有個客好麻煩，訂單數量細，銀碼細，但係多多要求，而且壓價仲好狼，佢見我唔肯讓步，就叫我搵埋阿姐一齊傾，雖然冇講出口，不過徹頭徹尾就係「叫個話到事嘅嚟見我」嗰種態度。
我部門一向要同阿姐定期client visit，因利乘便就約個meeting啦！今日去到個客間公司，對方一坐低就向我阿姐告狀：「上個月同你同事傾過啦（即係講緊我），佢話冇得減喎！而家個市好好咩？個價仲企咁硬？我哋之後會再攞貨㗎嘛，年尾呢水有冇discount先？」
阿姐答佢：「我哋做成衣配件，又唔係食物，都唔會壞，你過埋年攞貨都冇問題，不過到時都係呢個價，唔係我唔想減呀，老細落咗聖旨，除非張單過70萬，否則一定係standard price，你今次張單幾多呀？我幫你睇睇。」
個客面有難色：「4萬幾5萬左右。」
阿姐：「咁落10張單都未夠喎，你試下問第二間有冇discount先啦，可能有呢！我哋老細好執著㗎，我都想幫你呀！」
不嬲知阿姐把口勁，推晒畀老細更加唔使煩，你張單4萬幾5萬唔係叫我約老細啩，好唔好意思呀？
我覺得阿姐今次未算最寸，曾經有個客要求4折先肯簽單，阿姐喺Zoom meeting笑住同對方講：「4折？你覺得我哋偷返嚟？因為係賊贓所以趕住出貨？」
當時Zoom meeting仲有其他人，總共有8格，除咗個客自己之外，我見到其餘幾格嘅人都偷笑，真係隔住個mon都feel到份喜感，難得個客仲答我阿姐：「唔係話你啲嘢係賊贓……」
阿姐：「講笑啫，你話4折嚇親我吖嘛，唔知以為我哋喺金舖打完劫返嚟，驚差佬捉到要趕住出貨，我心諗，公司明明唔係賣金吖！」
CLS講嘢勁多骨
我問阿姐驚唔驚得罪啲客？佢嘅一席話令我印象深刻：「呢啲客得罪都冇問題，冇potential，淨係識搵你著數，踢走一件即係煩少一樣，你嘅工作同心情都會好好多，所以呢啲客係要得罪㗎！」