我間公司好L好笑，初初入嚟做真係嚇親，因為隔籬位個同事話阿爺死咗，要請兩日假去殯儀館同埋上山，咁我知道之後梗係同佢講節哀順變啦！仲走去問其他人要唔要夾份做帛金，但係個個都話唔使，心諗唔係咁好啩！結果我私人做咗帛金畀嗰位同事。
再過咗唔夠一個月，我後面個同事屋企又死咗人，我又做返相同嘅動作啦，仲諗過係咪公司風水唔好呀（定係我腳頭唔好）？前前後後啲同事係咁有親人離世嘅？不過今次個同事唔肯收我帛金，呢啲嘢都客氣？傳統嚟㗎喎！個同事就私底下同我講：「其實我屋企冇死人呀，想請假，藉口嚟咋！」
請假啫！講咪得囉！使唔使作到有親人走咗咁大吉利是先？發燒、發冷、頭痛、腳痛、胃痛、M痛，九萬幾個理由任你講都得啦！不過同事話畀我知，老細係一個疑心超重嘅人，普通理由請假全部唔信，就算係表面上信你，到時都會諸多留難。
試過有同事真係M痛到做唔到嘢，想請半日假，但係老細叫佢伏喺張枱休息下，話咁痛返屋企沿路仲危險……
又試過有同事就咁話屋企有事，朝早打返嚟請事假，結果老細係咁打畀佢，煩到個同事未到lunch time已經返咗嚟公司。
打份工有需要忍受呢啲咁冇人情味嘅老細？對某啲人嚟講的確係唔需要，特別係後生嗰班，所以年中都好多人會選擇辭職，但係對於有一定年紀同年資嘅同事就唔同講法，好多人唔想冇咗份工，亦唔想得罪老細，所以決定頂硬上默默忍受，所以我公司有個現象係後生嘅做唔長，留低嘅大多數係年紀比較大。
我自己雖然未夠三十，亦好唔認同老細嘅作風，但因為入咗嚟做之後未請過病假（年假就試過），所以喺請假呢個Situation未試過要勞氣，針唔桔到肉唔知痛吖嘛！真係有一日請假被留難再算囉，始終未發生喺自己身上。
而其實班同事唔止請假要作啲誇張藉口，就連辭職都要搵個好爆嘅理由，聽過有人話要接手家族生意，私下同佢farewell先知係吹水；有個就話嫁鬼佬，婚後要跟老公去澳洲，明明佢條仔就係香港人；又有一個話自己有病，嚟緊要做大手術……我覺得over咗喇，辭職咪辭職囉，都唔做啦！使唔使諗藉口諗得咁辛苦，仲要咒自己呀？
原來老細留難辭職嘅人都有前科，大家有冇試過resign之後畀上司或者老闆當仇人看待？明明你冇做錯嘢，但辭職就好似背叛咗公司咁，而我老細正正係咁嘅人，又唔肯出reference letter，又畀面色你睇，又加重你工作量，因為大家都見識過，辭職時唔想出現呢種麻煩嘢，所以個個遞信嘅時候都會作啲勁爆嘅原因。
我見過自己部門最爆笑嘅一個場面係咁，個同事搵到新工，首先遞信畀我阿姐，已經作定個官方原因係幫老豆打理茶餐廳，然後阿姐提佢：「太普通喇，上個月Justin先至用幫屋企人做生意呢個理由resign，你作過另一個啦！」
同事：「吓！我諗唔到喎！其實我哋講乜老細都唔信㗎啦！」
阿姐：「係啫！咁你都唔想煩㗎嘛！你話移民英國啦！而家大把人離開香港，話同屋企人一齊搬去英國囉！」
同事：「是但啦！最緊要有reference letter，新公司叫我第一日返工畀佢哋，你點話點好啦！」
之前有個同事嘅辭職原因終於有啲「創意」，佢話自己惹咗官非，唔想連累公司，所以就resign喎！呢個ok呀！仲懶係幫公司著想，以大局為重，聽講老細聽完都係唔信，捉嗰位同事入房傾咗個幾鐘，不過最終都係放人。
而家人都走咗，以為件事就咁完啦！早幾日有差佬上嚟公司，問receptionist嗰位同事係咪喺度做？仲叫咗佢department head出去問咗幾句，跟住大家先驚覺惹官非單嘢原來係真！據講係衰非禮之類，保釋期間又冇去警署報到，完全失聯，所以輾轉間先搞到有差佬上嚟搵人。
仲以為咁有創意，原來呢次係真人真事😅
