我做獵頭，最近同事遇到一個case令我覺得好矛盾，你都知程序上係有個客請人，咁獵頭就會開始著手搵candidate㗎啦，有時啲客未必一次過將要求講得好清楚，就好似今次嘅事件咁，原來超過35歲都會被人嫌老。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
簡單啲講，同事搵咗一位叫Peggy嘅candidate，覺得好適合，點知佢個客見到份resume就話：「40歲？唔得，太老喇！」
原來個客自己心目中係有條線，除咗工作技能同埋經驗之外，年齡方面係希望請一個35歲以下，因為需要請人嗰個部門嘅同事平均年齡比較細。
正所謂家家有求，你搵得獵頭都要幫你做，但係應該一開始就講清楚吖嘛，而家咪嘥晒啲心機時間要重新搵過囉！
呢度都未出事，講真做得獵頭，呢種case耐唔耐都會發生，出事位係我同事竟然直接同嗰位叫Peggy嘅candidate講：「Sorry呀，呢份工唔ok，個客話你40歲，年紀太大。」
其實真係要睇你企喺邊個立場，假設我係candidate本人，聽到個真實原因會好開心，起碼唔會死得不明不白，起碼我知道自己唔係能力有問題，我會多謝個獵頭咁誠實，但係你太誠實又會引發其他問題，就好似今次呢位叫Peggy嘅candidate咁，佢係將所有怨氣都發洩晒去我同事身上。
Peggy：「我40歲有咩問題呀？年紀大就冇資格搵嘢做呀？唔通你冇40歲嘅一日㗎？」
佢哋係用WhatsApp voice msg溝通，我同事又錄返msg回覆：「唔係我要求㗎，係個客要求㗎！」
Peggy：「咁你反映吖嘛！你冇口㗎咩？你同返個客講，2023年啦！仲玩年齡歧視呀？唔請40歲唔怪得要搵獵頭公司啦，因為佢哋唔方便出個招聘廣告，然後寫住要40歲以下係咪？驚畀人去平機會告歧視係咪？」
我同事仲要再誠實啲：「唔係，個客唔係要40歲以下呀，佢哋要35歲以下。」
Peggy：「我想問下你，你唔驚自己會有老嘅一日？雖然我唔知你幾多歲，又雖然我聽你把聲都係後生，但你都會有35歲嘅一日㗎嘛，啱唔啱先？」
我同事都未趕得切回應，Peggy又send多個voice msg過嚟：「咁我想問呢間公司啲人係咪全部唔過35歲吖？如果過咗35歲係咪要自動辭職吖？」
我哋阿姐知道呢件事之後就指責同事做得唔好，唔應該同candidate講個客要求35歲以下，一來對方可能真係會搵平機會，二來好似而家咁樣糾纏落去都冇意思。
所以我一開頭都話，睇住呢個case覺得好矛盾，做獵頭又好，做HR又好，係咪唔應該太老實，或者咁講，係咪應該修飾下先至講返個原因畀candidate聽呢？無謂引起不必要嘅語言衝突，仲隨時有其他手尾跟，唉！但係唔同candidate講真話，人哋又永遠唔知衰乜。
講開又講，雖然呢度係香港，但係嚟到今時今日都仲有公司存在年齡歧視，嗰位Peggy雖然將怒火發洩喺我同事身上，不過又唔係講得冇道理，每個人都會老，每個人都會踏入35歲，踏入40歲，甚至更老，難道咁就冇資格搵嘢做？何況你間公司請咗人返嚟，啲人都會老㗎啦，唔通老咗就唔用呀？(完）