嘅房加一個兩坪大嘅廚房，再加上呢兩年經濟好差，連一啲三十幾歲嘅單親媽媽都加入爸爸活行列，同後生女爭生意，拉低咗整體價格，以前同佢哋飲杯咖啡，1萬円係冇可能。」
同事：「咁你即係每個月畀7萬円伊藤小姐？」
二宮先生：「唔止。」（未完待續）