「點解你想加入我哋公司？」呢個問題係由Marketing阿姐問個求職者，我作為HR只係坐喺旁邊一齊做interview。
Marketing阿姐expect人哋讚下公司夠大夠出名，順便睇下啲求職者有冇做功課，因為公司網站有之前做過嘅大型event資料。
不過今次呢位男性求職者答得「好特別」，差少少令我喺會議室嘔 ，佢話：「我send咗好多CV去見工，但呢間公司特別多靚人，包括你哋兩位（佢指阿姐同埋我），畀啲靚人包圍住去做嘢，心情同埋思維都會好唔同。」
Over咗好多喎！聽到毛管戙呀！
點知阿姐buy……佢再問個求職者：「靚？我哋呢度唔係睇樣㗎喎！好多嘢做，啲客要求好高！」Marketing阿姐係笑住講。
求職者：「所以我覺得好奇怪，通常個樣靚嘅人，做嘢都唔多掂，不過見到你之後真係改觀。」
阿姐完全掩蓋唔到喜悅，笑住問：「你點睇得出我做嘢掂？我平時好惡㗎，交唔到貨都係照鬧。」
求職者：「咁你唔叻都唔會坐到呢個位啦！畀個靚嘅上司鬧，接受程度都高啲。」
你哋有冇睇過《我們這一家》，其實個Marketing阿姐係類似花師奶嘅款頭，搵工啫，唔使咁假嘅！
見完呢位求職者之後，Marketing阿姐同日仲in多一男一女，但係in嘅過程都好敷衍，果然不出所料，第二日就叫我打畀讚佢靚嗰位求職者，問幾時可以返工。
冇所謂呀，佢嗱嗱聲請到人，我呢個HR就煩少樣，只係估唔到咁誇張嘅稱讚都有人受啫！
我call佢confirm offer嗰陣，呢位求職者喺電話同我講：「唔該晒呀！你係我人生見過最靚嘅HR……」
得啦，收嗲啦！太誇就尷尬㗎喇！搵食艱難，搵工都艱難，明白嘅。