今年3月份嘅時候，我兩星期內請咗兩次假，因為有個headhunt介紹咗份工，我會形容當時係無限接近辭職，口頭上連offer都傾好晒，係差對家嘅official email，但結果我冇走，最終選擇留低，因為上司畀咗封信我，加薪兼升職！
「Assistant Manager？」我驚訝係因為公司本身冇呢個position，Manager樓下就到我哋，而家突然加插個AM位，而上司就同我講：「你都做咗咁多年，已經係senior啦，又冇super senior，咪提議老細個title叫Assistant Manager囉，呢啲虛名嚟啫，冇意思嘅，最緊要係加人工，你睇下個數先啦！」
個數好滿意，非常滿意，相比起headhunt介紹我嗰份工，當時公司加薪嘅幅度更大，而且title點都叫升咗，上司仲爭取到我有多兩日年假，做生不如做熟，所以我決定做留下來的人。
跟住去到6月，我隔籬個女同事Cherry逐啲逐啲清走枱面嘅小擺設，連嗰個有佢同老公合照嘅相架都唔見咗，出嚟做嘢咁耐，我點會聞唔到係準備離職嘅氣味吖，大家平時咁熟，我亦唔怕主動開口問佢：「搞咩呀？走佬呀？搵到工？」
Cherry：「係打算唔做，不過未搵到工，老公想我做全職師奶，或者之後搵下有冇part time啦！」
後來，Cherry同我一樣收到上司嘅加薪信，唯一唔同係佢冇升職，純粹加人工，我冇問加幾多啦，只係知道Cherry決定唔走喇，佢當時係咁同我講：「其實繼續做都冇咩問題吖，始終結咗婚，開支大，兩個人做嘢都好過一個人孭晒，何況今次加人工都幾闊綽。」
去到8月，又有個男同事Andy睇落有resign嘅跡象，因為佢一收到電話就行出走廊聽，神神秘秘咁，我仲發現佢拎走咗隻私家杯，開始用公司啲Ikea杯，不過Andy條路都係同我，仲有Cherry差唔多，冇幾耐佢就畀上司叫咗入房，兩個人傾咗一個鐘左右啦，之後Andy就冇再出走廊傾電話喇，連隻私家杯都出現返，神奇！
聽講一個員工如果想離職，其實係有路可以捉，有先兆可以睇到，首先係多咗神秘電話，可能係搵緊工有人打畀你約interview，或者係對家HR想用電話了解下先，跟住就係請假，正路去見工都係office hour，一日半日前拎假，又或者忽然多咗「病假」，相信係無可避免。
去到較後階段，可能你會見到個員工逐步撤走私人物品，張枱會開始乾淨、開始吉、開始井井有條，因為佢唔打算再長期喺度戰鬥，又唔想last day嗰陣太多嘢會手忙腳亂，所以就慢慢咁執走，既低調，又方便自己，大家喺職場打滾得耐，呢種場面應該司空見慣，只係我哋個上司一樣睇到，仲加薪留住晒我哋幾個同事。
上個月，呢位上司話gathering，叫晒我哋全team出去食飯，席間佢又派多兩封信，畀另外兩位同事宣布加人工，換言之包括Cherry、Andy，仲有另外兩位同事，喺呢一年內都有加薪，我就直頭係加人工兼升職，成個部門都有著落，人人都好開心。
上司：「我想同大家宣布多一件事，我12月頭就走喇，希望你哋畀心機做落去。」
Andy：「走？走去邊呀？你唔做呀？」
當晚先接到加薪信嘅其中一位同事：「吓！你啱啱先加我哋人工咋喎！然後你走？」
我同Cherry都呆若木雞，不過都係等上司自己講埋落去啦！
上司：「我辭職要3個月通知，上個月我已經遞咗信，其實我上年已經plan好要走㗎喇，同我老婆去澳洲，一直係等緊啲文件同手續㗎啫，之前批咗，咁咪resign囉！」
我：「即係你點都預咗自己今年會離開公司？」
Cherry：「咁你又加人工叫我哋留低？」
上司：「我就係一早知道自己會走，所以加晒你哋人工先，因為公司之後會請個新人lead你哋，抑或喺你哋內部升一個，到而家都未有決定，我怕你哋之後加人工會冇咁易，始終唔知新官上任係點，而家你哋全部加薪，我就放心晒喇！」
上司仲解釋，因為老細對佢真係唔差，佢能力範圍內都想幫公司留低我哋呢班做到嘢嘅人，所以先會主動喺臨走前幫全team 5個人相繼加薪。
上司：「你已經係Assistant Manager（佢望住我講），Cherry同Andy都改咗做senior，我當你哋將來點都要走，拎住呢個title去再搵工，拎住而家呢個salary去搵新工作，叫價都高啲啦，呢個係我臨走前為你哋做嘅最後一件事喇，得閒嚟澳洲探我啦！」
其實我好感動，佢講得冇錯，將來嘅路唔知係點，新官上任之後亦唔知係咩光景，不過我哋每個人都加咗薪升咗職，若然真係要再搵新工作，叫價能力會高咗好多。
成日話辭職可以捉路，先兆其實睇到，不過今次我真係跌眼鏡，同時諗起一句說話，就係有心走嘅人，永遠都係無聲無息，唔會畀你睇到任何端倪同蛛絲馬跡，唔會忽然請假，唔會執走私家杯，唔會周圍同人講，一決定，就遞信，絕不拖泥帶水。
好感激上司為我哋班下屬做嘅一切一切，希望佢未來喺澳洲生活愉快啦！