我有個朋友喺2023年尾搵到份工，係嗰啲連埋老闆得3至4人嘅細公司，未過試用期已經遲出糧，嗰陣就應該唔做啦！「試用期」唔止係公司試用你，你都有權去試間公司做唔做得過，雙向㗎！
打得呢段稿過嚟，即係個朋友遲出糧都繼續做，結果佢做足一年，基本上個個月都遲出糧，聽佢講本身有兩個同事都先後走埋，最終淨低佢同老闆，日日返工喺office你眼望我眼。
大家應該同我有一樣嘅疑問，就係間公司究竟做咩？朋友話佢哋做貿易……由細到大都覺得貿易兩個字好似宇宙咁大，總之就好空泛，不過你唔好理，自從呢間公司得返我朋友同佢老闆兩個人之後，就再冇遲出糧嘅情況出現喇，因為直情冇糧出呀！！！
朋友話老闆入咗批貨有問題，申請緊退款，所以鎖住咗大部分流動資金，仲話公司個藍圖好大，只要捱過呢一關就會見到曙光，唔講以為佢入咗邪教，咁你返工搭車食飯都要錢吖，唔理咩藍圖黃圖紅圖，倒貼仲叫返工咩？
直至後來呢位朋友問我借錢，我先知遲出糧同埋唔出糧未算最嚴重，原來佢仲借埋錢畀個老闆，每個月都借，有時幾百，有時幾千，有時五位數，前前後後一共借咗40幾萬畀個老闆，自己窮到冇錢返工要問我借200蚊！
借200蚊畀你唔係問題，唔通睇住你冇飯開咩，期間鬧過呢位朋友N咁多次，鑊鑊佢都話老闆唔會呃佢，倒返轉話我諗嘢好悲觀好負面，又成日同我講呢個世界仲有好人。
隔咗冇幾耐，呢位朋友再問我借錢，今次借5萬……上次借200蚊，一跳就跳到5萬？
我：「其實你係咪智力有問題呀？你老闆擺明呃錢啦！」
「唔係呀，我老闆如果呃錢，之前都唔會出糧畀我啦，佢一時之間周轉唔到啫！」
我：「佢出糧畀你係應份㗎喎！仲要第二年開始已經冇出糧，你第一年嘅年薪都冇40萬啦，嘔凸喎師兄，有冇用個腦思考下？」
「幫幫手啦，過埋呢一關啫，呢5萬我私人爭你！」
我：「我冇，就算有都唔會借，你自己諗掂佢啦，你咁信你老闆，出去問財仔借吖笨！」
「之前借咗喇，而家借唔到呀！」
嗰陣時我先知，原來佢係借財仔再借畀個老闆，喂大佬，成年人啦，又男人老狗，唔係要我代你出頭追個老闆呀？
不過後來都冇得追喇，因為個老闆走咗佬，office嘅租都欠交幾個月。
佢老闆人間蒸發，我叫佢報勞工處再報警，都唔爭在報埋《東張西望》啦！雖然都知凍過水，點知我朋友唔肯去，佢話老闆應該有難言之隱，唔想搞到報警咁大件事，幾好笑，佢欠你大半年人工，欠你幾廿萬走佬就唔大件事？其實我懷疑朋友唔止借咗40幾萬畀個老闆咁少。
直到我投稿呢一刻佢都冇報警，冇報勞工處，個老闆依然失蹤，WhatsApp變埋單剔，打去就冇cut台嘅，只係直接飛留言響都冇響，咁我可以點呀？脅持佢去報案呀？呢位朋友而家搵咗第二份工，仲撈埋兼職去還債，但佢始終唔信個老闆呃佢。
有時我會諗，已經2025年，好多呃錢招數只不過舊酒新瓶，稍為有留意新聞都唔會受騙，哈！似乎係我太天真，原來幾舊嘅橋同埋幾荒唐嘅大話都好，仍然會有人keep住中招，而且執迷不悟，自己唔願意清醒，根本冇人可以救到。