「喂，你好，請問你係咪……等等先」手提電話響，來電號碼顯示係我阿媽，不過傳嚟嘅聲音就係一個男人，我個心即時涼咗一截，唔通詐騙集團已經先進到可以隨意hack人哋電話嚟用？定係我阿媽畀人捉咗去呢？
我：「你係邊個？做咩用我阿媽電話打嚟呀？我阿媽呢？」因為太過緊張，亦認定對方係圖謀不軌，所以我嘅語氣的確好差同好惡，但係好快我就後悔喇，因為聽埋落去先知道原來誤會咗呢個男人。
「哦，係咁嘅，你媽媽喺隔籬，佢同我講自己叫劉亞妹，唔使擔心，佢而家好安全，不過頭先差啲畀人呃錢，你會唔會嚟接返佢，我哋喺賈炳達道個公園附近，一係我畀你媽媽聽同返你講先，等等。」
冇錯，劉亞妹係我阿媽，原來佢頭先真係收到電話詐騙，對方話係唔知咩公安打嚟，類似話佢犯咗法，要查戶口資料，拎咗戶口號碼，本身想拎網上理財密碼，不過我阿媽唔識，因為佢都唔會online banking，所以就傻下傻下落街想去銀行轉錢畀騙徒。
我將手頭上嘅工作全部放低，即刻飛的去接返阿媽，原來佢頭先唔識點樣去銀行，慌不擇路之下就求其搵啲路人問，然後問著個後生仔。
喺我見到阿媽嘅同時，後生仔有電話響，隱約聽到佢講：「唔好意思，今日趕唔切嚟見工，如果改聽日可唔可以呀？唔係，唔係，我想見，有啲事趕唔切啫，哦，咁樣，好啦，唔該晒，唔好意思。」
等到佢講完電話，我即刻say thank you先：「多謝你截住我阿媽，如果唔係佢肯定過錢畀人，頭先我語氣唔好，sorry！」
後生仔：「唔緊要，明白嘅，因為我頭先同你媽媽講嗰啲係電話詐騙，佢好似唔明我講緊乜，我又驚走咗之後你媽媽再搵銀行，所以先叫佢打電話畀屋企人，諗住話聲你知發生緊咩事，電話詐騙條友後來又打嚟呀，我鬧走咗佢，不過唔知有冇用，你留意下好啲，老人家好易畀人呃！」
我：「係呀，好在我阿媽80幾歲唔識點用online banking咋，係呢，我唔覺意聽到你好似趕唔切去見工喎，搞到你真係唔好意思，我都過意唔去。」
後生仔：「唔緊要，趕得切都未必一定請我，再搵過囉！」
我：「你咁後生，心地又好，冇問題嘅，請你飲杯嘢吖，都唔知點多謝你。」
後生仔：「唔使喇，我都趕住返屋企搵工。」
我：「心地已經好，仲要咁進取，好難得喎！」其實我嘅年紀都做得佢阿爸，估唔到呢個世代仲有後生仔係咁好心地同埋咁務實。
後生仔：「冇辦法啦，因為搵咗太耐都搵唔到，真係要勤力啲先得。」
我：「你搵緊咩工呀？睇下我幫唔幫到手？我好多朋友都搞生意，或者佢哋公司要人都唔定㗎！」
後生仔：「下，應該唔適合喇，我之前做倉。」
或者係出於感激，再加上呢個後生仔雖然高大，但其實個樣都算斯斯文文，而且五官端正，本身仲以為佢做開文職，我出於真心好想幫佢。
我：「有冇興趣試下做文職？我公司請緊Sales，行街Sales，你頭先表達能力都幾好呀，而且溝通能力都好強，不如趁後生試下轉行啦，冒昧問一句，你之前做倉大約幾錢人工？」
後生仔：「我經驗都唔係好多，之前萬零蚊咋，文職我真係未做過，Sales應該唔掂，我英文又唔好。」
我：「唔使擔心，你肯做，我一定請，英文嗰啲見工先會用㗎啫，我哋啲客都唔係講英文，底薪你預$20,000至$23,000左右啦，另外每個月會有佣金，呢個就睇你努力，有啲人幾千，有啲人份佣可以高過底薪，趁後生試下啦，我好似你呢個年紀嗰陣都係咩都做過，後來先搵到自己興趣咋。」
後生仔：「見呢啲工……我見唔掂㗎，我連英文自我介紹都講唔掂。」
我：「如果唔使見工，直接請呢？」可能佢聽唔明，我就係老細，請咩人其實我可以話事。
後生仔：「唔使見工？」
我：「間公司係我㗎，雖然唔算好大，幫你又幫我啦，你頭先救咗我阿媽，係我恩人嚟㗎喇，而且我唔係特登開個位畀你，公司真係請緊人，試下先啦，我又唔係電話詐騙集團，何況你都冇嘢做，好過日日等運到吖係咪先？」
後生仔似乎仍然猶豫緊，我斬釘截鐵畀咗張卡片佢，叫佢聽日上嚟見工，呀唔係，應該係聽日上嚟返工：「傾咗咁耐，都未知你叫咩名？」
後生仔：「我叫阿源。」
我：「阿源，你叫我阿Glen就得㗎喇，聽日見你㗎喇，咩都唔使準備，最緊要有身份證同埋個人到，Ok？」
阿源當日嘅答覆都唔係好肯定，好在第二日佢真係有到，吩咐咗HR嘅同事唔使In，直接填form影印身份證同埋拎銀行戶口號碼for出糧，再影張相搞埋個職員證，開工！我仲同營業部嘅Ricky單咗聲，當阿源係咩都唔識嘅新人咁train就得喇，唔好畀咁大壓力佢，慢慢教，出去見客就帶一帶，就算初初幾個月淨係出底薪都冇問題，因為阿源之前做倉搵開萬零蚊，而家出二萬頭應該夠用嘅。
放手畀啲下屬去跟同埋帶住阿源，我就間唔中走去睇下佢做得慣唔慣，明明佢答我慣㗎喎，但係有一次我出trip期間，Ricky打畀我話阿源走咗。
我：「走咗？走去邊呀？」
Ricky：「唔知呀，佢叫我等你返嚟先同你講，不過你呢次出trip好似兩個星期後先返，好難唔同你講喎！」
我：「咁佢因咩事走呀？你鬧佢呀？」
Ricky：「邊有呀？你欽點佢入嚟做，點敢搞你啲人，阿源話唔習慣做Sales，唔習慣call客，覺得份工唔適合自己喎！」
衰仔吖，等我出完trip返嚟先再打畀佢傾，後來我成功捉返阿源返嚟，好似社工咁同佢傾計，不過呢次只係佢第一round偷走，你估下阿源total偷走咗幾多次？（未完待續）