上星期香港迎來「500年一遇」嘅暴雨，返唔到工，只可以work from home，但其實WFH都冇嘢做，因為唔止我哋公司，就算係班客都返唔到office，咁嘅情況當然係匿喺屋企休息啦，點知有個同事用WhatsApp係咁叫大家做嘢，仲叫人返公司。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
「周生個quotation點呀？send咗畀佢先吖，人哋有冇返工係一回事，我哋即刻send出去，周生一返office咪睇到囉！」
「ZA60031個價係幾多呀？500pcs幾多？1000pcs幾多？有冇人可以答我？有冇人之前send過出去，搵返個email畀我吖！」
「搵人報報個價得唔得呀？By ship平過飛機幾多？而家check唔到check到個貨期，大約都得㗎喇，我想要個期。」
呢條煩膠叫阿Ben，唔係老細，唔係管理層，佢只不過係一個做咗5年，叫做senior少少嘅職員。
其實煩Ben平時已經好鍾意搏表現㗎喇，唔係話你工作上心唔好，只係你做多咗囉！成日好似先天下之憂而憂咁，最經典有一次佢走去熄晒office啲燈，話要環保同埋幫公司慳電費，你冇聽錯呀，佢真係講幫公司慳電費。
煩Ben：「唔使燈啦，我哋個Mon都夠晒光，仲有窗呢！自然光仲好，幫公司慳好多㗎，影印機你哋用唔用吖？唔用就一係熄咗佢先，真係要print嘢先著返。」
頂你個肺有冇常識㗎！壞眼㗎！仲有影印機，邊有office會熄咗佢，要print嘢先開㗎！
嗰次係會計部個阿姐出聲叫開返燈，人哋做數嗰個都未出聲話要幫公司慳電費，你做乜勁呀？搞到個office黑媽媽，成班摸黑做嘢。
另外有一次又係好經典，有個高層屋企有白事，煩Ben自告奮勇走去line up所有同事做帛金，ok嘅，我覺得呢樣合理，但係煩Ben竟然話放工拉大隊去靈堂鞠躬，最終係個高層話唔需要，一般親戚過身同公司同事無關，人哋都認為咁樣做太大陣仗，喂！唔係先人不敬呀，公司成百人，個個屋企有白事都要拉大隊去靈堂鞠躬，咁真係好擾民囉！不過咁，煩Ben只會關心高層同事同埋老細，一般同事佢係話之你。
今次呢場「500年一遇」嘅暴雨，煩Ben選擇喺WhatsApp group指揮其他人做嘢，又要send quotation又要check報價又要check船期，出發點都唔單純，因為佢其實可以選擇直接搵相關同事，煩Ben留言嘅大group係有齊高層同老細，佢揀呢度去send啲咁嘅msg，明顯係想啲大粒睇到，大家做咗幾年同事，好熟悉佢平日點做嘢，趷起條尾都知你想屙屎定屙尿啦！
你自己想搏表現冇問題呀，但唔好搞著其他人吖嘛，我哋冇義務成全你呢條擦鞋仔上位㗎！
煩Ben：「阿May你可唔可以返公司睇下有冇漏水呀？我睇新聞周圍都水浸，黃大仙嗰度有冇見到呀？商場食肆啲凳都沖走晒，我哋公司新蒲崗可能都有影響，你住竹園咁近不如返去睇下吖！」
我見到真係火起，喺屋企即刻醒晒覆返佢：「你都識話黃大仙水浸啦，我點返去公司呀？」
冇嘢呀？黑雨走嚟勞役我？你估我真係可以call橡皮艇撐住撐住咁樣由竹園同你返去新蒲崗呀？」
有個隔籬team唔關事嘅同事都可能睇唔過眼，連佢都出聲：「阿Ben你淡定啲，我哋公司喺11樓，水浸唔會影響到啦！」
煩Ben：「我唔係驚水浸呀！我係驚滲水呀！一陣啲水由窗邊滲入嚟，隨時整濕啲文件同電腦，阿May住得最近，幫幫手睇下囉！」
我度火已經一發不可收拾，明知煩Ben喺公司大group講呢啲加晒分，我發火就會搞到全世界睇到，不過實在忍唔住：「勞工處都叫人唔好返工呀！同埋滲水又點呀？睇到又點？call到人整？定係你想我整？」
估唔到呢個時候有個人出聲，就係老細。
老細冇打字，佢選擇錄音，所以聽得出佢語氣唔係好耐煩：「唔好搞咁多嘢啦，同事留返喺屋企，唔好走嚟走去喇，一陣有咩意外，公司仲麻煩，同埋啲客如果唔係主動問嘢，都唔好打搞人哋，今日應該個個人都立立亂㗎喇！」
個死煩Ben見勢色唔對路即刻收皮，覆咗三隻字：「好，明白。」
然後我哋呢個公司大group就全日都靜晒，黑雨之下真係得煩Ben係咁send msg出嚟，煩唔煩呀你！
我唔明白點解一間office裡面會有一個咁樣嘅同事，搏表現搏到黑雨叫其他人返公司睇有冇滲水，最終要老細出聲佢先至收皮，我就當佢唔係搏表現，係真心愛公司，咁就更加戇居，唔好咁痴線啦！各路高層都冇開口，你而家妹仔大過主人婆呀！(完）
老細搵個女做臥底 同事一早知穿崩位
https://youtu.be/7MzCnEQ0hlc