《公司多咗隻貓 》下 －唔畀錢報警告你偷貓

除咗見老細愈嚟愈愛貓之後就改變立場嘅Bobo之外，阿嗲基本上係人都任摸唔嬲，最好笑係有個同事本身想唔做，結果因為唔捨得阿嗲而留返低，呢個就係Rachel，佢仲要死口唔認：「咁我想走啫，又未真係搵到工，咪唔走住囉！」

其實據我所知，Rachel本身已經打好晒辭職信，佢係計緊邊一日resign最著數，點知中途殺出隻貓。Rachel可能係成班同事裡面最鍚阿嗲嘅人，因為後來買咗個大貓籠、新貓床、貓玩具，仲有睇過一次醫生，Rachel都係自己出錢冇問我哋拎返。

大約三至四個月後，某日無端端有個好似道友咁嘅人上嚟公司，無頭無尾就直接話我哋偷咗佢隻貓，初初Receptionist唔肯開門畀佢㗎，不過條友係咁喺門口大嗌：「偷貓呀！呢度有人偷貓呀！報警就啱喇，偷人隻貓！」

事件驚動到老細都出埋嚟，開門面對面同條友對質。

「一口價$10,000，唔係我就報警，你哋偷咗我隻貓。」

老細：「點樣偷貓？」

「你仲唔認，我見到㗎！噚晚上嚟先見到隻貓企喺門口，我睇得好清楚。」

秘書Helen：「即係之前係你棄養隻貓啦！係你擺喺我哋公司門口。」

「棄咩養呀？我擺住先，轉頭就唔見咗，原來係你哋偷。」

我：「你係呢幢大廈嘅租客呀？定係喺度返工呀？點解要擺隻貓喺我哋門口？」

「我使乜同你解釋呀！$10,000蚊，我當賣畀你，唔畀就報警！」

老細：「我畀你老母呀！丟完隻貓去人哋公司門口，幾個月後先返嚟攞，仲要唔係攞返隻貓，係嚟攞錢。」我都係第一次聽到老細講粗口。

「你唔畀我就報警！」然後條友又喺走廊大叫：偷貓呀！有人偷貓呀！咁大間公司偷貓呀！

老細：「報警啦，快啲報，不過我想同你講，喺香港如果無合理解釋棄置動物，除咗罰$10,000，仲要坐6個月監，係咪報吖？你唔報我幫你報。」

我唔知係咪真係有呢條例㗎，但係條友見我老細拎個手提電話出嚟，好明顯淆晒底。

「$5,000，一口價$5,000，當我賣隻貓畀你。」

老細：「我一蚊都唔會畀你，過主啦！」

秘書Helen：「我用電話拍低咗你個樣喇，如果你敢嚟搞事，我直接拎條片報警，睇下邊個驚啲。」

「$3,000都得啩，$2,000啦！」

老細：「999我就撳定，你走定係唔走，我奉陪呀！」

「$500得唔得？」

Bobo呢個時候想走嚟執個尾彩，唔知搏乜：「$500我畀佢啦！」

老細同幾個同事都喝住Bobo唔好畀，點知佢已經拎埋錢出嚟，條友一手搶咗就飛奔去後樓梯。

老細：「你有冇搞錯呀！擺明呃錢買白粉啦，隻貓點會係佢呀，佢唔知邊度執定係偷，求其擺喺我哋公司門口搏大霧咋，佢完全冇認領返隻貓嘅意圖㗎！」

Bobo：「費事麻煩啦，一陣佢夜晚走嚟扑爛門口塊玻璃點算呀，你都聽得出佢噚晚上過嚟探路啦，呢幢嘢可以自出自入，我哋門口又冇CCTV。」

老細：「就係冇CCTV，我而家打柒佢都仲得呀！」其實老細喺門口同條友對質嘅時候，全程都係抱住阿嗲，可想而知佢係幾緊張阿嗲，講公事都未見過佢咁激動。

由於條友係咁大嗌嘅時候驚動埋隔籬公司啲人，一時間好多人走埋嚟睇發生咩事，散場後就個個走去同阿嗲玩。

隔籬公司有個女人話：「呢個應該係道友嚟，有次收夜都見過佢鬼鬼祟祟周圍裝，我哋驚佢會爆格，所以一早裝咗CCTV。」

開始有啲眉目，點解全幢大廈咁多office唔擺，偏偏擺隻貓喺我哋門口呢，原來周圍啲公司都有裝CCTV，唯獨是我哋呢間冇，老細當日就即刻搵咗人上嚟裝，從Reception影出去對正公司門口。

阿嗲嘅出現，令到公司好多同事變得團結，令到Rachel擱置咗轉工嘅諗法，仲撮合咗一段姻緣……

隔籬公司有個男仔因為成日去我哋度睇貓，竟然慢慢同我哋一個女同事混熟，搞搞下仲約出街，最後拍埋拖。其實我懷疑個男仔根本一早睇中我女同事，睇貓只係藉口嚟啫，不過點都好，阿嗲呢次就做咗邱比特。

其實Bobo之前曾經講過，自來貓代表唔吉利，仲有句說話係「貓窮狗富」，原因係自來貓嚟得即係有鬼怪嘢，再唔係就有老鼠喎……阿嗲係自來貓咩？佢係畀人擺喺公司門口㗎嘛！更何況阿嗲唔止改變公司氣氛同埋撮合咗一段姻緣，佢仲幫我哋促成咗一單大生意。

自從老細接受咗阿嗲之後，我哋平時已經由得阿嗲四圍走，所以佢咪會得閒無事揀同事去「寵幸」嘅，某次咁啱有個客上嚟，對方原來係貓痴，一見到阿嗲直頭生意都唔記得傾，淨係喺度玩貓，仲有同我哋傾計，跟住就簽咗張單，由當初嘅新客，變成而家嘅熟客，每個月啲單都幾大條數㗎！

養咗阿嗲幾年，公司嘅離職率明顯直線下降，連HR都講過真係出少咗好多招聘廣告，最新要請嘅人就係代我……

今年9月，我會同老公移民去加拿大開始新生活，冇諗過除咗阿爸阿媽之外，原來我最唔捨得嘅係阿嗲，我係9月識佢，亦係9月離開佢，點解會咁記得？因為阿嗲被遺棄喺公司門口嗰日係911襲擊事件唔知幾多周年，好多新聞，所以有印象。

阿嗲可能知道我要走，last day當日有3分2時間都「寵幸」我，又瞓大髀又瞓我keyboard，仲同我嘴對嘴錫咗一啖，真係好唔捨得佢呀，不過我知道公司班同事會好錫佢，唯有得閒打視像返嚟解相思之苦啦！