其實呢段唔算投稿，我反而係想聽多啲人嘅意見，因為返咗呢份工已經接近3個月喇，我仲係冇一個屬於自己嘅位，日日坐喺茶水間，有啲唔熟嘅同事仲會用好奇怪嘅眼神望我，要喺pantry做嘢喎，唔望先至怪啦，我應唔應該趁試用期之前走呢？
嚴禁轉載聲明：本網站所存在的一切知識產權，屬於我們所有，或已合法地特許給我們在本網站上使用。由適用法例所授予的一切權利，茲在此予以保留。除我們給予特許外，閣下不得以任何形式及方式，創立衍生作品、下載、翻印、複製，或節錄我們的故事內容放在其他網站圖利。
我嚟見呢份工嗰陣唔知道情況咁惡劣，去interview冇理由問人：「我有冇位坐㗎？」因為有位係好正常，即係你唔會interview走去問人我份工有冇筆用，道理係一樣，結果我返工第一日個上司就同我講：「唔好意思呀，因為上一手同事有嘢要跟，佢暫時未走住，要辛苦你坐住茶水間先，office已經冇位坐喇，拍硬擋頂住先，茶水間張枱起碼放到電腦。」
雖然唔鍾意，但唔通發爛渣咩？同埋上司話就算呢位同事未走到，佢都係決心要請我，講到咁更加令我想觀望多陣。
點知愈做愈唔對路，嗰位所謂嘅「上一手同事」根本冇走嘅跡象，咁點為知「上一手」呢，個同事仲做緊㗎喎！
不如先講下我個茶水間座位先，呢個pantry喺正office中間，雖然間隔上係一間房，但前後都冇門，仲可以話係連接office兩邊嘅通道，根本就係成個office嘅公共空間，裡面除咗水機、咖啡機、零食、洗手盆，同埋大垃圾筒之外，仲有個雪櫃同埋一張長型嘅類似吧枱，故此除咗斟嘢飲之外，大家亦會喺呢度叮飯食飯，無論我坐吧枱乜嘢位置都係無遮無掩。
唔知大家嘅pantry有幾高嘅使用率，我呢間公司可能多人，真係平均每一兩分鐘就有人行入嚟，大佬呀，接近80個同事喎，佢哋為免lunch叮飯「塞車」，由12點開始已經排住隊係咁叮，仲未計斟水、拎嘢飲、洗手、打牙骹等等。
Lunch之後成個茶水間嘅味道都好大，有次個同事叮完屋企整嘅鹹魚肉餅，我成個下晏都聞到鹹魚味，咁我啲袋都係放pantry㗎嘛，返屋企仲聞到鹹魚味！唔通你怪同事咩？茶水間故名思議就係畀人咁樣用㗎啦，所以我絕對唔會表現出唔開心，因為我自己先係多出嚟嘅人，我係唔應該喺pantry辦公㗎！
我亦盡量避免留喺公司食飯，最大原因係我覺得阻住其他人，有時未到1:00，大約係12:50咁上下，有幾個同事已經叮好飯set晒陣喺pantry張枱食，佢哋幾個係飯腳，慣咗帶飯盒所以會約埋一齊食，然後我坐喺中間勁奇怪。
呢幾個「帶飯之友」其實好好人，佢哋都問過我幾時可以有自己嘅位，但我作為當事人都答唔到，唯有苦笑回應。
你唔可以要求每個同事都識得向你表達關心，所以有啲唔知咩department嘅人行過，就會用好怪嘅眼神望我，都幾難受㗎！
茶水間個阿姐同我最熟，唉，笑死！佢同我真係朝夕相對，仲講出我嘅心底話，有次茶水姐姐咁問：「你阿頂又會咁衰嘅，叫人坐呢度，你係咪臨時工嚟㗎？」
我：「唔係臨時工，我係正式員工，係囉……我坐喺度係咪阻住你做嘢？」
茶水姐姐：「冇阻，我有咩所謂啫！不過你阿頂好唔尊重你囉！我都未見過人坐喺茶水間辦公事，你文員嚟㗎嘛！我返去同個女講，我個女都笑。」哎呀，做咩同你個女講呀，好馨香咩……
我當然有向上司反映，但佢似乎採取拖字訣，仲好老實咁話嗰位同事而家唔走喇！
上司：「嗰位同事因為個人原因，而家唔會走喇，會留返低，不過你唔使擔心，唔係有佢冇你㗎！我哋個department的確需要人，開咗呢個headcount就唔會減返，你放心啦！我會爭取喺你試用期後加人工，點都會加，爭在加幾多。」
我都好直接講：「加人工緊要，不過我更加關心幾時有自己個位，坐pantry搞唔掂呀！」
上司同我講，位呢方面可能暫時未安排到，除非有其他同事辭職，但就百份百需要我繼續做。
說話夠動聽，不過我好難忍受坐茶水間做嘢，無可否認呢間公司係幾大，人工同福利都唔錯，之前有盼望可以「埋位」都仲忍到，而家知道咗可能會無了期，心理上好難受，想問下大家意見，換轉你係咁嘅情況仲會唔會做呢？一個星期後我就過試用期，到時resign就要一個月通知㗎喇！（完）
真心希望大家會subscribe《辦公室日報》嘅YouTube，亦會嘗試畀個機會睇下我哋嘅影片，因為呢個YouTube channel 背後有啲故事，有機會同大家再分享，無論如何，多謝你哋！
