我6月頭in過三份工，其中一間印象好深刻，因為同個HR傾得幾投契，當日我哋先正統咁做interview，後尾佢話自己5月尾去咗日本旅行，否則可能會更早約我上嚟見工，就係咁，我哋嘅話題就忽然變咗講東京景點。
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。（其他人士或專頁如在Facebook按「Share」原文，則不在此限。）
講講下東京景點，HR姐姐忽然呻自己個男朋友唔編排行程，日日喺酒店瞓到好晏先起身，以致耽誤咗好多時間去唔晒啲地方，咁我又同佢分享自己個男朋友都係咁，次次旅行例牌由我睇google map搵路，總之就幾啱嘴型幾好傾啦！
結果呢次interview用咗超過一粒鐘，一半時間見工，一半時間吹水，由於氣氛太愉快，所以我對呢份工係幾有好感，不過之後等下等下，6月中都過埋喇，佢哋始終冇聯絡我返工，咁冇辦法啦，大把人interview傾得好好，最後一樣冇下文，呢種情況比比皆是。
正當我已經放棄之際，有日突然收到個電話，因為係9字頭又唔識，我都猶豫咗一陣應唔應該聽，最終竟然係當日嗰位HR打嚟。
HR：「Shirley？記唔記得我呀？Maisy呀！我哋interview見過㗎！同你傾日本旅行嘢嗰個呢！」
我：「記得，梗係記得啦！」我6月頭total見咗三份工啫，有一間仲係男HR，所以好易記。
雖然用手提電話唔係公司電話，但我第一個感覺都以為佢想confirm offer，勢估唔到佢會講以下落嚟嘅說話。
HR：「本來我早幾日已經想打嚟叫你返工，但係我而家冇做喇！」
我：「冇做？你離開咗間公司嗱？」
一般resign都需要一個月通知，唔通對方in我嘅時候已經遞咗信？
HR：「係呀，我走咗，所以呢幾日可能會有個新嘅HR同你confirm offer，不過我想勸你唔好去做。」
我：「唔好去做？點解呀？」
HR：「見大家當時咁好傾，所以我唔想瞞你，呢間公司做唔過㗎！啲人勁賤，你條team個阿姐就已經係一個bitch！你上一手就係頂佢唔順先至走，呢條team每年起碼要請6, 7次人，咁你話走得幾勁吖！人人都係因為個八婆先至走。」
由於訊息量太龐大，而且成件事又突然，我聽完都唔知應該畀咩反應，人生未試過有HR見完工之後私底下call自己，目的係嗌你唔好入去間公司做。
HR：「唔止你條team個bitch麻煩，其他部門互相之間都好多牙齒印，呢個唔妥嗰個，嗰個唔妥呢個，第日你做起嘢上嚟就會知道好難搞，仲有，呢度已經連續3年凍薪，個老細一直話疫情生意唔好，叫大家共度時艱，其實唔係囉！」
訊息量依舊龐大，雖然滿頭問號，咁我都要係咁易畀下反應嘅。
我：「哦，即係呢間公司3年冇加過人工呀？」
HR：「係呀！但我話畀你知，之前政府啲保就業津貼佢哋係攞足，同埋有Sales爆過除咗疫情頭半年有啲影響之外，之後啲生意額根本就冇跌囉！特別係上年年尾，公司賺多咗錢㗎！老細呃啲員工唔知，成日話蝕蝕蝕，佢想唔加人工之嘛！」
好激動喎！我終於諗到一個問題可以問，亦都應該要問喇！
我：「咁你做咩走得咁突然嘅？就係因為嬲公司又唔加人工呀？」
HR：「唔關事，總之如果你入去做就要跟住呢個bitch，一定有排你受，呢間公司賊船嚟㗎！正常人同埋好人10隻手指數得晒，你上嚟嘅時候唔覺啲氣氛怪怪地咩？」
我：「可能你太好人，我哋又咁好傾，其實我對你公司印象都幾好㗎！見工未睇得出咁多嘢。」
HR：「我就係見你咁好傾先至提醒你，你入去做一定頂唔順個bitch，到時盞整花張CV，我肯定佢連reference letter都會寫衰你，試過㗎喇，佢draft出嚟我出reference letter，啲字眼mean到呢！」
呢位HR收線之前仲要千叮萬囑，重複又重複咁叫我唔好上賊船，唔好入去做。
HR：「如果我冇估錯，你呢個禮拜內會收到佢哋電話，唔好做，你一定會後悔，好啦，你自己諗下，我都唔阻你喇。」
有冇留意個HR由始至終都冇正面回答我點解突然唔做？可以走得咁急咁快，除非佢積埋好多大假可以early leave，但佢上次明明話5月底先去咗個旅行，真係有咁多大假淨？還是佢係畀人炒呢？因為真係好重怨氣。
其實同你interview個HR私人通水，打嚟嗌你唔好入佢間公司做，我相信呢種情況絕無僅有，係私怨定肺腑之言就不得而知喇，而呢間公司隔咗日真係有人打嚟畀我出offer，但我拒絕咗。
拒絕唔係因為畀個HR嘅說話影響，而係我之前去見嘅另一份工都出咗offer，人工仲要唔錯，所以個HR未call我之前，我已經答應咗另一間公司返工喇，希望嗰位HR無論係咩原因離職都好，嚟緊會盡快搵到新工啦！