有次去interview，見到一半個HR同我講：「呢個expected salary我哋畀唔到，$30,000你會唔會考慮？」
當時我人工已經$35,000，expected salary就填$38,000……
我：「唔會考慮。」分唔清佢真係冇budget定係壓價，但你都唔好咁過份吖！
HR：「我覺得你眼光可以放遠啲，人工只係一個數字，要睇埋發展前景。」
心諗，收皮啦！市價都畀唔到，仲同我講前景！
我：「平手我都唔會諗，更何況少過而家份工。」
HR：「換轉係我，我會接受囉！」
頂你個肺！我份resume都寫晒current同埋expected幾多，點解你哋budget唔到又嗌我上嚟呢？我嗰陣特登請假㗎！
我：「你會接受係你嘅事，唔代表每個人都要接受，如果爭咁遠，我諗大家唔好再嘥時間。」
不歡而散，冇反枱算係咁，點知同日個HR打返畀我，你估下佢講咩？呢位HR竟然喺電話度叫我道歉！我問道咩歉？佢話我頭先見工態度好差。
我：「你冇嘢呀？」
HR：「如果你唔道歉，後果自負！」
真係無名火起，我即刻cut線直接打去佢公司總機，點都要搵人投訴呢個HR，咩叫後果自負？你恐嚇呀？
事實證明我太天真喇，間公司會撳價幾千蚊，仲請個忽筋嘅HR，又點會有人care我呢？連續打幾個電話去講明要搵佢老細，結果都係畀人耍走，正一垃圾公司！
不過佢呢句「後果自負」的確令我擔心咗一陣，始終我係請假見工，如果佢玩嘢打去我當時做緊間公司，坦白講都幾頭痕。
件事隔咗成年喇，後來我轉咗另一份工，但偶然諗起都有啲嬲，有時我會喺度諗，如果我冇癲晒咁打去佢公司投訴，畀佢知道我唔好蝦，唔知嗰位忽筋HR會做啲咩令我「後果自負」呢？見工見到被恐嚇簡直係奇遇。