我叫Cynthia，見完份工之後好迷失，唔知應唔應該搵個HR，定係直接打畀個Manager，因為曾經試過interview完咗之後打去follow up，結果畀人鬧到一面屁，對方話：「我哋冇時間逐個求職者打去話唔請㗎！如果請你就會直接打畀你，唔使特登打嚟問，你都有自由去見其他工，唔一定要等我哋。」
就係因為有呢段不愉快經驗，所以後來我見完工都唔敢做咩follow up工作，佛系咁等人哋打返畀我，但今次有啲唔同，我咁猶疑唔知應該點做好，係因為最新呢次interview我total見咗6粒鐘，由朝早10點見到晏晝5:30，其實冇機會又點會in咁耐呢？但係有機會又點解直至而家都唔call我呢？
當日我10點去到，填完form就見HR先，呢一輪in咗20分鐘左右，然後HR就請咗Manager入房再in我，唔知咁樣算唔算係second in？其實見Manager嘅時候仲好正常，你諗到嘅問題佢都問晒，包括：上一份工主要做啲乜？點解辭職？點解想加入佢哋公司？
答完一大輪以為到尾聲啦，點知個Manager開始講公司嘅背景，從11:00講到12:15，一時講下公司歷史，一時講下老細識啲咩政界猛人，一時又講下老細喺湖南有幾多自置廠房，扯到去可能會畀大陸收地起鐵路，仲話公司隨時賣地都賺好多錢……關我咩事先？賣地啲錢又唔係落我袋。
用咗個幾鐘講老細啲威水史，原來而家先入戲肉！
Manager：「我嗰陣時20歲已經出嚟做，冇讀大學㗎！做人最緊要聰明，識執生，學歷係咩呀？一張沙紙！冇意思㗎！而家個個under我嘅都係大學生，你有沙紙又點呀？咪一樣跟我搵食！不過咁，有學歷係方便啲嘅，結果我40歲嘅時候咪返夜學囉，幾年搞掂咗啦！邊個話人老咗讀唔到書呀？唔係得你哋啲後生女先至讀書叻嘅！」
？？？我聽咗啲乜，一時話讀大學冇用，一時又話讀夜學搞掂咗張沙紙，okok，你講咁耐都係想我讚你勁啫！
Manager：「嘩！12點半㗎喇，我約咗人食晏，但有啲嘢仲想問你，咁啦，你都去食個lunch先，一陣約你2:30再返嚟，好冇？冇約人吖嘛？有冇其他工要見呀？」條友叫我食完lunch再返上嚟繼續interview……
咁但係可以點？唔嚟都嚟咗，由10:00鐘見到當時1:00，我又真係冇其他工要見，都要搏埋佢㗎啦！
我：「冇，咁我一陣再上返嚟吖！」
「好，2:30，唔好遲唔好早，掛住講我啲嘢都未入正題。」原來你都知未入正題。
如是者我喺呢間公司附近搵餐廳食飯，當時我心態上係樂觀嘅，照正路去分析，如果你對我冇興趣，點會喺我身上浪費咁多時間先，interview時間愈短愈冇機會，愈長就愈有機，我咁諗都好正常啫！都浪費咗半日，唔爭在啦！結果我搭正2:30再上返去，receptionist話Manager未返，叫我自己喺會議室等，我等到3:00！
又係你叫我2:30唔好遲唔好早，你自己就遲半個鐘，算喇算喇，問題係我完全feel唔到入正錯，個Manager將呢個「面試下半場」變咗人生哲學課，佢先問我一啲過往工作嘅細節，包括同同事嘅關係點樣，然後就開始教我做人嘅道理。
Manager：「我第一份工係阿哥個friend介紹，做咗3年已經升職，然後我轉新公司，第一張大單係舊同事醒我，所以你話人際關係幾重要，我敢講句，就算聽日遞信辭職，只要我吹雞，大把公司排住隊請，點解呀？人脈囉！口碑囉！啲朋友唔會睇住我窮㗎！仲有啲門生又係，我以前睇住佢哋，之後佢哋都會睇住我！」
我唔知你哋邊個睇住邊個啦，但我睇住會議室裡面個鐘，佢一直講經講到4點幾接近5點，期間我無數次搣自己大髀，因為好眼瞓呀！捨得傾返份工未呀！
Manager：「其實見咗咁耐，你有冇嘢想問返我，例如呢間公司嘅嘢。」
我終於有對白喇！但我都好精㗎喇，咁樣回應佢：「呢間公司嘅架構同文化，你頭先都講得好清楚！」
Manager「未㗎！我都係講咗啲表面嘢畀你聽，之前有間傳媒上嚟做訪問，你等等，畀你睇下，我有save低個網頁版。」
個Manager唔止「剖析」成個訪問嘅內容，仲連拍攝嘅細節都同我講埋。
「嗰日呢間media派兩個人上嚟，個記者妹就負責問，然後有個攝影師打燈，喺側邊影啲硬照，我問使唔使化妝呀？可以搵女同事幫手喎！哈哈哈！你哋啲女仔實有化妝品跟身㗎嘛！」
難為我仲要扮到好有興趣咁睇，呢個時候已經5:30喇！個Manager亦終於「覺醒」！
Manager：「嘩！就嚟6點！唔得喇，我要準備執嘢走，老婆買餸要我車佢呀！OK㗎喇，有消息HR會通知你，我見你都幾有潛質，應該聽教聽話嘅。」
我：「咁……通常要等幾耐先知結果？」
Manager：「好快㗎啫，我會叫HR盡快通知你，聽日都會同人事部傾下。」答完等於冇答。
份工我係5月22號去見，而家6月，足足等咗兩個禮拜都未有電話嚟，真心想問應唔應該打去follow下呢？Send email好似太迂迴，如果真係直接打去，應該打畀HR定係Manager？我唔甘心呀，10點in到5點半，仲要自己出去食飯，其實我in個junior position咋！唔好玩我成日然後冇回音啦！想問下意見，假設呢件事發生喺大家身上，現階段要點做先好呢？